ଦୁଇ ମିଶ୍ରଙ୍କୁ ଶୁଣାଇଲେ ଅରୁଣ ସାହୁ

ଭୁବନେଶ୍ୱର : ଓଡ଼ିଶା ବିଧାନସଭାର ଦୁଇ କୁହାଳିଆ ନେତା-ନରସିଂହ ମିଶ୍ର ଏବଂ ଜୟ ନାରାୟଣ ମିଶ୍ରଙ୍କୁ ବିଜେଡି ବିଧାୟକ ଅରୁଣ ସାହୁ ନିଆରା ଢଙ୍ଗରେ ସମାଲୋଚନା କରିଛନ୍ତି। ଶ୍ରୀ ସାହୁ  କହିଛନ୍ତି ଯେ,  ବିରୋଧୀଦଳର ନେତାମାନେ  ଜ୍ଞାନ ବାଣ୍ଟୁଛନ୍ତି କିନ୍ତୁ ଜ୍ଞାନ ଗ୍ରହଣ କରୁନାହାନ୍ତି । ବିଧାନସଭା ଜ୍ଞାନ ବିତରଣ ସଭା ନୁହେଁ, ଗୃହରେ ଯାହା ଚାହିଁବେ ତାହା କହିବେ । ଯେଉଁମାନେ ଅଭିଯୋଗ ଆଣୁଛନ୍ତି, ସେମାନଙ୍କ ମେଣ୍ଟାଲ ହେଲଥ(ମାନସିକ ସ୍ୱାସ୍ଥ୍ୟ) ଭଲ ନାହିଁ । ଯେଉଁମାନେ କହୁଛନ୍ତି ମୁଖ୍ୟ ଶାସନ ସଚିବ ଏବଂ ଉନ୍ନୟନ କମିଶନର ଯାଉନାହାନ୍ତି ତେବେ କୋଭିଡରେ କିଏ ଯାଉଥିଲେ।  ଆଣୁଥିବା ଅଭିଯୋଗର ସମ୍ପୂର୍ଣ ତଥ୍ୟ ନେଇକି ଆସିବାକୁ ଅରୁଣ ଆହ୍ୱାନ ଦେଇଛନ୍ତି ।

ଅରୁଣ ସାହୁ ଆହୁରି କହିଛନ୍ତି ଯେ, ୫-ଟି ହେଉଛି ଏକ ଚିନ୍ତାଧାରା । ଯିଏ ପ୍ରଭାବିତ ହୁଅନ୍ତୁ କି ନ ହୁଅନ୍ତୁ କିନ୍ତୁ ଦୁଇ ବିରୋଧୀ ମିଶ୍ର ବେଶୀ ପ୍ରଭାବିତ ହୋଇଛନ୍ତି । ୫-ଟିକୁ ଦୁଇ ମିଶ୍ର ପିଇ ଦେଇଛନ୍ତି । ୫-ଟି ପାଇଁ କଣ ହୋଇଛି ତାହା ଆଗ ନିଜ ନିର୍ବାଚନମଣ୍ଡଳୀର ବିକାଶକୁ ଦେଖି ଆସନ୍ତୁ । ଯଦି ୫-ଟି ଦ୍ୱାରା ତାଙ୍କ ଅଞ୍ଚଳରେ କିଛି ହୋଇନଥିବ ତେବେ ମୁଁ ରାଜନୀତିରୁ ସନ୍ନ୍ୟାସ ନେବି । ସୁସ୍ଥ ମସ୍ତିଷ୍କ ନେଇ ବିଧାନସଭା ଆସନ୍ତୁ, ବିରୋଧୀ ଏବେ ମେଣ୍ଟାଲ ହେଲଥ ଡ଼ିଜଅର୍ଡର ଅଛନ୍ତି ବୋଲି ଅରୁଣ ଶୂନ୍ୟକାଳରେ କହିଥିଲେ। ଯାହାକୁ ବାଦ୍ ଦେବା ପାଇଁ ବିଜେପି ନେତାମାନେ ଦାବି କରିବା ସହ ହୋ-ହାଲ୍ଲା କରିଥିଲେ।  

ଉଲ୍ଲେଖଯୋଗ୍ୟ, କଂଗ୍ରେସ ନେତା ନରସିଂହ ମିଶ୍ର ରାଜ୍ୟରେ ଗୁମାସ୍ତା ଶାସନ ଚାଲିଛି ବୋଲି କହିଥିଲେ। ସେହିପରି ବିଜେପି ବିଧାୟକ ଦଳ ନେତା ତଥା ବିରୋଧି ଦଳ ନେତା ଜୟ ନାରାୟଣ ମିଶ୍ର ଅଫିସର ରାଜ୍ ଓ 5-ଟି ଉପରେ ପ୍ରଶ୍ନ ଉଠାଇଥିଲେ।