ଦେବୀ ମିଶ୍ରଙ୍କ ବିରୋଧରେ ଲଢିବେ ଏହି ଅବସରପ୍ରାପ୍ତ ସରକାରୀ ଅଧିକାରୀ
ଭୁବନେଶ୍ୱର : ୨୦୧୭ ପଞ୍ଚାୟତ ନିର୍ବାଚନରେ କଟକ ଜିଲ୍ଲାର ବଡମ୍ବା ନରସିଂହପୁରର ଏକାଧିକ ଜିଲ୍ଲା ପାରିଷଦ ଜୋନ୍ ବିଜେପି ହାତକୁ ଯାଇଥିଲା। ଏହି ଠାରୁ ଦେବୀ ପ୍ରସାଦ ମିଶ୍ରଙ୍କ ହାତରୁ ସଙ୍ଗଠନ ଖସୁଥିବା ଜଣାପଡିଥିଲା। ମାତ୍ର ନବୀନଙ୍କ ଲୋକପ୍ରିୟତା ଏବଂ ବିଜେପିର ଅପେକ୍ଷାକୃତ ଦୁର୍ବଳ ପ୍ରାର୍ଥୀ ଦେବୀ ମିଶ୍ରଙ୍କୁ ୨୦୧୯ ନିର୍ବାଚନ ବାତାବରଣ ଜିତାଇ ଆଣିଥିଲା। ମାତ୍ର ଏହା ପରେ ବିଭିନ୍ନ ତୃଣମୂଳ ସଭାରେ ଶ୍ରୀ ମିଶ୍ରଙ୍କୁ ଆକ୍ରମଣ କରାଯିବ, ଅପଦସ୍ତ କରାଯିବା ଦେଖିବାକୁ ମିଳିଥିଲା। ଜଣେ ଅଫିସରଙ୍କୁ ମୁଖ୍ୟମନ୍ତ୍ରୀ କହିଦେଇ ମଧ୍ୟ ଶ୍ରୀ ମିଶ୍ର ନିକଟରେ ସମାଲୋଚନାର ଶୀକାର ହୋଇଥିଲେ। ଆଗାମୀ ଲଢେଇ ତାଙ୍କ ପାଇଁ କଷ୍ଟ ହେବ ବୋଲି ସମୀକ୍ଷକମାନେ ମତ ରଖିଛନ୍ତି।
ବଡମ୍ବା-ନରସିଂହପୁର ଅଞ୍ଚଳରେ ବିଜେପି ଅବସରପ୍ରାପ୍ତ ଆଇଆରଏସ୍ ଅଧିକାରୀ ସମ୍ବିତ ତ୍ରିପାଠୀଙ୍କୁ ପ୍ରାର୍ଥୀ କରିବାକୁ ଯାଉଛି। ଅବସର ନେବା ପରେ ସେ ବନ୍ଧୁ ମିଳନ ଠାରୁ ଆରମ୍ଭ କରି ବିଭିନ୍ନ ସାମାଜିକ କାର୍ଯ୍ୟକ୍ରମ କରି ଆସୁଛନ୍ତି। ଦୀର୍ଘଦିନର ବ୍ୟବଧାନ ପରେ ଶ୍ରୀ ତ୍ରିପାଠୀ ନିଜ ସମର୍ଥକମାନଙ୍କ ସହ ବୁଧବାର ରାଜ୍ୟ କାର୍ଯ୍ୟାଳୟରେ ବିଜେପିରେ ମିଶିଛନ୍ତି। ସେ ଆଗାମୀ ନିର୍ବାଚନରେ ବିଧାୟକ ପ୍ରାର୍ଥୀ ହେବା ସୁନିଶ୍ଚିତ ବୋଲି ସୂତ୍ରରୁ ପ୍ରକାଶ। ବିଜେଡି ପକ୍ଷରୁ ବିଭିନ୍ନ ସର୍ଭେରେ ଦେବୀଙ୍କ ବିରୋଧରେ ଭୋଟ ବଢୁଥିବା ଜଣାପଡିଛି।
