ବଢୁଛି ଗୋଷ୍ଠୀ କନ୍ଦଳ, ଇସ୍ତଫା ଦେଇ ନେତୃତ୍ୱ ନିଷ୍ପତ୍ତିକୁ ବିରୋଧ କଲେ ବିଜେଡି ବିଧାୟକ !

ତେଲକୋଇ :  କେନ୍ଦୁଝର ଜିଲ୍ଲା ତେଲକୋଇ ବିଧାନସଭା ନିର୍ବାଚନମଣ୍ଡଳୀରେ ବିଜେଡି ଦୁଇ ଫାଳ । ଗୋଷ୍ଠୀ କନ୍ଦଳ ଏତେ ତୀବ୍ର ହୋଇଛି ଯେ ବିଧାୟକ ପ୍ରେମାନନ୍ଦ ନାଏକ ଇସ୍ତଫା ଦେଇଥିବା କଥା ଚର୍ଚ୍ଚା ହେଲାଣି। ଖଣି ଲୁଟ୍ କାରବାର ଭୂସ୍ୱର୍ଗ କେନ୍ଦୁଝରର ଏହି ଖବର ରାଜଧାନୀର ପାଓ୍ୱାର କରିଡ଼ରରେ ଗୁଞ୍ଜରଣ ସୃଷ୍ଟି କରିଛି। ମାତ୍ର ପ୍ରମୁଖ ଓ କ୍ଷୁଦ୍ର ଗଣମାଧ୍ୟମକୁ ଶ୍ରୀମନ୍ଦିର ପରିକ୍ରମା ପ୍ରକଳ୍ପ ବିଜ୍ଞାପନ ଏହି ଖବରକୁ ଶୀତଳଭଣ୍ଡାରକୁ ଠେଲି ଦେଇଛି। ତେଲକୋଇ ରାଜନୀତି ଦୁଇ ବିନ୍ଦୁ ଅମୂଲ୍ୟ କଅଁର ଏବଂ  ପ୍ରେମାନନ୍ଦ ନାଏକ। ଏହି ସବୁ ନେତୃତ୍ୱ ବାଦ୍ ନିକଟରେ ବିଜେଡିରେ ସାମିଲ ହୋଇଥିବା ଧନୁର୍ଜୟ ସିଧୁ ମଧ୍ୟ ବିବାଦର ଅନ୍ୟ ଏକ ଅଂଶବିଶେଷ। ତାଙ୍କୁ ଆର୍ଥିକ ଭାବେ ସମୃଦ୍ଧ ଥିବା ଜଣେ ବାହୁବଳୀ ବିଜେଡି ନେତା ଦଳରେ ସାମିଲ କରାଇଛନ୍ତି। ଗତ ନିର୍ବାଚନରେ ପ୍ରେମାନନ୍ଦ ନାଏକଙ୍କୁ ବିଜେଡି ପ୍ରାର୍ଥୀ କରିଥିଲା। ସେ ବିଜୟୀ ମଧ୍ୟ ହୋଇଥିଲେ। ଏଥିରେ ଅମୂଲ୍ୟ କଅଁରଙ୍କ ମଧ୍ୟ ବିଶେଷ ଭୂମିକା ରହିଥିଲା। ମାତ୍ର ଇତି ମଧ୍ୟରେ କେନ୍ଦୁଝର ଖଣିରୁ କେତେ ଲୁହାପଥର ଟ୍ରକ୍ ଯୋଗେ ପାରାଦୀପ ଚାଲିଗଲାଣି। ଧନୁର୍ଜୟ ସିଧୁଙ୍କ ଯୋଗଦାନ ଦିନ ପ୍ରେମାନନ୍ଦ ନାଏକ ଉପସ୍ଥିତ ରହିଥିଲେ। ମାତ୍ର ପରବର୍ତ୍ତୀ ସମୟରେ ଏହାକୁ ବିରୋଧ ସ୍ୱରୂପ ବିଧାୟକ ପଦରୁ ଇସ୍ତଫା ଦେଇଥିବା ଚର୍ଚ୍ଚା ହେଉଛି। ଏହି ଜିଲ୍ଲାର ପର୍ଯ୍ୟବେକ୍ଷକ ଭାବେ ପ୍ରଣବ ପ୍ରକାଶ ଦାସ କାର୍ଯ୍ୟ କରୁଛନ୍ତି। ପ୍ରତ୍ୟକ୍ଷ ଭାବେ ସେ ସମୟ ଦେଇପାରୁନାହାନ୍ତି। ସୁବ୍ରତ ଛାଟୋଇଙ୍କ ଜରିଆରେ ସାଙ୍ଗଠନିକ ତତ୍ତ୍ୱାବଧାନ କାମ ଜାରି ରହିଛି। ମାତ୍ର ତେଲକୋଇକୁ ନେଇ ଗୁଇନ୍ଦା ଏବଂ ବେସରକାରୀ ଏଜେନ୍ସିଂର ରିପୋର୍ଟ ବିଜେଡି ସୁପ୍ରିମୋଙ୍କ ମୁଣ୍ଡବିନ୍ଧାର କାରଣ ହୋଇଛି। ସାମାଜିକ ସମୀକରଣ ଦୃଷ୍ଟିରୁ ପ୍ରେମାନନ୍ଦ ଏବଂ ଅମୂଲ୍ୟଙ୍କୁ ପୂର୍ଣ୍ଣଭାବେ ବାଦ୍ ଦିଆଗଲେ ବିଜେଡି କ୍ଷତିଗ୍ରସ୍ତ ହେବ ବୋଲି ଆଶଙ୍କା କରାଯାଉଛି।ଏହି ନିଷ୍ପତ୍ତିକୁ ବିରୋଧ କରି ଦୁଇ ଡର୍ଜନରୁ ଅଧିକ ପଞ୍ଚାୟତ ପ୍ରତିନିଧି ମଧ୍ୟ ଇସ୍ତଫା ଦେଇଥିବା ଚର୍ଚ୍ଚା ହେଉଛି।