ମାସକ ମଧ୍ୟରେ ୧୦ ରାଜ୍ୟସଭା ଆସନ ପାଇଁ ଭୋଟ, ପଶ୍ଚିମବଙ୍ଗରୁ ବିଜେପି ଖୋଲିବ ଖାତା
ନୂଆଦିଲ୍ଲୀ : ଚଳିତ ବର୍ଷ ଶେଷ ଆଡ଼କୁ ଛତିଶଗଡ଼ , ରାଜସ୍ଥାନ, ମଧ୍ୟ ପ୍ରଦେଶ, ତେଲେଙ୍ଗାନା ଏବଂ ମିଜୋରମରେ ବିଧାନସଭା ନିର୍ବାଚନ ହେବାକୁ ଯାଉଛି। ଏହା ପୂର୍ବରୁ ୩ ପ୍ରମୁଖ ରାଜ୍ୟରେ ରାଜ୍ୟସଭା ନିର୍ବାଚନ ଅନୁଷ୍ଠିତ ହେବ। ବିଜେପି ଶାସିତ ଗୁଜରାଟ, ଟିଏମସି ଶାସିତ ପଶ୍ଚିମବଙ୍ଗ, ଏବଂ ବିଜେପି ଶାସିତ ଗୋଆରେ ୧୦ ରାଜ୍ୟସଭା ଆସନ ଖାଲି ହେବାକୁ ଯାଉଛି। ନିକଟରେ ଏନେଇ ଆନୁଷ୍ଠାନିକ ବିଜ୍ଞପ୍ତି ମଧ୍ୟ ପ୍ରକାଶ ପାଇଛି।
ଏହି ସବୁ ସଦସ୍ୟମାନଙ୍କର ଆସନ୍ତା ଜୁଲାଇରୁ ଅଗଷ୍ଟ ମଧ୍ୟରେ କାର୍ଯ୍ୟକାଳ ଶେଷ ହେଉଛି। ଏହି ସଦସ୍ୟମାନେ ହେଉଛନ୍ତି- ବିନୟ ତେନ୍ଦୁଲକର (ଗୋଆ), ଦିନେଶଚନ୍ଦ୍ର ଜେମଲଭାଇ (ଗୁଜରାଟ), ଜୁଗଳସିଂହ ମାତଥୁର (ଗୁଜରାଟ), ଏସ୍ ଜୟଶଙ୍କର (ଗୁଜରାଟ), ଡେରେକ ଓବ୍ରାଏନ (ପଶ୍ଚିମବଙ୍ଗ), ଡୋଲା ସେନ (ପଶ୍ଚିମବଙ୍ଗ), ପ୍ରଦୀପ ଭଟ୍ଟାଚାର୍ଯ୍ୟ (ପଶ୍ଚିମବଙ୍ଗ), ସୁସ୍ମିତା ଦେବ (ପଶ୍ଚିମବଙ୍ଗ), ଶାନ୍ତା ଚ୍ଛେତ୍ରି (ପଶ୍ଚିମବଙ୍ଗ), ଶୁଖେନ୍ଦୁ ଶେଖର ରାୟ (ପଶ୍ଚିମବଙ୍ଗ)। ପଶ୍ଚିମବଙ୍ଗ ବିଜେପିର ୭୭ ସଦସ୍ୟଥିବାରୁ ପ୍ରଥମଥର ପାଇଁ ଏହା ରାଜ୍ୟରୁ ଜଣେ ବିଜେପି ନେତା ରାଜ୍ୟସଭା ଯାଇପାରିବେ।
ଆସନ୍ତା ଜୁଲାଇ ମାସ ୧୩ ତାରିଖ ଯାଏଁ ପ୍ରାର୍ଥୀପତ୍ର ଦାଖଲ କରାଯାଇପାରିବ। ଏହାର ପରଦିନତ ଅର୍ଥାତ ଆସନ୍ତା ୧୪ରେ ମନୋନୟନ ପତ୍ରଗୁଡ଼ିକ ଯାଞ୍ଚ ହେବ । ମନୋନୟନ ପତ୍ର ପ୍ରତ୍ୟାହାରର ଶେଷ ତାରିଖ ଜୁଲାଇ ୧୭ ରଖାଯାଇଛି। ଆବଶ୍ୟକ ପଡିଲେ ଜୁଲାଇ ୨୪ରେ ନିର୍ବାଚନ କରାଯିବ। ସେହିଦିନ ସକାଳ ୯ଟାରୁ ଅପରାହ୍ନ ୪ଟା ପର୍ଯ୍ୟନ୍ତ ଭୋଟ୍ ଗ୍ରହଣ ହେବ। ଭୋଟ ପରେ ଗଣତି କରାଯାଇ ଫଳାଫଳ ଘୋଷଣା କରାଯିବ। ପଶ୍ଚିମବଙ୍ଗରେ ଗୋଟିଏ ରାଜ୍ୟସଭା ଆସନରେ ଉପନିର୍ବାଚନ ହେବ ବୋଲି ଜଣାପଡିଛି।
