ସାଲେପୁର ପାଇଁ ନୂଆ ପ୍ରାର୍ଥୀ ଖୋଜିଲାଣି ବିଜେଡି, ଯୁବ ଚେହେରା ଚିନ୍ମୟ ସାହୁଙ୍କୁ ନେଇ କ’ଣ ଆସିଛି ସର୍ଭେ ରିପୋର୍ଟ

କଟକ : ରାଜ୍ୟର ସବୁ ପ୍ରମୁଖ ରାଜନୈତିକ ଦଳ ୨୦୨୪ ନିର୍ବାଚନ ପାଇଁ ପ୍ରସ୍ତୁତି ଆରମ୍ଭ କରିସାରିଲେଣି । ରାଜ୍ୟରେ ଅନ୍ୟ ସବୁ ଦଳ ଅପେକ୍ଷା ବିଜେଡିର ପ୍ରସ୍ତୁତି ଜୋରଦାର ରହିଛି। ବିଭିନ୍ନ ସଂସ୍ଥା ପକ୍ଷରୁ ଆସିଥିବା ସର୍ଭେକ୍ଷଣରେ ବିଜେଡି ଏବଂ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ନାଁରେ ପ୍ରତି ନିର୍ବାଚନମଣ୍ଡଳୀରେ ୪୦ରୁ ୫୦ ହଜାର ସ୍ୱତନ୍ତ୍ର ଭୋଟ ରହିଥିବା ଜଣାପଡିଛି। ରାଜ୍ୟରେ ଏମିତି ବହୁ ଆସନ ରହିଛି, ଯେଉଁଠି ସାମାନ୍ୟ ବିଜେଡି ଟିକେଟ୍ ହିଁ ବିଜୟ ସୁନିଶ୍ଚିତ କରିପାରୁଛି। ଏହାର ଏକ ପ୍ରାଥମିକ ତାଲିକା ତୃତୀୟ ମହଲା ପକ୍ଷରୁ ପ୍ରସ୍ତୁତ କରାଯାଇଛି। ଏହି ସବୁ ଆସନରେ ନୂଆ ଏବଂ ଅପେକ୍ଷାକୃତ ଯୁବ ପ୍ରାର୍ଥୀ ଦେବା ପାଇଁ ରଣନୀତି ପ୍ରସ୍ତୁତ କରାଯାଉଛି। ନବୀନ ପଟ୍ଟନାୟକ ଏବଂ ବିଜେଡିର ଭୋଟ ବ୍ୟାଙ୍କ୍ ଥିବା ନିର୍ବାଚନମଣ୍ଡଳୀରେ କାକଟପୁର,ନିମାପଡ଼ା, ଭୁବନେଶ୍ୱର-ଉତ୍ତର, ନିଆଳି, କଟକ-ଚୌଦାର ଏବଂ ସାଲେପୁର ଭଳି ନିର୍ବାଚନମଣ୍ଡଳୀ ରହିଛି। ପ୍ରାୟ ସପ୍ତାହ ତଳେ ସାଲେପୁର ନିର୍ବାଚନ ମଣ୍ଡଳୀରେ ନୂଆ ପ୍ରାର୍ଥୀତ୍ୱ ଦେବା ନେଇ ଏକ ଚର୍ଚ୍ଚା ଆରମ୍ଭ ହୋଇଛି। ସାଲେପୁର ନିର୍ବାଚନ ମଣ୍ଡଳୀ ବିଜୁ ଜନତା ଦଳର ଗଡ ହୋଇଥିବା ବେଳେ ଏହା କେନ୍ଦ୍ରାପଡ଼ା ସଂସଦୀୟ କ୍ଷେତ୍ର ଅଧୀନରେ ଆସୁଛି, ଏବଂ କେନ୍ଦ୍ରାପଡ଼ା ସଂସଦୀୟ କ୍ଷେତ୍ର ସବୁବେଳେ ଅଣ କଂଗ୍ରେସର ଗଡ ଭାବେ ପରିଚିତ । ଏଠାରେ ସଂଖ୍ୟାଲଘୁ ଭୋଟରଙ୍କ ସଂଖ୍ୟା ଅଧିକ ରହିଥିବା ବେଳେ ସଂଖ୍ୟାଲଘୁ ସମ୍ପ୍ରଦାୟର ଭୋଟ ସଦାସର୍ବଦା ବିଜୁ ଜନତା ଦଳ ସପକ୍ଷରେ ରହିଛି।

