କାହା ହାତରେ ସଞ୍ଚୟ ପାଇଁ ରହୁନି ଟଙ୍କା, ହେଲେ ଖର୍ଚ୍ଚ ବଢି ଚାଲିଛି
ନୂଆଦିଲ୍ଲୀ : ଦେଶରେ ନଗଦ ପାରିବାରିକ ସଂଚୟ ଗତ ପ୍ରାୟ ୫୦ ବର୍ଷରେ ସର୍ବନିମ୍ନ ସ୍ତରକୁ ଖସିଛି। ଗତ ୨୦୨୧-୨୨ ଆର୍ଥିକ ବର୍ଷରେ ନଗଦ ପାରିବାରିକ ସଂଚୟ ଜିଡିପିର ୭.୨ % ଥିଲା। କିନ୍ତୁ ୨୦୨୨-୨୩ରେ ଏହା ଜିଡିପିର ୫.୧ %କୁ ହ୍ରାସ ପାଇଛି। ଦୁଇଦିନ ପୂର୍ବରୁ ରିଜର୍ଭ ବ୍ୟାଙ୍କ ପକ୍ଷରୁ ଏହା କୁହାଯାଇଛି। ଏଥିରୁ ସ୍ପଷ୍ଟ ଯେ, ଗୋଟିଏ ପଟେ ଲୋକଙ୍କ ଆୟ ହ୍ରାସ ପାଇଛି ଅନ୍ୟପଟେ ଖର୍ଚ୍ଚ ବଢ଼ିଛି। କେବଳ ପାରିବାରିକ ସଞ୍ଚୟ ହ୍ରାସ ପାଇନାହିଁ। ପାରିବାରିକ ଆର୍ଥିକ ବୋଝ ମଧ୍ୟ ୨୦୨୨-୨୩ ଆର୍ଥିକ ବର୍ଷରେ ଜିଡିପିର ୫.୮ %କୁ ବୃଦ୍ଧି ପାଇଛି। ୨୦୨୧-୨୨ ଆର୍ଥିକ ବର୍ଷରେ ଏହା ଜିଡିପିର ୩.୮ % ଥିଲା। ଅର୍ଥାତ ଲୋକମାନେ ଖର୍ଚ୍ଚ ମେଣ୍ଟାଇବା ପାଇଁ ଋଣ ଉପରେ ଅଧିକ ମାତ୍ରାରେ ନିର୍ଭରଶୀଳ ରହିଥିବା ଏଥିରୁ ସୂଚନା ମିଳୁଛି। ୨୦୨୨-୨୩ ଆର୍ଥିକବର୍ଷରେ ପାରିବାରିକ ଆର୍ଥିକ ବୋଝ ବୃଦ୍ଧି ହାର ସ୍ୱାଧୀନତା ପରଠାରୁ ଦ୍ବିତୀୟ ସର୍ବାଧିକ ରହିଛି। ଏହା ପୂର୍ବରୁ ୨୦୦୬-୦୭ ଆର୍ଥିକ ବର୍ଷରେ ପାରିବାରିକ ଆର୍ଥିକ ବୋଝ ହାର ଅଧିକ ବା ୬.୭ % ରହିଥିଲା। ୨୦୨୧-୨୨ ଆର୍ଥିକ ବର୍ଷରେ ନଗଦ ପାରିବାରିକ ଖର୍ଚ୍ଚରେ ବୃହତ୍ ହ୍ରାସ ଦେଖାଦେଇ ଏହା ୧୬.୯୬ ଲକ୍ଷ କୋଟି ଟଙ୍କା ରହିଥିଲା। ୨୦୨୨-୨୩ରେ ଏହା ଆହୁରି ତଳକୁ ଖସି ୧୩.୭୬ ଲକ୍ଷ କୋଟି ଟଙ୍କା ରହିଛି।
