ଇଣ୍ଡିଆ…ଜିତେଗା ଭାରତ…ସ୍ଲୋଗାନ ସହ ଆଗକୁ ବଢିବେ ବିରୋଧୀ
ବେଙ୍ଗଲୁରୁ : ପ୍ରଥମେ ଆସିଲା ନାଁ। ପୁଣି ବିଳମ୍ବିତ ରାତିରେ ଆସିଲା ଟ୍ୟାଗ୍ ଲାଇନ୍। ୨୦୨୪ ସାଧାରଣ ନିର୍ବାଚନରେ ‘ଏନଡିଏ’କୁ ମୁକାବିଲା କରିବା ନେଇ ପ୍ରଥମେ ଇଣ୍ଡିଆ ନାଁ ଦେଇଥିଲେ। ଏହାର ଟ୍ୟାଗ୍ ଲାଇନ୍ ସ୍ୱରୂପ ‘ଜିତେଗା ଭାରତ୍’ ବୋଲି ରଖାଯାଇଛି। ମଙ୍ଗଳବାର ରାତିରେ ‘ଜିତେଗା ଭାରତ୍’ (ଭାରତ ଜିତିବ) ଉପରେ ଚୂଡ଼ାନ୍ତ ନିଷ୍ପତ୍ତି ଗ୍ରହଣ କରାଯାଇଥିଲା। କେତେଗୁଡ଼ିଏ ଆଞ୍ଚଳିକ ଭାଷାରେ ମଧ୍ୟ ଏହି ‘ଟ୍ୟାଗ୍ଲାଇନ୍’ ବ୍ୟବହାର କରାଯିବ ବୋଲି ଖବର ସରବରାହ ସଂସ୍ଥାନ ‘ପିଟିଆଇ’ ପକ୍ଷରୁ ପ୍ରକାଶ କରାଯାଇଛି। ୨୬ ବିରୋଧୀ ଦଳ ମେଣ୍ଟର ନାଁ ‘ଆଇ.ଏନ୍.ଡି.ଆଇ.ଏ.’— (ଇଣ୍ଡିଆନ୍ ନ୍ୟାସ୍ନାଲ୍ ଡେଭ୍ଲପ୍ମେଣ୍ଟାଲ୍ ଇନ୍କ୍ଲୁସିଭ୍ ଆଲାଏନ୍ସ୍) ରଖିଥିଲେ। ପରବର୍ତ୍ତୀ ସମୟରେ ଗୋଟାଏ ‘ଟ୍ୟାଗ୍ଲାଇନ୍’ ସଂଯୋଗ କରିବା ଲାଗି ପରେ ସେମାନେ ନିଷ୍ପତ୍ତି ଗ୍ରହଣ କରିଥିଲେ। ତେଣୁ, କେତେ ଜଣ ନେତାଙ୍କ ମିଳିତ ଉଦ୍ୟମରେ ପ୍ରସ୍ତୁତ ‘ଜିତେଗା ଭାରତ’ ଟ୍ୟାଗ୍ଲାଇନ୍କୁ ନେଇ ସର୍ବସମ୍ମତି ପ୍ରକାଶ ପାଇଥିଲା।
