ପୁଣି ରବିବାର , ପୁଣି ଭାରତ – ଅଷ୍ଟ୍ରେଲିଆ ଫାଇନାଲ ଏଥର ଜିତିବ କିଏ ?

ପୁଣି ଥରେ ଭାରତ ଏବଂ ଅଷ୍ଟ୍ରେଲିଆ ଫାଇନାଲରେ ମୁହାଁ – ମୁହିଁ ହେବେ । ବରିଷ୍ଠ ଦିନିକିଆ ବିଶ୍ବକପର ପ୍ରତିଶୋଧ ନେବାର  ଭାରତ ପାଖରେ ରହିଛି ଆଉ ଏକ ସୁଯୋଗ ।  ଅଣ୍ଡର -19 କ୍ରିକେଟ୍ ବିଶ୍ୱକପ୍ ର ଫାଇନାଲ ଭାରତ ଏବଂ ଅଷ୍ଟ୍ରେଲିଆ ମଧ୍ୟରେ ଖେଳାଯିବ | ଫେବୃଆରୀ 11 ରେ ଉଭୟ ଦଳ ମୁହାଁମୁହିଁ ହେବେ। ଏହାପୂର୍ବରୁ ଭାରତୀୟ ଦଳ ସେମିଫାଇନାଲରେ ଦକ୍ଷିଣ ଆଫ୍ରିକାକୁ ପରାସ୍ତ କରିଛି। ଏଥି ସହିତ ଅଷ୍ଟ୍ରେଲିଆ ପାକିସ୍ତାନକୁ ଗତକାଲି ପରାସ୍ତ କରି ଫାଇନାଲରେ ପ୍ରବେଶ କରିଛି । ବର୍ତ୍ତମାନ ଉଭୟ ଦଳ ଟାଇଟଲ୍ ପାଇଁ ପ୍ରତିଦ୍ୱନ୍ଦ୍ୱିତା କରିବେ। ଭାରତ ଏବଂ ଅଷ୍ଟ୍ରେଲିଆ ମଧ୍ୟରେ ଫାଇନାଲ ରବିବାର ଭାରତୀୟ ସମୟ  1.30 ରେ ଆରମ୍ଭ ହେବ | ଷଷ୍ଠ ଥର ପାଇଁ ଅଣ୍ଡର -19 ବିଶ୍ୱକପ ଜିତିବା ଉଦ୍ଦେଶ୍ୟରେ ଟିମ୍ ଇଣ୍ଡିଆ ପଡିଆକୁ ଓହ୍ଲାଇବ । ଭାରତୀୟ ଦଳ ଅଣ୍ଡର -19 ବିଶ୍ୱକପକୁ 5 ଥର ରେକର୍ଡ ଜିତିଛି।

ତେବେ ଯଦି ଟିମ ଇଣ୍ଡିଆର ପ୍ରଦର୍ଶନ ଉପରେ ନଜର ଦେବା ତେବେ ଉଦୟ ସାହାରନଙ୍କ ନେତୃତ୍ୱରେ ଭାରତୀୟ ଦଳ ବାଂଲାଦେଶ ବିପକ୍ଷରେ ଅଭିଯାନ ଆରମ୍ଭ କରିଥିଲେ। ଏହା ପରେ ଟିମ୍ ଇଣ୍ଡିଆ ବାଂଲାଦେଶ, ଆୟର୍ଲାଣ୍ଡ, ଆମେରିକା, ନ୍ୟୁଜିଲ୍ୟାଣ୍ଡ, ନେପାଳ ଏବଂ ଦକ୍ଷିଣ ଆଫ୍ରିକାକୁ ପରାସ୍ତ କରିଛି। ଏହିପରି ଭାବରେ ଭାରତୀୟ ଦଳ ଟୁର୍ନାମେଣ୍ଟର କ୍ରମାଗତ 6 ଟି ମ୍ୟାଚ୍ ଜିତିଛି । ଏପରି ପରିସ୍ଥିତିରେ ଭାରତୀୟ ଦଳ ଅଷ୍ଟ୍ରେଲିଆକୁ ହରାଇ ଦିନିକିଆ ବିଶ୍ବକପର ପ୍ରତିଶୋଧ ନେବ ବୋଲି ଚର୍ଚ୍ଚା ଜୋର ଧରିଛି ।