ଚିନ୍ତାରେ ବିଜେଡି-ପୂର୍ବ ନିର୍ବାଚନ ଅପେକ୍ଷା ନିଜକୁ ଦୁର୍ବଳ ମନେ କରୁଛନ୍ତି ଦଳ ପରିଚାଳକ
ଭୁବନେଶ୍ୱର : ରାଜନୀତି ଶତ ସମ୍ଭାବନାର ତୀର୍ଥକ୍ଷେତ୍ର। ଏହି ଉକ୍ତିଟି ଗତକାଲିର ନିର୍ବାଚନ ଫଳାଫଳ ପରେ ପୁଣି ପ୍ରମାଣିତ ହୋଇଛି। ନିର୍ବାଚନ ପୂର୍ବର ଅଙ୍କ କଷା, ନିର୍ବାଚନ ସମୟର ରଣନୀତି ଏବଂ ଭୋଟ ଗଣତି ଆକାଶ ପାତାଳ ଫରକ ହୋଇପାରେ। ଦୀର୍ଘଦିନ ଧରି ରହିଥିବା ଏକ ମତକୁ ଆସନ୍ନା ନିର୍ବାଚନ ପରିବେଶରେ କଠିନ ପରିଶ୍ରମ ଓ ଉପଯୁକ୍ତ ରଣନୀତି ଦ୍ୱାରା ବଦଳାଇ ଦିଆଯାଇପାରେ। ରାଜସ୍ଥାନ ଓ ତେଲେଙ୍ଗାନାର ଫଳାଫଳ ସାଧାରଣ ଭାବେ ଦୃଶ୍ୟମାନ ହେଉଛି। ହେଲେ ଛତିଶଗଡ଼ର ଫଳାଫଳ ଓଡ଼ିଶାର ରାଜନୈତିକ ବର୍ଗକୁ ଆଶ୍ଚର୍ଯ୍ୟଚକିତ କରିଛି। ବିଶେଷ କରି ଏହି ଫଳାଫଳକୁ ନେଇ ବିଜେଡି ଚିନ୍ତାଗ୍ରସ୍ତ ହୋଇଛି।
ରବିବାର ଫଳାଫଳ ବାହାରିବା ପରେ ରାଜ୍ୟ ପ୍ରଶାସନିକ ବର୍ଗର ପ୍ରମୁଖ ଅଧିକାରୀ ମାନେ ଜୁମ୍ କଲ୍ ଏବଂ ନବୀନ ନିବାସରେ ବସି ବିଭିନ୍ନ ତର୍ଜମା କରିଥିବା ବିଶେଷ ସୂତ୍ରରୁ ପ୍ରକାଶ। ଏହା ବିଜେଡି ପାଇଁ ଶୁଭ ସୂଚନା ନୁହେଁ ବୋଲି ଅଧିକାରୀ ଏବଂ ଦଳ ପରିଚାଳନା କରୁଥିବା ବ୍ୟକ୍ତିବିଶେଷ ଅନୁଭବ କରୁଛନ୍ତି। ତେଲେଙ୍ଗାନାରେ କଂଗ୍ରେସ ଯଦି କେସିଆରକୁ ପରାସ୍ତ କରିପାରିଲା। କେସିଆର ଅନେକ ଯୋଜନା କରିଥିଲେ । ମାତ୍ର ବିଧାୟକମାନଙ୍କ ବିରୋଧୀ ମତ ସମଗ୍ର ସରକାର ବିରୋଧରେ ଗଲା। କାଳେ ଏହି ବିଧାୟକ କଂଗ୍ରେସ ଓ ବିଜେପି ପଳେଇଯିବେ, ସେଥିପାଇଁ ସେ କିଛି ବିଧାୟକଙ୍କ ଟିକେଟ୍ କାଟି ପାରିଲେ ନାହିଁ। ପୂର୍ବ ସମସ୍ତ ନିର୍ବାଚନ ଅପେକ୍ଷା ବିଜେଡି ଦଳର ଶୀର୍ଷ ନେତୃତ୍ୱ ଦୁର୍ବଳ ଅବସ୍ଥାରେ ରହିଛି। ତେଣୁ ବହୁ ବିଧାୟକ ଟିକେଟ୍ ନ ପାଇଲେ ବିଜେପି ଯିବାକୁ ଆଦୌ କୁଣ୍ଠାବୋଧ କରିବେ ନାହିଁ। ଉପକୂଳ ଓଡ଼ିଶାର 25 ଆସନରେ ଦଳକୁ କଡ଼ା ମୁକାବିଲାର ସମ୍ମୁଖୀନ ହେବାକୁ ପଡୁଛି। ଏହି ଆସନରେ ନୂତନ ପ୍ରାର୍ଥୀ ଦେବା ପୁରାତନଙ୍କୁ ବିଦ୍ରୋହୀ କରିବ। ସେହିପରି ସେହି ପୁରୁଣାଙ୍କୁ ଦେଲେ ନୂତନ ପ୍ରାର୍ଥୀ ୫ରୁ ୮ ହଜାର ଭୋଟ କାଟିବାର ଦକ୍ଷତା ରଖୁଛନ୍ତି। ତେଣୁ ବିଜେଡି ନେତୃତ୍ୱଙ୍କ ପାଇଁ ଏଣୁ ମାଇଲେ ଗୋ ହତ୍ୟା-ତେଣୁ ମାଇଲେ ବ୍ରହ୍ମ ହତ୍ୟା ସଦୃଶ ହୋଇଛି। ଅଧିକ ବୁଝିବା ପାଇଁ ଆପଣ ଭଦ୍ରକ ଜିଲ୍ଲାର ଧାମନଗର ମଡେଲକୁ ଉଦାହରଣ ଭାବେ ନେଇ ପାରନ୍ତି।
