ସୁରଙ୍କ କଥା ମାନିଲେନି ପୁଅ ମନ୍ମଥ, କହିଲେ କଂଗ୍ରେସରୁ ଲଢିବି ନାହିଁ….

ଜଟଣୀ : ମୁଁ କଂଗ୍ରେସ ଓ ମୋ ପରିବାର କଂଗ୍ରେସ । ମୁଁ କଂଗ୍ରେସ ଛାଡିବିନି । ମୋ ପୁଅ କଂଗ୍ରେସରୁ ଲଢିବ। ଏକଥା କହିଥିଲେ କଂଗ୍ରେସର ସବୁଠୁ ବରିଷ୍ଠ ବିଧାୟକ ସୁରେଶ କୁମାର ରାଉତରାୟ। ହେଲେ ସମୟ ଚକ୍ରରେ ସେହି କଥା ଆଉ କହିପାରିବେନି । କାରଣ ଜନ୍ମାଷ୍ଟମୀ ଦିନ ବିଭିନ୍ନ ଗଣମାଧ୍ୟମକୁ ସାକ୍ଷାତକାର ଦେଇ ସୁରଙ୍କ ପୁଅ ମନ୍ମଥ ନିଆରା ଢଙ୍ଗରେ ତାଙ୍କୁ ଲୋକହସା କରିଛନ୍ତି । ମନ୍ମଥ ରାଉତରାୟ କହିଛନ୍ତି ଯେ, କଂଗ୍ରେସ ଭବନ ଯିବା ମାନେ ନୁହେଁ ଯେ, ଦଳରେ ସାମିଲ ହୋଇଯିବା। କେତେକ ପ୍ରସଙ୍ଗରେ ସମର୍ଥନ ରହିଛି। ସେ ଜଣେ ସାମାଜିକ କର୍ମୀ। ବର୍ତ୍ତମାନ ପରିସ୍ଥିତିରେ ରାଜନେତା ନୁହଁନ୍ତି ବୋଲି ଜୁନିୟର ରାଉତରାୟ ସ୍ପଷ୍ଟ କରିଛନ୍ତି ।

ମନ୍ମଥ କହିଛନ୍ତି ଯେ, କଂଗ୍ରେସ ଟିକେଟରୁ ସେ ଲଢିବେ ବୋଲି କହିନାହାନ୍ତି। ବାପା କଂଗ୍ରେସ ନେତା, ତେଣୁ ସେ କହିଥିବେ। ମାତ୍ର ଦଳ ଚୟନ କରି ରାଜନୀତି ଲଢିବାରେ ବାପା ସ୍ବାଧିନତା ଦେଇଛନ୍ତି ବୋଲି ମନ୍ମଥ କହିଛନ୍ତି । ମନ୍ମଥଙ୍କ ଏହି ବୟାନ ପରେ ଜଟଣୀରେ ବିଭିନ୍ନ ଚର୍ଚ୍ଚା ଜୋର ଧରିଛି । କିଛି ଲୋକ ମନ୍ମଥ ବିଜେଡି ଯିବେ ବୋଲି କହୁଛନ୍ତି। କେତେକ ସେ ବିଜେପି ଯାଇପାରନ୍ତି ବୋଲି କହିଛନ୍ତି ।ଜଟଣୀ ଅଞ୍ଚଳରେ କାଳିଆ ସାମନ୍ତରାୟ କହିଛନ୍ତି ଯେ, ସୁର ବାବୁ ଚତୁରତାର ସହ ସୁବିଧାବାଦୀ ରାଜନୀତି କରି ଆସୁଛନ୍ତି। ମୋଦି, ଶାହାଙ୍କୁ ଗାଳି ଦେବେ । ମାତ୍ର ଅପରାଜିତାଙ୍କ ପ୍ରଶଂସାରେ ଶତମୁଖ ହୋଇଯିବେ। ଧର୍ମେନ୍ଦ୍ରଙ୍କୁ ଏମିତି ପ୍ରଶଂସା କରିବେ, ଯେମିତି ତାଙ୍କ ବଡ ବାପା। ନବୀନ ପଟ୍ଟନାୟକ ଏବଂ ଭିକେ ପାଣ୍ଡିଆନଙ୍କୁ ପ୍ରଶଂସା କରିବେ, ହେଲେ ଆଦିବାସୀ କି ଦଳିତ ମନ୍ତ୍ରୀଙ୍କୁ ଗାଳି କରିବେ। ନିଜର ଛୋଟ ବେପାର ସାମ୍ରାଜ୍ୟକୁ ବଜାୟ ରଖିବା ପାଇଁ କ୍ଷମତାଧାରୀ ଦଳ ସହ ରହିବେ। ତେଣୁ ପୁଅଙ୍କ ମୁହଁ ସୁର ନିଜର ଅସଲ ପରିଚୟ ଦେଇଥିବା ଶ୍ରୀ ସାମନ୍ତରାୟ କହିଛନ୍ତି।