କାହିଁକି ନବୀନଙ୍କ ଉପରେ ଅଧିକ କଠୋର ହୋଇ ପାରୁନାହାନ୍ତି ସୁନୀଲ ବଂଶଲ… ଜାଣନ୍ତୁ… ପଢନ୍ତୁ…
ଭୁବନେଶ୍ୱର : କେନ୍ଦ୍ରରେ ସଂଖ୍ୟାଗରିଷ୍ଠ ସରକାର। ଲୋକସଭାରେ ପୂର୍ଣ୍ଣ ବହୁମତ। ଇସାରା ଦେଲେ ସିବିଆଇ, ଇଡି ଏବଂ ଆୟକର ବିଭାଗ ଲମ୍ଫ ଦେଉଛନ୍ତି। ବିଜେଡିରେ ଅସନ୍ତୋଷ ରହିଛି। କେତେକ ନେତା ବିଜେଡି ଛାଡି ବିଜେପିରେ ଯୋଗ ଦେବାକୁ ଗୋଡ଼ ଟେକି ବସିଛନ୍ତି। ୟୁପି ଭଳି ବିରୋଟ ପ୍ରଦେଶ ଜିତାଇଥିବା ସୁନୀଲ ବଂଶଲ କିନ୍ତୁ ଓଡ଼ିଶାକୁ ନେଇ ଚିନ୍ତାରେ ଅଛନ୍ତି। ସେ ଯେଉଁ ରଣନୀତି ଆପଣାଇବାକୁ ଚାହୁଁଛନ୍ତି। ସେଥିରେ ତାଙ୍କୁ କେନ୍ଦ୍ର ଏବଂ ରାଜ୍ୟର ଆର୍ଥିକ ଶକ୍ତିଶାଳୀ ଥିବା ଗୋଷ୍ଠୀ ଠାରୁ ସହଯୋଗ କରିବ ନା ନାହିଁ, ସେ ସଂଶୟରେ ଅଛନ୍ତି।
କିଛିଦିନ ତଳେ ବିଜେପିର ରାଜ୍ୟ କାର୍ଯ୍ୟକାରିଣୀରେ ସେପରି କିଛି ଉତ୍ସାହ ଦେଖିବାକୁ ମିଳି ନ ଥିଲା। ମଣ୍ଡଳ ଏବଂ ରାଜ୍ୟ କାର୍ଯ୍ୟକର୍ତ୍ତା ନିୟମିତ ବୈଠକ ଭଳି ଅଂଶଗ୍ରହଣ କରିଥିଲେ। ତେଣୁ କିଛି ସ୍ପଷ୍ଟ ସଙ୍କେତ ମିଳି ନ ଥିଲା। ତେଣୁ ବିଜେଡି ମୁକ୍ତ ନାରା ଦେଇ ଗଣମାଧ୍ୟମକୁ ବାର୍ତ୍ତା ଦିଆଯାଇଥିଲା। ପରବର୍ତ୍ତୀ ସମୟରେ ଏହି ବିଜେଡି ମୁକ୍ତ ନାରାକୁ କେତେକ ନାପସନ୍ଦ କରିଛନ୍ତି। କଂଗ୍ରେସ ମୁକ୍ତ ନାରା କହି ବିଜେପି ଦକ୍ଷିଣ ଭାରତରୁ ମୁକ୍ତ ହୋଇଗଲାଣି। ତେଣୁ ଏହା ତରବରିଆ ଭାବେ ନିଆଯାଇଥିବା ଏକ ନିଷ୍ପତ୍ତି ବୋଲି ଜଣାପଡିଛି। ପ୍ରଚାର କମିଟି ଅଧ୍ୟକ୍ଷ ଭାବେ କେନ୍ଦ୍ର ମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଲବିରେ ରହିଛନ୍ତି। ମାତ୍ର ଅପରାଜିତା ଷଡଙ୍ଗୀ ମଧ୍ୟ ଏହି ପଦ ଦାବିଦାର ଅଛନ୍ତି। 18 ବିଧାୟକ ଓ 3 ସାଂସଦ ଏବଂ କିଛି କାର୍ଯ୍ୟକର୍ତ୍ତା ଶ୍ରୀ ପ୍ରଧାନଙ୍କ ସପକ୍ଷରେ ରହିଛନ୍ତି। ମାତ୍ର ଜୁଏଲ ଓରାମ, ପ୍ରତାପ ଷଡଙ୍ଗୀ, ସୁରେଶ ପୂଜାରୀ, ଜୟ ନାରାୟଣ ମିଶ୍ର, ମନମୋହନ ସାମଲ ଏବଂ ବୈଜୟନ୍ତ ପଣ୍ଡା ଶ୍ରୀମତୀ ଷଡଙ୍ଗୀଙ୍କୁ ପରୋକ୍ଷରେ ଚାହୁଁଛନ୍ତି। ତେଣୁ ବଂଶଲ କାହାକୁ ଅଧ୍ୟକ୍ଷ କରିବେ, ସେ ନେଇ ହରଡ଼ଘଣାରେ ପଡିଛନ୍ତି। ଆଗାମୀ ଦିନରେ ଜିଲ୍ଲା ସ୍ତରୀ.