ନବୀନ ନିବାସରୁ ଆସିଲାନି ଡାକରା,ଚିନ୍ତାରେ ଅନୁଗୁଳ ରାଜନୀତିର ପିତା-ପୁତ୍ର….ନୂଆ ମୁହଁ ଖୋଜୁଛି ଦଳ….
ଅନୁଗୁଳ,୨୮/୪(ବ୍ୟୁରୋ): ସାଧାରଣ ନିର୍ବାଚନକୁ ପ୍ରାୟ ବର୍ଷକରୁ କମ୍ ସମୟ ରହିଛି। ତେଣୁ ଶାସକ ଦଳ ବିଜେଡି ପୂର୍ବ ପ୍ରସ୍ତୁତିକୁ ବ୍ୟାପକ ଗୁରୁତ୍ୱ ଦେଉଛି। ପ୍ରାୟ 70 ଜଣଙ୍କୁ ପୁନର୍ବାର ଟିକେଟ ଦେବା ପାଇଁ ଦଳ ସ୍ଥିର କରିଛି। ଏଥିପାଇଁ ଗତ କିଛି ଦିନ ପୂର୍ବେ ନବୀନ ନିବାସକୁ ପ୍ରାୟ ୭୦ଜଣ ବିଧାୟକଙ୍କୁ ଡକାଯାଇଥିଲା। ଏହି ବିଧାୟକମାନଙ୍କ ସ୍ଥିତି ନିଜ ଅଞ୍ଚଳରେ ଭଲ ରହିଛି ବୋଲି କୁହାଯାଉଛି। ଦଳର ଆଭ୍ୟନ୍ତରିଣ ସର୍ଭେରେ ଯେଉଁ ବିଧାୟକଙ୍କ ସ୍ଥିତି ଭଲ ରହିଥିବା ସଂପର୍କରେ ରିପୋର୍ଟ ମିଳିଛି, ସେମାନଙ୍କୁ ହିଁ ଡକାଯାଇଥିବା କୁହାଯାଉଛି। ଏଣୁ ଡାକରା ପାଇଥିବା ବିଧାୟକମାନେ ପୁଣି ଥରେ ବିଜେଡ଼ି ଟିକେଟ ପାଇବା ଏକପ୍ରକାର ନିଶ୍ଚିତ ବୋଲି ରାଜନୈତିକ ମହଲରେ ଆଲୋଚନା ହେଉଛି। ତେବେ ଡାକରା ପାଇଥିବା ନେତାମାନେ ନାଭିରେ ତେଲ ପକେଇବା ଭଳି ବାହାରେ କହି ହେଉଛନ୍ତି। ଅପରପକ୍ଷରେ ଯେଉଁମାନେ ଡାକରା ପାଇନାହାନ୍ତି, ସେମାନେ ନାନା ଆଶଙ୍କାରେ ରହିଛନ୍ତି। ଡାକରା ପାଇନଥିବା ବିଧାୟକଙ୍କ ମଧ୍ୟରେ ଅଛନ୍ତି ଅନୁଗୋଳ ବିଧାୟକ ରଜନୀକାନ୍ତ ସିଂହ। ସେ ଉପବାଚସ୍ପତି ରହିଛନ୍ତି। ତେଣୁ ତାଙ୍କୁ ଡକାଯାଇ ନ ଥିବା ଯୁକ୍ତି ଦର୍ଶା ଯାଉଛି। ହେଲେ ବିଜେଡିର ଶୀର୍ଷ ନେତୃତ୍ୱ ଅନୁଗୁଳ ନେଇ ବିକଳ୍ପ ପ୍ଲାନ ବ୍ୟବସ୍ଥା କରୁଛି। ଏଥିପାଇଁ ରଜନୀଙ୍କ ପୁଅକୁ ଡକାଯାଇ ସଙ୍ଗଠନ କାର୍ଯ୍ୟ କରିବା ନେଇ କୌଣସି