ନବୀନ ପଟ୍ଟନାୟକ ସାଧାରଣତଃ ଧର୍ମ, ଜାତି ରାଜନୀତି କରନ୍ତି ନାହିଁ। ବିଭିନ୍ନ ଯୋଜନାକୁ ନେଇ ବିକାଶ ରାଜନୀତି ସ୍ଲୋଗାନ ଦେଇଥାନ୍ତି। ଓଡ଼ିଶା ଠାରୁ ବହୁତ ଭଲ ଯୋଜନା ଛତିଶଗଡ଼ ଏବଂ ତେଲେଙ୍ଗାନାରେ ରହିଥିଲା। ମାତ୍ର ସେଠାରେ ଲୋକପ୍ରିୟ ସରକାର ହାରିଗଲା। ତେଣୁ ଦୁଇ ଜାତୀୟ ଦଳ ସେହି ରଣନୀତି ଓଡ଼ିଶାରେ ଆପଣେଇଲେ, ବିଜେଡି ଅକଳରେ ପଡିବ ବୋଲି କଟକ ଜିଲ୍ଲାର ଜଣେ ବିଧାୟକ ନିଜ ନାମ ଗୋପନ ରଖି ମତ ଦେଇଛନ୍ତି। ନବୀନ ପଟ୍ଟନାୟକଙ୍କ ବିକଳ୍ପ କିଏ ବୋଲି ବିଜେଡି ପ୍ରଶ୍ନ କରିଥାଏ। ମାତ୍ର ପୂର୍ବରୁ ତ୍ରିପୁରାରୁ ଲୋକପ୍ରିୟ ମୁଖ୍ୟମନ୍ତ୍ରୀ ମାଣିକ ସରକାର ହାରିସାରିଛନ୍ତି। ବିଜେପି ନିକଟରେ ଜିତିଥିବା ତିନୋଟି ରାଜ୍ୟରେ କେହି ମୁଖ୍ୟମନ୍ତ୍ରୀ ଚେହେରା ନଥିଲେ। ତେଣୁ ଉପଯୁକ୍ତ ରାଜନୈତିକ ବାର୍ତ୍ତା ଓ ବିଜେଡିକୁ ଚିତପଟାଙ୍ଗ କରିପାରେ ବୋଲି ରାଜନୈତିକ ସମୀକ୍ଷକ ମତ ଦେଇଛନ୍ତି।
ତିନି ରାଜ୍ୟରେ କଂଗ୍ରେସର ପରାଜୟ ଦ୍ୱାରା ଓଡ଼ିଶାରେ ଦଳର ଭୋଟ ହାର ହ୍ରାସ ପାଇବ। ବହୁ କଂଗ୍ରେସ ନେତା ବର୍ତ୍ତମାନ ବିଜେଡି ଅପେକ୍ଷା ବିଜେପି ଯିବା ପାଇଁ ଅଧିକ ପସନ୍ଦ କରୁଛନ୍ତି। ଜଣେ ବରିଷ୍ଠ କଂଗ୍ରେସ ନେତାଙ୍କ ପୁଅ ବିଜେପି ଯିବା ପାଇଁ ପ୍ରାଥମିକ କଥାବାର୍ତ୍ତା ଆରମ୍ଭ କରିସାରିଲେଣି। ଉପକୂଳ ଓଡ଼ିଶାରୁ ଗତଥର ଜିତିଥିବା ଦୁଇ ବିଧାୟକ ବିଜେପି ଲିଙ୍କ୍ ରେ ରହିଲେଣି। ତେଣୁ ସ୍ୱତଃପ୍ରବୃତ୍ତ ଭାବେରେ ବିଜେଡି ବିରୋଧୀ ଭୋଟ ବିଜେପିକୁ ଯିବା ଏକ ପ୍ରକାଶ ନିଶ୍ଚିତ ହୋଇଗଲାଣି। ମାତ୍ର ରାଜନୀତିରେ ଶେଷ ରଣନୀତି ବି ଅଙ୍କ ବିଗାଡି ଦେଇପାରେ। ମାତ୍ର ସାମ୍ପ୍ରତିକ କଂଗ୍ରେସ ନେତୃତ୍ୱ ସେପରି କିଛି କରିପାରିବ ବୋଲି ସେ ବିଶ୍ୱାସ ନାହିଁ। ତେଣୁ ଦ୍ୱିମୁଖୀ ଲଢେଇ ଏବଂ ବିଜେଡିର ବିଦ୍ରୋହୀ ପ୍ରାର୍ଥୀ ବିଜେପିର ବିଧାନସଭା ଆସନ ସର୍ବନିମ୍ନ ୪୦ ନିଶ୍ଚୟ କରିବ ବୋଲି ମନ୍ତ୍ରୀ ହୋଇ ପାରି ନ ଥିବା ଜଣେ କଟକ ବିଜେଡି ବିଧାୟକ ଓଡ଼ିଶା ପତ୍ରିକାକୁ କହିଛନ୍ତି। ଯଦି କେନ୍ଦ୍ରୀୟ ବିଜେପି କେନ୍ଦ୍ରୀୟ ସଂସ୍ଥାର ଅପ ବ୍ୟବହାର କରେ, ତେବେ ବିଜେଡିରେ କୋକୁଆ ଭୟ ହୋଇପାରେ। ଏହି ସବୁ ଚିନ୍ତା ବର୍ତ୍ତମାନ ବିଜେଡିକୁ ଘାରିଥିବା ଜଣାପଡିଛି।