ୟ ସଂଗଛନ ପରିବର୍ତ୍ତନ ହେବାକୁ ଯାଉଛି। ଏଥିରେ ଧର୍ମେନ୍ଦ୍ର ଓ ଅପରାଜିତା ଗୋଷ୍ଠୀଙ୍କୁ ସମାନ ଭାବେ ଦାୟିତ୍ୱ ଦିଆଯିବ ବୋଲି ଜଣାପଡିଛି। ତେଣୁ ପ୍ରଚାର କମିଟି ଅଧ୍ୟକ୍ଷ ଓ ପରବର୍ତ୍ତୀ ଜିଲ୍ଲା କମିଟି ବଂଶଲଙ୍କ ମୁଣ୍ଡ ବିନ୍ଧାର କାରଣ ହୋଇଛି।
ଆଗାମୀ ଦିନରେ ବିଜେପି କିଛି ଅର୍ଡିନାନ୍ସ ଆଣିବାକୁ ଯାଉଛି। ଏହା ଲୋକସଭାରେ ପାସ୍ ହୋଇଯିବ। ମାତ୍ର ରାଜ୍ୟ ସଭାରେ 18ଟି ଭୋଟ ଦରକାର କରୁଛି। ବିଜେଡିର 9ଟି ଭୋଟ ରହିଛି। ବିଜେଡ଼ି ଭୋଟ ଦେଲେ କିମ୍ବା ଗୃହରେ ଅନୁପସ୍ଥିତ ରହିଲେ, ବିଜେପିକୁ ସୁହାଇବ। ବିଜେଡି ଚଳିତ ବର୍ଷ ଶେଷ ଆଡକୁ ଆଗୁଆ ନିର୍ବାଚନ କରିବାକୁ ଯାଉଛି। ତେଣୁ ସୁନୀଲ ବଂଶଲ ଟିକେ ଆକ୍ରମଣ ହେବାକୁ ଉଦ୍ୟତ ହେଲା ବେଳେ ମୋଦି-ଶାହ ..ଗୋ ସ୍ଲୋ ଅନ୍ ନବୀନ ବାବୁ ବଂଶଲଙ୍କୁ ଅକଳରେ ପକାଇଛି। ଦିଲ୍ଲୀ ସରକାର ବିରୋଧରେ ଆସିଥିବା ଅଧ୍ୟାଦେଶ ପ୍ରସଙ୍ଗରେ ମଧ୍ୟ ନବୀନ ବିଜେପିକୁ ସମାଲୋଚନା କରିନାହାନ୍ତି। ରାଷ୍ଟ୍ରପତି ଦ୍ରୌପଦୀ ମୁର୍ମୁ ମହୋଦୟାଙ୍କୁ ସଂସଦର ନୂତନ ବିଲ୍ଡି ଉଦଘାଟନକୁ ଡକାଯାଇନାହିଁ। ଏହି ପ୍ରସଙ୍ଗରେ ସବୁ ବିରୋଧି ଦଳ ମୋଦିଙ୍କୁ ସମାଲୋଚନା କରିସାରିଲେଣି। ମାତ୍ର ରାଜ୍ୟର ଅସ୍ମିତା ଓ ଭଉଣୀ ସ୍ୱାଭିମାନକୁ ଜଳାଞ୍ଜଳି ଦେଇ ନୀରବ ରହିଛନ୍ତି। ଏହି ସବୁ କାର୍ଯ୍ୟ ତଥା ସମର୍ପଣ ମୋଦି ଏବଂ ଶାହାଙ୍କୁ ନବୀନ ପ୍ରତି ନରମ କରିଥିବା ଆରଏସ୍ ଏସ୍ ସୂତ୍ରରୁ ପ୍ରକାଶ। ବିଜେପି ଉତ୍ସାହରେ ଭଟ୍ଟା ପଡ଼ିଥିବା ଗତ ଦିନିକିଆ କାର୍ଯ୍ୟକାରିଣୀରୁ ସ୍ପଷ୍ଟ ହୋଇଛି। ତେଣୁ ବଂଶଲ ତେଲେଙ୍ଗାନା ଓ ପଶ୍ଚିମବଙ୍ଗ ଭଳି ରାଜ୍ୟରେ ଅଧିକ ଫୋକସ କରିବାକୁ ନିଜର ନିକଟତମ ବନ୍ଧୁଙ୍କୁ କହିଲେଣି। ନବୀନ-ନରେନ୍ଦ୍ର ଦୋସ୍ତି ରାଜ୍ୟ ଭାଜପା ପାଇଁ କାଳ ବୋଲି ଶ୍ରୀ ବଂଶଲ ଅନୁଭବ କଲେଣି।