ନିର୍ଦ୍ଦେଶ ମଧ୍ୟ ଦିଆଯାଇନାହିଁ। ମୋଟ ଉପରେ କହିବାକୁ ଗଲେ ଅନୁଗୁଳର ଏକ ରାଜ ପରିବାରଙ୍କୁ ବିଜେଡିର ଆଗାମୀ ରଣନୀତିରୁ ବାଦ୍ ଦିଆଯାଇଛି। ଯାହା ଉଭୟ ରଜନୀ ଏବଂ ତାଙ୍କ ପରିବାରର ମୁଣ୍ଡବିନ୍ଧାର କାରଣ ହୋଇଛି। ଅବିଭକ୍ତ ଢେଙ୍କାନାଳ ଜିଲ୍ଲା ରାଜନୀତିରେ ମଣ୍ଟୁ ବାବୁ ଭାବେ ବେଶ ପରିଚିତ ଶ୍ରୀ ସିଂହ ୨୦୦୪ ମସିହାରୁ ୪ଥର ବିଧାୟକ ହୋଇଛନ୍ତି। ତାଙ୍କ ପୂର୍ବରୁ ବାପା ଅଦ୍ୱୈତ ପ୍ରସାଦ ସିଂହ ମଧ୍ୟ ୪ ଥର ବିଧାୟକ ହୋଇଥିଲେ। ଶ୍ରୀ ସିଂହ ବର୍ତ୍ତମାନ ଉପବାଚସ୍ପତି ପଦରେ ରହିଥିବା ବେଳେ ଦଳୀୟ ବ୍ୟାପାର ଦେଖୁଛନ୍ତି ପୁଅ ଅରୁଣାଭ ସିଂହ। କୁହାଯାଉଛି ଯେ, ଆଗାମୀ ନିର୍ବାଚନରେ ବାପା ବଦଳରେ ପୁଅ ଟିକେଟ ପାଇଁ ଅଧିକ ଆଶାବାଦୀ ଅଛନ୍ତି।
ତେବେ ପରିବାରବାଦ ରାଜନୀତିରେ ଅତିଷ୍ଠ ହୋଇପଡ଼ିଥିବା ବିଜେଡ଼ିର ଅନେକ ନେତା ବର୍ତ୍ତମାନ ସିଂହ ବାପା ପୁଅ ବିରୋଧରେ ଖୋଲାଖୋଲି ବିଦ୍ରୋହ ଆରମ୍ଭ କଲେଣି। ଏହାର ପ୍ରଭାବ ଗତ ପଞ୍ଚାୟତ ଏବଂ ପୌର ନିର୍ବାଚନରେ ପଡ଼ିଥିଲା। ଅରୁଣାଭଙ୍କୁ ଦଳର ବରିଷ୍ଠ କର୍ମୀ ଓ ନେତାମାନେ ସହଜରେ ଗ୍ରହଣ କରିପାରୁ ନାହାନ୍ତି। ତଥାପି ଅରୁଣାଭ ବିଜେଡ଼ି କାର୍ଯ୍ୟକ୍ରମରେ ଧସେଇ ପଶୁଥିବା ଯୋଗୁ ତାଙ୍କ ବିରୋଧରେ ଦଳ ଭିତରେ ଅସନ୍ତୋଷ ତୀବ୍ର ହେବାରେ ଲାଗିଛି। ଅନୁଗୋଳ ବିଜେଡ଼ି ଭିତରେ ବାପା-ପୁଅ ହଟାଅ ଅଭିଯାନ ଚାଲିଥିବା ବେଳେ ନବୀନ ନିବାସରୁ ଡାକରା ନଆସିବାକୁ ନେଇ କର୍ମୀମାନଙ୍କ ମଧ୍ୟରେ ନାନା କଥା ଆଲୋଚନା ହେଉଛି। ଉଭୟଙ୍କ ମଧ୍ୟରୁ କାହାକୁ ମଧ୍ୟ ବିଜେଡି ଟିକେଟ ମିଳିବ ନାହିଁ ବୋଲି