କେମିତି କରିବେ ସମାଲୋଚନା, ବାଟ ଖୋଜୁଛନ୍ତି ବିଜେପି-କଂଗ୍ରେସ

ଭୁବନେଶ୍ୱର : ଭି.କେ ପାଣ୍ଡିଆନଙ୍କୁ ଆମେ ବିଧାନସଭାରେ ଆକ୍ରମଣ କରିବୁ। ତାଙ୍କୁ କଳା ପତାକା ଦେଖାଇବୁ। ଆମ ପିଲା କେସ୍ ଖାଇବେ। ଅଫିସର ହୋଇ ରାଜନୀତି କରିବେ କାହିଁକି ବୋଲି ପ୍ରଶ୍ନ କରିବୁ। ଯେତେବେଳେ ସେ ଚାକିରୀରୁ ସ୍ୱେଚ୍ଛାକୃତ ଅବସର ପାଇଁ ଆବେଦନ କଲେ, ସେ ସମୟରେ ଆମ ଦଳ ଜାଣିପାରିଲେ ନାହିଁ କାହିଁକି। କେନ୍ଦ୍ରକୁ ଆବେଦନ ଗଲା। ଆମର ଦୁଇ କେନ୍ଦ୍ର ମନ୍ତ୍ରୀ ଏବଂ ଜଣେ ପୂର୍ବ ପ୍ରଶାସିକା କେମିତି ଟେର ପାଇଲେନି। ହଁ ଆଜ୍ଞା ଏହିଭଳି କେତୋଟି ପ୍ରଶ୍ନ ବିଜେପିର ଜଣେ ମୁଖପାତ୍ର ମନମୋହନ ସାମଲଙ୍କୁ ପଚାରିଛନ୍ତି। ଏହାର ଉତ୍ତରରେ ଶ୍ରୀ ସାମଲ କହିଛନ୍ତି ଦିଲ୍ଲୀ କଥା, ଦିଲ୍ଲୀ ନେତାଙ୍କୁ ପଚାର। ଆମର ଯେତିକି ଦାୟିତ୍ୱ ସେତିକି କରିବାର ଅଛି।

କେବଳ ସେତକ ନୁହେଁ। ଗତଥର ଅମିତ ଶାହା ଆସିବା ସମୟରେ ଏକଥା ଆଲୋଚନା ହୋଇଥିଲା। ମାତ୍ର କେମିତି ଏକଥା ଜୟ ଭାଇ, ବୈଜୟନ୍ତ ବାବୁ, ସମ୍ବିତ ପାତ୍ରଜୀ, ଅପରାଜିତା ମ୍ୟାଡାମ, ପ୍ରତାପ ଷଡଙ୍ଗୀ, ସୁରେଶ ପୂଜାରୀଙ୍କୁ କହିଲେନି। ପ୍ରଧାନମନ୍ତ୍ରୀଙ୍କର ଯଦି ଏତେ ସବୁ କଥାରେ ସମ୍ମତି ରହିଛି, ତେବେ ଆମେ ରଣନୀତି ପାଣ୍ଡିଆନ୍ କୈନ୍ଦ୍ରିକ କାହିଁକି ହେଲା ବୋଲି ମୁଖପାତ୍ର ଜଣଙ୍କ ପ୍ରଶ୍ନ କରିଛନ୍ତି। ଏହି ଘଟଣାରେ କୌଣସି ବଡ଼ ନେତାଙ୍କ ବୟାନ ନ ଆସିବା ଦଳର କେତେକ ଛାମୁଆ ନେତାଙ୍କୁ ବ୍ୟଥିତ କରିଛି। ଅନୁରୂପ ଭାବେ କଂଗ୍ରେସ ମଧ୍ୟ ପାଣ୍ଡିଆନ କୈନ୍ଦ୍ରିକ ରଣନୀତି କରିବାକୁ ଯାଉଥିଲା। ମାତ୍ର କାର୍ତ୍ତିକେୟନ ଏହି ପଦକ୍ଷେପ ପିସିସିକୁ ହରଡଘଣାରେ ପକାଇଦେଇଛି। କଂଗ୍ରେସ ମଧ୍ୟ କେଉଁ ଭାବେ ଆକ୍ରମଣ କରିବ, ତାହା ଜାଣିପାରୁନାହିଁ। ଏନେଇ ପିସିସି ସଭାପତି-ବରିଷ୍ଠ ବିଧାୟକ ଓ ପ୍ରଚାର କମିଟିର ଭିନ୍ନମତ ରହିଛି। ଏଆଇସିସି ଏହି ପ୍ରଶ୍ନରେ ଅବଗତ ହିଁ ନାହିଁ। ଜୟରାମ ରମେଶ ପରୋକ୍ଷରେ ଏହାକୁ ସ୍ୱାଗତ କରିଛନ୍ତି।