କଂଗ୍ରେସ ହାଇକମାଣ୍ଡ ଡାକିନାହାନ୍ତି… ଡାକିଲେ ବିଚାର କରିବୁ ବୋଲି କହିଲେ ଶିଶିର, ଅନ୍ତଃକନ୍ଦଳ ଯୋଗୁ ଆଗେଇପାରୁନି ବିଆରଏସ୍

ଭୁବନେଶ୍ୱର :  ଭାରତୀୟ ରାଷ୍ଟ୍ର ସମିତି-ବିଆରଏସରେ ଅନ୍ତଃ କନ୍ଦଳ ରହିଛି। ଯାହା ଫଳରେ କମିଟି ଠୁ ଆରମ୍ଭ କରି ସାଙ୍ଗଠନିକ କାର୍ଯ୍ୟ ଆଗକୁ ବଢିପାରୁନାହିଁ। କିଛି ଦିନ ତଳେ କୋରାପୁଟ କଂଗ୍ରେସର ଗୋଟିଏ ଗୋଷ୍ଠୀ ନୂଆଦିଲ୍ଲୀ ଗସ୍ତ କରି ହାଇକମାଣ୍ଡଙ୍କୁ ଭେଟିଥିଲେ। ସେଠାରେ ସେମାନେ ଆମ ପରିବାର(ଗିରିଧର ଗମାଙ୍ଗ-ହେମା ଗମାଙ୍ଗ-ଶିଶିର ଗମାଙ୍ଗ)ଙ୍କୁ ଦଳକୁ ଫେରାଇ ଆଣିବା ନେଇ କେତେକ ପ୍ରସ୍ତାବ ଦେଇଥିଲେ। ତେଣୁ ତାଙ୍କ ପରିବାର କଂଗ୍ରେସ ଫେରିବା ଏକ  ପ୍ରକାର ଚର୍ଚ୍ଚା ଆରମ୍ଭ ହୋଇଛି ବୋଲି ଶିଶିର ଗମାଙ୍ଗ କହିଛନ୍ତି।

ମାତ୍ର ତାଙ୍କୁ ଦଳକୁ ଫେରିବା ପାଇଁ ରାଜ୍ୟ କିମ୍ବା ଜାତୀୟ ନେତୃତ୍ୱ ପକ୍ଷରୁ ଯୋଗାଯୋଗ କରାଯାଇନାହିଁ। ଯଦି ଯୋଗାଯୋଗ କରାଯାଏ, ତେବେ ସେ ସମ୍ପର୍କରେ ବିଚାର କରାଯିବ ବୋଲି ଜୁନିୟମ ଗମାଙ୍ଗ କହିଛନ୍ତି। ଏମିତି କିଛି ମନ୍ତବ୍ୟ ଦେଇ ଅବିଭକ୍ତ କୋରାପୁଟ ଜିଲ୍ଲାର କଂଗ୍ରେସ ରାଜନୀତିରେ ଚର୍ଚ୍ଚାକୁ ଆସିଛନ୍ତି ଶିଶିର। ନିକଟରେ ତାରା ପ୍ରସାଦ ବାହିନୀପତିଙ୍କ ପତ୍ନୀ ମିନାକ୍ଷୀ ବାହିନୀପତିଙ୍କୁ ଜିଲ୍ଲା ସଭାପତି ଦାୟିତ୍ୱରୁ ହଟାଇ ଦିଆଯାଇଛି। ଏହା ବିରୋଧରେ ତାରା ପ୍ରତିବାଦ କରି ଦିଲ୍ଲୀ ଗସ୍ତ କରିଥିଲେ। ଏହି କାରଣରୁ କୋରାପୁଟ ସାଂସଦ  ସପ୍ତଗିରୀ ଉଲ୍ଲାକାଙ୍କ ସହ ମଧ୍ୟ ତାରାଙ୍କ ସମ୍ପର୍କ ଭଲ ନାହିଁ। ତେଣୁ ଗମାଙ୍ଗ ପରିବାରଙ୍କ ଆଗମନ ଅବିଭକ୍ତ କୋରାପୁଟ ଜିଲ୍ଲାର କଂଗ୍ରେସ ସମୀକରଣରେ ପରିବର୍ତ୍ତନ ଆଣିବ ବୋଲି କେତେକ ରାଜନୈତିକ ସମୀକ୍ଷକ ମତ ରଖିଛନ୍ତି।