ମଧ୍ୟ କର୍ମୀମାନେ କୁହାକୁହି ହେଲେଣି। ଏହା ପଛରେ ଆଉ ଏକ କାରଣ ହେଲା-ଅନୁଗୋଳରେ ହ୍ରାସ ପାଉଥିବା ବିଜେଡ଼ିର ଭୋଟ୍ ପ୍ରତିଶତ। ୨୦୦୪ ମସିହାରେ ପ୍ରଥମ ନିର୍ବାଚନରେ ଶ୍ରୀ ସିଂହଙ୍କୁ ମିଳିଥିଲା ୪୫ ପ୍ରତିଶତ ଭୋଟ୍। ଏହା ପରେ ୨୦୦୯ ମସିହାରେ ସେ ପାଇଥିଲେ ୫୦ପ୍ରତିଶତ ଭୋଟ୍। କିନ୍ତୂ ୨୦୧୪ ମସିହାରେ ୪୮ ପ୍ରତିଶତ ଭୋଟ ପାଇଥିବା ବେଳେ ୨୦୧୯ ମସିହାରେ ପାଇଥିଲେ ମାତ୍ର ୪୧ପ୍ରତିଶତ ଭୋଟ୍। ଅର୍ଥାତ ଲଗାତାର ଭାବେ ତାଙ୍କ ଭୋଟ୍ ପ୍ରତିଶତ ହ୍ରାସ ପାଇବାରେ ଲାଗିଛି। ଅପରପକ୍ଷେ ବିଜେପିର ଭୋଟ ପ୍ରତିଶତ ବୃଦ୍ଧି ପାଇବାରେ ଲାଗିଛି। ୨୦୦୯ ମସିହାରେ ବିଜେପିକୁ ମାତ୍ର ୯ପ୍ରତିଶତ ଭୋଟ୍ ମିଳିଥିବା ବେଳେ ୨୦୧୪ରେ ୧୩ପ୍ରତିଶତ ଏବଂ ୨୦୧୯ ନିର୍ବାଚନରେ ମିଳିଥିଲା ୩୬ପ୍ରତିଶତ ଭୋଟ୍। ଗତ ପୌର ନିର୍ବାଚନରେ ବିଜେପି ଭଲ ପ୍ରଦର୍ଶନ କରିଛି। ସେହିଭଳି ଅନୁଗୋଳ ବ୍ଲକ ଏବଂ ବଅଁରପାଳ ବ୍ଲକରେ ମଧ୍ୟ ଦଳର ପ୍ରଦର୍ଶନ ଭଲ ରହିଥିଲା। ଏଣୁ ଆସନ୍ତା ନିର୍ବାଚନରେ ବିଜେପିର ଭୋଟ ପ୍ରତିଶତ ବୃଦ୍ଧି ପାଇବ ବୋଲି ବିଜେଡ଼ି ଶିବିରରେ ଅନୁମାନ କରାଗଲାଣି। ସେଥିପାଇଁ ସିଂହ ପରିବାର ବଦଳରେ ବିଜେଡ଼ି ଏଥର ନୂଆଁ ଚେହେରା ମଧ୍ୟ ଖୋଜୁଛି। ଯଦି ସେପରି କିଛି ନ ହୁଏ, ତେବେ ଅରୁଣାଭ ହିଁ ଶେଷ ପସନ୍ଦ ହେବେ। ମଣ୍ଟୁ ବାବୁଙ୍କ ମନ ଖୁସି କରିବାକୁ କୁଆଡେ ପ୍ରତାପ ଜେନା ଅରୁଣାଭଙ୍କୁ ଗୋଟିଏ କର୍ମୀ ସମ୍ମିଳନୀରେ ପରବର୍ତ୍ତୀ ବିଧାୟକ ବୋଲି ଅଭିହିତ କରିଥିଲେ। ଜେନାବାବୁଙ୍କ ଏହି କଥା କୁଆଡେ, କେତେ କର୍ମୀଙ୍କୁ ହଜମ ହୋଇନାହିଁ।
