ବରୀ ରାଜନୀତି ଚଳଚଞ୍ଚଳ : କେଉଁ ଦଳରୁ କିଏ ହେବ ପ୍ରାର୍ଥୀ…..ସଭିଏଁ ହେଉଛନ୍ତି ବାଉଳା…..
ଯାଜପୁର : ଯାଜପୁର ଜିଲ୍ଲାର ବରୀ ବିଧାନସଭା ନିର୍ବାଚନମଣ୍ଡଳୀର ରାଜନୈତିକ ପାଣିପାଗ ନେଇ ଅନିଶ୍ଚିତା ଜାରି ରହିଛି। ନିର୍ବାଚନ ପାଖେଇ ଆସୁଥିବାରୁ କେଉଁ ଦଳରୁ କିଏ ପ୍ରାର୍ଥୀ ହେବ, ସେ ନେଇ ଆଲୋଚନା ଆରମ୍ଭ ହୋଇ ଗଲାଣି। ଶାସକ ବିଜେଡି, ବିରୋଧି ବିଜେପି ଏବଂ କଂଗ୍ରେସରୁ କିଏ ପ୍ରାର୍ଥୀ ହେବ, ତାହା ଉପରେ ସମସ୍ତଙ୍କ ନଜର ରହିଛି। ମାତ୍ର ଶାସକ ଦଳ ବିଜେଡି ଆରମ୍ଭରୁ ଏହି ଆସନରେ ଲଗାତର ବିଜୟୀ ହୋଇ ଆସୁଛି। ତେଣୁ ବିଜେଡି ଟିକେଟ୍ କିଏ ହାତେଇବ, ତାହା ଉପରେ ସମସ୍ତଙ୍କ ନଜର ରହିଛି। ଗତଥର ଚାରି ଥର ବିଧାୟକ ହୋଇଥିବା ଦେବାଶିଷ ନାୟକଙ୍କ ଟିକେଟ୍ କଟାଯାଇ ଯାଦବ କୂଳ ବୋହୂ ସୁନନ୍ଦା ଦାସଙ୍କୁ ପ୍ରାର୍ଥିନୀ କରାଯାଇଥିଲା। ସେ ବିଜେପି ଛାଡି ଶେଷ ମୁହୂର୍ତ୍ତରେ ଶଙ୍ଖ ଚିହ୍ନରେ ଯୋଗ ଦେଇଥିଲେ। ସେହିପରି ପୂର୍ବରୁ କଂଗ୍ରେସ ଛାଡି ଥିବା ବିଶ୍ୱରଞ୍ଜନ ମଲ୍ଲିକ ବିଜେପିରୁ ପ୍ରାର୍ଥୀ ହୋଇଥିଲେ। କଂଗ୍ରେସରୁ ଉମେଶ ଜେନା ପ୍ରାର୍ଥୀ ହୋଇଥିଲେ।
ହେଲେ ବର୍ତ୍ତମାନ ପରିସ୍ଥିତିରେ ସବୁ ଦଳ ସମୀକରଣ ପରିବର୍ତ୍ତନ ହେବାରେ ଲାଗିଛି। ବିଶ୍ୱରଞ୍ଜନ ବିଜେପି ଛାଡି ବର୍ତ୍ତମାନ ବିଜେଡିରେ ଯୋଗ ଦେଇଛନ୍ତି। ସୁନନ୍ଦା ଦାସ ସକ୍ରିୟତାର ସହ ନିଜ କାର୍ଯ୍ୟ କରୁଛନ୍ତି। କଂଗ୍ରେସ ନେତା ମନୋଜ ମହାପାତ୍ର ବିଜେପିରେ ଯୋଗ ଦେଇଛନ୍ତି। ସେହିପରି ଉମେଶ ଜେନା ବର୍ତ୍ତମାନ ବିଜେପିରେ ଯୋଗଦାନ କରିଛନ୍ତି। ତେଣୁ କିଏ କେଉଁ ଦଳରୁ ଟିକେଟ୍ ପାଇବ ତାହା ଉପରେ ସମସ୍ତଙ୍କ ନଜର