ବିଜେପିର ଟିନ୍ତା ବଢାଉଛି ଏହି ରାଜ୍ୟର ନିର୍ବାଚନୀ ସର୍ଭେ, ସବୁ କାଣ୍ଡ ପରେ ବଢୁନି ଆସନ…ବିହାର ଓ ମହାରାଷ୍ଟ୍ରରେ ସିଟ୍ ଆବଣ୍ଟନକୁ ନେଇ ମୁଣ୍ଡ ଟେକିବ ବିବାଦ..
ନୂଆଦିଲ୍ଲୀ : ମହାରାଷ୍ଟ୍ରରେ ଶିବସେନା ଭାଙ୍ଗିଲା, ଏନସିପି ଦୁଇ ଭାଗ ହୋଇଗଲା। ବିହାରରେ ନୀତିଶ କୁମାରଙ୍କୁ ଛାଡି ଉପେନ୍ଦ୍ର କୁଶଓ୍ୱା ଏବଂ ଜିତନରାମ ମାଝୀ ଏନଡିଏକୁ ଆସିଲେ। ପଶ୍ଚିମବଙ୍ଗରେ ମମତା ବାନାର୍ଜୀଙ୍କ ପୁତୁରା ଓ ପୁତୁରା ବୋହୂଙ୍କୁ ଇଡି ଜେରା କଲା , ମାତ୍ର ଏହାର କୌଣସି ସୁଫଳ ବିଜେପିର ଶୀର୍ଷ ନେତୃତ୍ୱ ଦେଖିବାକୁ ପାଉନାହିଁ। ଦଳ ପକ୍ଷରୁ କରାଯାଇଥିବା ନିଜସ୍ୱ ସର୍ଭେରୁ ଏନେଇ ସ୍ପଷ୍ଟ ସଙ୍କେତ ଆସିଛି। ଯାହା ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଏବଂ ଗୃହ ମନ୍ତ୍ରୀ ଅମିତ ଶାହାଙ୍କ ଚିନ୍ତା ବଢାଇ ଦେଇଛି।
ମୋଦି-ଶାହାଙ୍କ ଚିନ୍ତା ବଢାଇଥିବା ଚାରଟି ରାଜ୍ୟ ଗୁଡିକ ହେଉଛି- ପଶ୍ଚିମବଙ୍ଗ, ବିହାର, ମହାରାଷ୍ଟ୍ର ଏବଂ କର୍ଣ୍ଣାଟକ। ଏହି ରାଜ୍ୟରେ ମୋଟ ୧୫୮ଟି ଲୋକସଭା ଆସନ ରହୁଛି। ଗତ ଥର ବିଜେପି ଏଠାରୁ ୧୨୪ଟି ଆସନ ଜିତିପାରିଥିଲା। ଯାହା ମଧ୍ୟରେ ପଶ୍ଚିମବଙ୍ଗରୁ ୧୮ଟି, ବିହାରରରୁ ୩୯ଟି, ମହାରାଷ୍ଟ୍ରରେ ୪୧ଟି ଏବଂ କର୍ଣ୍ଣାଟକର ୨୬ଟି ଆସନ ରହିଥିଲା। ମାତ୍ର ଚଳିତ ଥର ବିଜେପି ଏତେ ଆସନ ଜିତିପାରିବ ନାହିଁ ବୋଲି ଖୋଦ୍ ବିଜେପି ଏବଂ ଆରଏସଏସର ନିଜସ୍ୱ ସର୍ଭେକ୍ଷଣ ସଂସ୍ଥା କହିଛି।
ସର୍ଭେକ୍ଷଣକୁ ବାଦ୍ ଦେଲେ ଆସନ ଭାଗବଣ୍ଟା କାରଣରୁ ବିଜେଡି ଅକଳରେ ପଡିବାକୁ ଯାଉଛି। ମହାରାଷ୍ଟ୍ରରେ ଏଥିପାଇଁ ସବୁଠୁ ବଡ଼ ଅସୁବିଧା ହେବାକୁ ଯାଉଥିବା ସ୍ଥାନୀୟ ନେତୃତ୍ୱ ଜଣାଇଦେଇଛି। ଗତଥର ଶିବସେନା ସହ ଆସନ ଭାଗ କରିବାକୁ ପଡିଥିଲା। ବର୍ତ୍ତମାନ ବିଜେପି ନିଜ ଆସନରୁ ଶିବସେନାର ସିନ୍ଧେ ଗ୍ରୁପ୍ ଏବଂ ଏନସିପି ବିଭାଜନ ପରେ ଆସିଥିବା ଅଜିତ ପା୍ୱାରଙ୍କ ଗ୍ରୁପ୍ ଆସନ ଦେବାକୁ ପଡିବ। ସେହିପରି କେନ୍ଦ୍ରରେ ଏନଡିଏରେ ଥିବା ଆରପିଆଇ ନେତା ରାମଦାସ ଅଠାଓ୍ୱାଲେ ମଧ୍ୟ ଆସନ ଦାବି କଲେଣି। ତେଣୁ ବିଜେପି କାହାକୁ କେତେ ଆସନ ଦେବ, ସେନେଇ ଅକଳରେ ପଡିଗଲାଣି। ଅନୁରୂପ ସ୍ଥିତି ବିହାରରେ ମଧ୍ୟ ଉପୁଜିଲାଣି। ବିହାରରେ ନୀତିଶ କୁମାର ଯିବା ପରେ ଉପେନ୍ଦ୍ର କୁଶଓ୍ୱା , ଜିତନରାମ ମାଝୀ, ମୁକେଶ ସୈନୀ ବିଜେପି ମେଣ୍ଟକୁ ଫେରିଛନ୍ତି। ଏହି ତିନିଟି ଗ୍ରୁପକୁ ଆସନ ଦେବା ଏନଡିଏ ପାଇଁ କାଠିକର ପାଠ ହେବାକୁ ଯାଉଛି। ସେହିପରି ଏଲଜେପି ପାର୍ଟି ଦୁଇ ଭାଗରେ ବିଭକ୍ତ ହୋଇଛି। କେଉଁ ଗ୍ରୁପକୁ କେତେ ପରିମାଣରେ ଆସନ ଦିଆଯିବ, ତାହା ବିଜେପିର ମୁଣ୍ଡବିନ୍ଧାର କାରଣ ହୋଇଛି। ଗତଥର ପଶ୍ଚିମବଙ୍ଗ ଓ କର୍ଣ୍ଣାଟକରେ ମିଳିଥିବା ଆସନ ହ୍ରାସ ପାଇବ ବୋଲି ମଧ୍ୟ ବିଜେପିର ଆଭ୍ୟନ୍ତରୀଣ ସର୍ଭେକ୍ଷଣରୁ ଜଣାପଡିଛି। ଯଦି ଏହି ଚାରି ରାଜ୍ୟରୁ ୫୦ ଆସନ କମିବ, ତେବେ ବିଜେପି ନିଜ ବଳରେ ସଂଖ୍ୟାଗରିଷ୍ଠତା ପ୍ରମାଣ କରିବା କାଠିକର ହେବ ବୋଲି ବିଶେଷଜ୍ଞମାନେ ମତ ଦେଇଛନ୍ତି।