ବର୍ତ୍ତମାନ ସାଲେପୁର ବିଜୁ ଜନତା ଦଳର ବିଧାୟକ ଥିବା ପ୍ରଶାନ୍ତ ବେହେରାଙ୍କ ରାଜନୈତିକ କାର୍ଯ୍ୟକଳାପରେ ଏତୋ ସକ୍ରିୟତା ନଜର ଆସୁ ନ ଥିବା ରିପୋର୍ଟ ଆସିଛି। ପୂର୍ବାପେକ୍ଷା ଲୋକପ୍ରିୟତା ସାମାନ୍ୟ ହ୍ରାସ ପାଇଛି। ଏଭଳି ସ୍ଥଳେ ବିଜୁ ଜନତା ଦଳ ସାଲେପୁର ପାଇଁ ଯୁବ ଚେହେରାଙ୍କୁ ପ୍ରାର୍ଥୀ କରିବାକୁ ବିଚାରବିମର୍ଶ ଆରମ୍ଭ କରିଛି। ଏହି କ୍ରମରେ ସଂଖ୍ୟାଲଘୁ ଏବଂ ପଛୁଆବର୍ଗ ଭୋଟକୁ ଆକର୍ଷିତ କରିବା ପାଇଁ କେତେକ ନାଁ ଉପରେ ବିଶେଷ ଭାବେ ଆଲୋଚନା କରୁଛି। ଏହି କ୍ରମରେ  ଚିନ୍ମୟ ସାହୁଙ୍କ ନାଁକୁ ନେଇ ବିଚାରବିମର୍ଶ ଆରମ୍ଭ କରାଯାଇଛି।  ସାଲେପୁର ନିର୍ବାଚନ ମଣ୍ଡଳୀରୁ ନମୁନା ସଂଗ୍ରହ କରାଯାଇ ତାଙ୍କ ପ୍ରାର୍ଥୀତ୍ୱକୁ କିପରି ଗ୍ରହଣ କରାଯାଉଛି, ସେ ନେଇ ମତାମତ ସଂଗ୍ରହ କରାଯାଇଥିଲା। ଅଧିକାଂଶ ମତ ଦେଇଛନ୍ତି ଯେ, ଯଦି ଦଳ ନୂଆ ପ୍ରାର୍ଥୀ ଭାବେ ସାହୁଙ୍କୁ ପ୍ରାର୍ଥୀ କରେ, ତେବେ କୌଣସି ଅସୁବିଧା ନାହିଁ। ବରଂ ପୁରୁଣା ପ୍ରାର୍ଥୀଙ୍କ ବିରୋଧରେ ଥିବା ହାଓ୍ୱାକୁ ପ୍ରତିହତ କରାଯାଇପାରିବ।  ଷ୍ଟ୍ରାଟେଜି ଟିମ୍ ଏକ ରିପୋର୍ଟ ଦେଇଛି ଯେ, କଂଗ୍ରେସ ଭୋଟକୁ ମଧ୍ୟ ଶ୍ରୀ ସାହୁଙ୍କ ପ୍ରାର୍ଥିତ୍ୱ ଦ୍ୱାରା ଆକର୍ଷିତ କରାଯାଇପାରିବ। ତେଣୁ ସାଲେପୁରରୁ ଚିନ୍ମୟଙ୍କ ପ୍ରାର୍ଥୀତ୍ୱ ନେଇ ସମ୍ଭାବନା ବୃଦ୍ଧି ପାଇବାରେ ଲାଗିଛି। ଏକଦା ଉତ୍କଳ ବିଶ୍ୱବିଦ୍ୟାଳୟରେ ଛାତ୍ର ସଂସଦ ନିର୍ବାଚନରେ ବିଜୟୀ ହୋଇ ଛାତ୍ର ସଭାପତି ଭାବେ ଚିନ୍ମୟ ସାହୁ ରାଜ୍ୟ ରାଜନୀତିରେ ଏକ ପରିଚିତ ଚେହେରା ପାଲଟିଥିଲେ।  