ଏଆଇସିସିର ନିଷ୍ପତ୍ତି ସତ୍ତ୍ୱେ କାହିଁକି ସାମ୍ବିଧାନିକ-ସାମାଜିକ ନ୍ୟାୟ ଅଧିକାରରୁ ଦୂରେଇ ରହୁଛି କଂଗ୍ରେସ
ଭୁବନେଶ୍ୱର : କଂଗ୍ରେସ ଅଧ୍ୟକ୍ଷ ମଲ୍ଲିକାର୍ଡୁନ ଖଡଗେ, ପୂର୍ବତନ ଅଧ୍ୟକ୍ଷା ସୋନିଆ ଗାନ୍ଧୀ ଏବଂ କଂଗ୍ରେସ ନେତା ରାହୁଲ ଗାନ୍ଧୀ ସପ୍ତାହେ ହେବ ପଛୁଆବର୍ଗ ସଂରକ୍ଷଣ ନେଇ ଦାବି ଉପସ୍ଥାପନ କରୁଛନ୍ତି। କଂଗ୍ରେସ ପଛୁଆବର୍ଗ ସଂରକ୍ଷଣ ସହ ଜାତିଭିତ୍ତିକ ଜନଗଣନା ଦାବି କରିଛି। ଛତିଶଗଡ଼, ରାଜସ୍ଥାନ, ମଧ୍ୟପ୍ରଦେଶରେ ଏହି ଦାବି ନେଇ ରାଜନୈତିକ ଉପଲବ୍ଧି ମଧ୍ୟ ରହିଛି। ଏହି କ୍ରମରେ ପ୍ରାୟ ଅଧା ଜନସଂଖ୍ୟା ଓଡ଼ିଶାର ପଛୁଆବର୍ଗ। ମାତ୍ର ସେମାନଙ୍କ ସାମ୍ବିଧାନିକ ଅଧିକାର ପ୍ରସଙ୍ଗରେ ବିଧାୟକ ଦଳର ନୀରବତା ଅନେକଙ୍କୁ ଆଶ୍ଚର୍ଯ୍ୟ କରିଛି।
ବିଧାନସଭାର ପ୍ରଶ୍ନକାଳ, ଶୂନ୍ୟକାଳ ଏବଂ ବିଭାଗୀୟ ଆଲୋଚନା ବେଳେ ସାମାଜିକ ନ୍ୟାୟ ପ୍ରସଙ୍ଗରେ ପଦୁଟିଏ କଂଗ୍ରେସ ବିଧାୟକ ଦଳ ନେତା ନରସିଂହ ମିଶ୍ର ମୁହଁ ଖୋଲି ନାହାନ୍ତି। ଅନୁରୂପ ଭାବେ ମୁଖ୍ୟ ସଚେତକ ତାରା ପ୍ରସାଦ ବାହିନୀପତି ଏବଂ ବରିଷ୍ଠ ନେତା ସନ୍ତୋଷ ସିଂ ସାଲୁଜା ମଧ୍ୟ ନୀରବତା ଅବଲମ୍ବନ କରିଛନ୍ତି। ଓଡ଼ିଶାରେ ପୂର୍ଣ୍ଣ ଭାବେ 27 ପ୍ରତିଶତ ସଂରକ୍ଷଣ ଲାଗୁ ହୋଇନାହିଁ। ଉଚ୍ଚଶିକ୍ଷାରେ ଓବିସିଙ୍କୁ କୌଣସି ସଂରକ୍ଷଣ ଦିଆଯାଉନାହିଁ। ଅନୁରୂପ ଭାବେ ସଂଖ୍ୟା ଅନୁସାରେ ଆଦିବାସୀ ଏବଂ ଦଳିତଙ୍କୁ ମଧ୍ୟ ଉଚ୍ଚଶିକ୍ଷାରେ ସଂରକ୍ଷଣ ଦିଆଯାଇନାହିଁ। ରାଜ୍ୟ ସରକାର ଜାତିଭିତ୍ତିକ ସର୍ଭେକ୍ଷଣ(ପଛୁଆବର୍ଗ)ଙ୍କର କରିଥିଲେ ମଧ୍ୟ ତାହାକୁ ପ୍ରକାଶ କରିନାହାନ୍ତି। ଏହାକୁ ନେଇ ବିଭ୍ରାନ୍ତିମୂଳକ ତଥ୍ୟ ଗଣମାଧ୍ୟମରେ ପ୍ରକାଶ ପାଇଥିଲେ ବି ତାହାକୁ ସରକାର ଖଣ୍ଡନ କରିନାହାନ୍ତି। ବିଜେଡି ସଂସଦରେ ପଛୁଆବର୍ଗଙ୍କ ସଂଖ୍ୟା 42 ପ୍ରତିଶତ ବୋଲି ଉଲ୍ଲେଖ କରିଛି। ହେଲେ ଏହି ତଥ୍ୟ କେଉଁ ଆଧାରରୁ ଆସିଛି, ତାହା ଉଲ୍ଲେଖ କରିନାହିଁ। ଉଭୟ ବିଜେଡି-ବିଜେପି ସାମାଜିକ ନ୍ୟାୟ ବିରୋଧୀ ପଦକ୍ଷେପ ନେଉଥିବା ବେଳେ ଜାତୀୟ ଦଳ କଂଗ୍ରେସର ଆଭିମୁଖ୍ୟ ନେଇ ବିଶେଷଜ୍ଞମାନେ ଭିନ୍ନ ମତ ଦେଇଛନ୍ତି।