ରହିଛି। କଂଗ୍ରେସ ଟିକେଟ ନେଇ ଏତେଟା ଚର୍ଚ୍ଚା ନାହିଁ। ମାତ୍ର ପାଞ୍ଚ ରାଜ୍ୟର ବିଧାନସଭା ଫଳାଫଳ ପରେ ଯଦି ସମୀକରଣ ବଦଲେ, ତେବେ କଂଗ୍ରେସ ଇଣ୍ଡିଆ ମେଣ୍ଟର କେଉଁ ଏକ ଦଳକୁ ବରୀ ଆସନ ଛାଡିବ ବୋଲି ଜଣାପଡିଛି। ସେହି କ୍ରମରେ ପ୍ରାର୍ଥୀ ନେଇ କୌଣସି ପ୍ରାକ୍ ସୂଚନା ନାହିଁ। ମାତ୍ର ବିଜେପି ଟିକେଟ୍ ଦୌଡ଼ରେ , ଆଶୁତୋଷ ପରିଡ଼ା, ଉମେଶ ଜେନା ଏବଂ ମନୋଜ ମହାପାତ୍ର ରହିଛନ୍ତି। ତତ୍କାଳୀନ ପରିସ୍ଥିତି ଏବଂ ବିଜେଡି ଶିବିରିରେ ବିଦ୍ରୋହୀ ଗୋଷ୍ଠୀକୁ ଦେଖି ବିଜେପି ପ୍ରାର୍ଥୀ ସ୍ଥିର କରିବ। ଦଳ ପୂର୍ବ ବିଧାୟକ ଦେବାଶିଷ ନାୟକଙ୍କ ଗତିବିଧି ଉପରେ ମଧ୍ୟ ନଜର ରଖିଛି।
ବିଜେଡିର ପ୍ରଭାବଶାଳୀ ତଥା ମାଇନିଂ ଲବି ବିଶ୍ୱରଞ୍ଜନ ମଲ୍ଲିକଙ୍କ ସପକ୍ଷରେ ଥିବା ବେଳେ ସାମାଜିକ ସମୀକରଣ ସୁନନ୍ଦା ଦାସଙ୍କ ସପକ୍ଷରେ ରହିଛି। ତେଣୁ ଦୁଇ ଜଣ ଆଗାମୀ ଦିନରେ ପ୍ରାର୍ଥୀ ହେବା ସୁନିଶ୍ଚିତ। ମାତ୍ର ଦୁହିଁଙ୍କ ମଧ୍ୟରୁ କାହାକୁ ବିଜେଡି ଟିକେଟ୍ ଦେବ, ତାହା ଉପରେ ସମସ୍ତଙ୍କ ନଜର ରହିଛି। ଏହି ଦୁଇ ଜଣଙ୍କୁ ଯାହାକୁ ଟିକେଟ୍ ନ ମିଳିବ, ତନ୍ମଧ୍ୟରୁ ଜଣେ ସ୍ୱାଧୀନରେ ଲଢିବ ବୋଲି କୁହାଯାଉଛି। ମାତ୍ର ଉଭୟ ଗୋଷ୍ଠୀ ମତେ ଯଦି ଟିକେଟ୍ ଦିଆ ନ ଯାଏ, ତେବେ ଅପରପକ୍ଷରୁ ବି ଦିଆ ନ ଯାଉ ବୋଲି କହିଲେଣି। ଏହାକୁ ଦୃଷ୍ଟିରେ ରଖି ବିଜେଡି ନେତୃତ୍ୱ ଅନ୍ୟ ଦୁଇ ବିକଳ୍ପ ଉପରେ ମଧ୍ୟ ନଜର ରଖିଛି। ଏହି ଦୁଇ ବିକଳ୍ପ ହେଉଛନ୍ତି-ରାଜ୍ୟସଭା ସାଂସଦ ସୁଲତା ଦେଓ ଏବଂ ବିଜେଡି ଅନ୍ୟତମ ସୁସଙ୍ଗଠକ ବିଜୟ ନାୟକ। ଡିସେମ୍ବର ପରେ ଏହି ଚିତ୍ରରେ ଆହୁରି ସ୍ପଷ୍ଟତା ଆସିବ ବୋଲି ଜଣାପଡିଛି।