ଛାତ୍ର କଂଗ୍ରେସ ରାଜ୍ୟ ସଭାପତି ଭାବେ ଦୁଇ ଦୁଇ ଥର ଦାୟିତ୍ଵ ନେଇ ଥିବା ଶ୍ରୀ ସାହୁ ପରବର୍ତ୍ତୀ ସମୟରେ ବିଜେଡିରେ ସାମିଲ ହୋଇଥିଲେ। ବର୍ତ୍ତମାନ ସେ ଓଡ଼ିଶା କ୍ଷୁଦ୍ର ଶିଳ୍ପ ନିଗମର ଅଧ୍ୟକ୍ଷ ଭାବେ ଦାୟିତ୍ଵ ନିର୍ବାହ କରୁଛନ୍ତି। ଲଗାତର ଦ୍ୱିତୀୟ ଥର ପାଇଁ ତାଙ୍କୁ ଏହି ଦାୟିତ୍ୱ ପ୍ରଦାନ କରାଯାଇଛି।  

ଅତୀତରେ ଭୁବନେଶ୍ୱର ଉତ୍ତର, ଚିଲିକା ନିର୍ବାଚନ ମଣ୍ଡଳୀ, ବେଗୁନିଆ ନିର୍ବାଚନ ମଣ୍ଡଳୀ, ଜୟଦେବ, ଚମ୍ପୁଆ, ବାଲେଶ୍ଵର, କେନ୍ଦ୍ରାପଡ଼ା, କୋରେଇ, ପାଟଣାଗଡ ନିର୍ବାଚନ ମଣ୍ଡଳୀରେ ଦଳ ପୁର୍ବରୁ ଚର୍ଚ୍ଚାରେ ନ ଥିବା ଚେହେରାଙ୍କୁ ପ୍ରାର୍ଥୀ କରି ବଡ଼ ବିଜୟ ହାସଲ କରିଥିଲା। ସେଭଳି ସଂସଦୀୟ କ୍ଷେତ୍ର କଥା ଯଦି ଦେଖିବା ରେସରେ ନଥିବା ପ୍ରାର୍ଥୀ ଆସ୍କା ରୁ ପ୍ରମିଳା ବିଶୋଇ , କେନ୍ଦ୍ରାପଡ଼ାରୁ ଅନୁଭବ ମହାନ୍ତି, ଯାଜପୁରରୁ ଶର୍ମିଷ୍ଠା ସେଠୀଙ୍କୁ ଟିକେଟ ଦେଇ ଦଳ ବିଜୟ ହାସଲ କରିଛି। ସେହିଭଳି ଗତ ୨୫ ବର୍ଷର ଶାସନ କାଳ ଭିତରେ ଦଳ ଦୁଇ ପିଢ଼ିର ନେତାଙ୍କୁ ନେଇ ଅନେକ ସୋପାନ ଅତିକ୍ରମ କରିଛି । ଦାମ ରାଉତ, ରଣେନ୍ଦ୍ର ପ୍ରତାପ ସ୍ଵାଇଁ, ପ୍ରସନ୍ନ ପାଟ୍ଟଶାଣୀ, ଦେବୀ ମିଶ୍ର, ପ୍ରସନ୍ନ ଆଚାର୍ଯ୍ୟଙ୍କ ଭଳି ପ୍ରଥମ ପିଢ଼ିର ପୁରୁଖା ନେତା ବିଜେଡିକୁ ଅନେକ ସଫଳତା ଭେଟି ଦେଇଥିବା ବେଳେ, ଦ୍ଵିତୀୟ ପିଢ଼ି ଭାବେ ଅରୁଣ ସାହୁ, ଅତନୁ ସବ୍ୟସାଚୀ ନାୟକ, ପ୍ରତାପ ଜେନା ଙ୍କ ଭଳି ଛାତ୍ର ରାଜନୀତି ରୁ ଆସି ଆଜି ବିଜୁ ଜନତା ଦଳ ର ବରିଷ୍ଠ ନେତା ଭାବେ ସଫଳତାର ଶୀର୍ଷରେ ପହଞ୍ଚାଇଛନ୍ତି । ଆଗକୁ ଆହୁରି ଅନେକ ବର୍ଷ ଶାସନ କରିବାକୁ ଚାହୁଁଥିବା ବିଜୁ ଜନତା ଦଳ ଏବେ ତୃତୀୟ ପିଢି ଭାବେ ନୂଆ ଓ ଯୁବ ଚେହେରାକୁ ନେଇ ଆଗକୁ ବଢ଼ିବାକୁ ପ୍ରସ୍ତୁତ ହେଉଥିବା ଜଣାପଡିଛି।