ଯୁବ ସମୀକ୍ଷକ ଚିନ୍ମୟ କୁମାର କୁହନ୍ତି ଯେ, କଂଗ୍ରେସ ତାର ସମସ୍ତ ମୁଖ୍ୟ ପଦରେ ସାଧାରଣ ବର୍ଗର ଲୋକଙ୍କୁ ପ୍ରତିନିଧିତ୍ୱ ପ୍ରଦାନ କରିଛି। ଏହି ନେତାମାନେ ସାମାଜିକ ନ୍ୟାୟ ସମ୍ପର୍କରେ ସମ୍ପୂର୍ଣ୍ଣ ଅଜ୍ଞ। ସେମାନଙ୍କ ନିର୍ବାଚନମଣ୍ଡଳରେ ପଛୁଆ, ଏସଟି,ଏସସି ସଂଖ୍ୟା ଅଧିକ। ତେଣୁ ଏହି ପ୍ରସଙ୍ଗରୁ ସେମାନେ ଦୂରେଇ ରହୁଛନ୍ତି। ମଣ୍ଡଳ କମିସନ ରିପୋର୍ଟ ସମ୍ପୂର୍ଣ୍ଣ ହେବା ପରେ ଯେଉଁ ସମୟରେ ଶୀତଳଭଣ୍ଡାରରେ ରହିଥିଲା, ସେହି ସମୟରେ ଏହି ନେତାମାନେ ରାଜନୈତିକ ଖଡି ଛୁଇଁଥିଲେ ବୋଲି କୁମାର କହିଛନ୍ତି। ଅନୁରୂପ ଭାବେ ସମାଜବିଜ୍ଞାନୀ ପିଏମ୍ ବିଜୟଲକ୍ଷ୍ମୀ କହିଛନ୍ତି ଯେ, କଂଗ୍ରେସ ଏଆଇସିସି ଠାରୁ ପିସିସି ଓ ବିଧାୟକ ଦଳ ଆଭିମୁଖ୍ୟ ବହୁତ ଅଲଗା। ଏକଦା ଦଳର ଜଣେ ଦଳିତ ବିଧାୟକଙ୍କୁ କଂଗ୍ରେସ ଭବନ ପରିସରରେ ବୈଠକ କରିବାକୁ ସୁଯୋଗ ଦିଆଯାଇ ନ ଥିଲା। ଏସଟି,ଏସସିମାନଙ୍କୁ ନବୀନ ପଟ୍ଟନାୟକଙ୍କ ଗୋଡ଼ ତଲେ ପଡିବା ପାଇଁ କୁହାଯାଇଥିଲା। ଏହି ସମୟରେ ନରସିଂହ ମିଶ୍ର ବିଧାୟକ ଦଳ ନେତା ତଥା ବିରୋଧି ଦଳ ନେତା ରହିଥିଲେ। ୟୁପି, ବିହାରରେ ପଛୁଆବର୍ଗ ରାଜନୀତି ଧାର ଧରିବା ପରେ ହିନ୍ଦୁସଂଖ୍ୟାଲଘୁବର୍ଗ(ବ୍ରାହ୍ମଣ,କରଣ(କାୟସ୍ଥ),ଠାକୁର,ବଣିଆ) ପ୍ରତିନିଧିତ୍ୱ ହ୍ରାସ ପାଇଥିଲା। ଏହି ଡ଼ର କଂଗ୍ରେସ ନେତାଙ୍କୁ ଘାରିଛି। ସେହିପରି ଜନତା ଦଳର ସରକାର ସମୟରେ ଆଇନ ମନ୍ତ୍ରୀ ଥିବା ନରସିଂହ ମିଶ୍ର ମଣ୍ଡଳ କମିସନ ବିରୋଧରେ ସୁପ୍ରିମକୋର୍ଟର ଦ୍ୱାରସ୍ଥ ହୋଇଥିଲେ। ତେଣୁ ସାମାଜିକ ନ୍ୟାୟ ପ୍ରସଙ୍ଗରୁ କଂଗ୍ରେସ ବିଧାୟକ ଦଳ ଦୂରେଇ ରହୁଛି।
