ଯୁବବର୍ଗ ଅର୍ଥନୈତିକ ବିକାଶର ନୂଆ ଆଶା : ଫିକି ଅଧ୍ୟକ୍ଷ ଶୁଭ୍ରକାନ୍ତ ପଣ୍ଡା

ଭୁବନେଶ୍ୱର : ଦେଶର ପ୍ରମୁଖ ବାଣିଜ୍ୟ କୈନ୍ଦ୍ରିକ ସଂସ୍ଥା ଫେଡେରେସନ୍ ଅଫ୍ ଇଣ୍ଡିଆନ୍ ଚାମ୍ବର ଅଫ୍ କମର୍ସ ଏଣ୍ଡ ଇଣ୍ଡଷ୍ଟ୍ରି(ଫିକି) ପକ୍ଷରୁ ଦୀର୍ଘ ୩୮ ବର୍ଷ ପରେ ଉତ୍ତର ପ୍ରଦେଶର ଲକ୍ଷ୍ମୌ ଠାରେ ଜାତୀୟ କାର୍ଯ୍ୟନିର୍ବାହୀ କମିଟି ବୈଠକ ଅନୁଷ୍ଠିତ ହୋଇଯାଇଛି।
ଏହି ବୈଠକରେ ଯୋଗ ଦେଇ ଉତ୍ତର ପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ରାଜ୍ୟର ରୂପାନ୍ତରଣ ସମ୍ପର୍କରେ ଉଲ୍ଲେଖ କରିଥିଲେ। ଶ୍ରୀ ଆଦିତ୍ୟନାଥ ବାଣିଜ୍ୟ ଅନୁକୂଳ ବାତାବରଣ ସୃଷ୍ଟି କରିବା , ଆଇନ୍ ଓ ଶୃଙ୍ଖଳା ପରିସ୍ଥିତି, ଉତ୍ତମ ନୀତି ଏବଂ ଭିତ୍ତିଭୂମି କ୍ଷେତ୍ରରେ ବୃହତ ପୁଞ୍ଜିନିବେଶ ସମ୍ପର୍କରେ ମତ ବ୍ୟକ୍ତ କରିଥିଲେ।
ସେହିପରି ଫିକିର ଅଧ୍ୟକ୍ଷ ଶୁଭ୍ରକାନ୍ତ ପଣ୍ଡା ନିଜ ବକ୍ତବ୍ୟରେ କହିଛନ୍ତି ଯେ, ଉତ୍ତର ପ୍ରଦେଶ ଦେଶର ସର୍ବ ବୃହତ ରାଜ୍ୟ ତଥା ତୃତୀୟ ବୃହତ ଅର୍ଥନୀତି , ଯେଉଁଠାରେ ଯୁବ ଜନସଂଖ୍ୟା ଅଧିକ ରହିଛି ଏବଂ ଏହା ଏକ ବୃହତ ଉପଭୋକ୍ତା କେନ୍ଦ୍ର ହେବାକୁ ଯାଉଛି। ବର୍ତ୍ତମାନ ସମୟରେ ଉତ୍ତର ପ୍ରଦେଶକୁ ପୁଞ୍ଜିନିବେଶର ସୁଅ ଜାରି ରହିଥିବାରୁ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥଙ୍କୁ ସେ ଧନ୍ୟବାଦ ଜଣାଇଥିଲେ। ମିଳିଥିବା ତଥ୍ୟ ଅନୁଯାୟୀ ବ୍ୟାଙ୍କ୍ ଏବଂ ଅନ୍ୟ ଆର୍ଥିକ ସଂସ୍ଥା ଦ୍ୱାରା ଅନୁମୋଦିତ ଅର୍ଥର ୧୬.୨% ଅଂଶ ଉତ୍ତର ପ୍ରଦେଶ ନିକଟରେ ରହିଥିବା ଶ୍ରୀ ପଣ୍ଡା ଉଲ୍ଲେଖ କରିଥିଲେ।