ଆଗୁଆ ନିର୍ବାଚନ ନେଇ ମୋଦି-ଶାହାଙ୍କ କ’ଣ ରହିଛି ଆଭିମୁଖ୍ୟ ….

ନୂଆଦିଲ୍ଲୀ : ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ସିଧା ଫାଇନାଲ ଖେଳିବାକୁ ଆଗ୍ରହୀ। ଗୃହ ମନ୍ତ୍ରୀ ଅମିତ ଶାହା ସେମି ଫାଇନାଲ ଖେଳିବା ପାଇଁ କହୁଛନ୍ତି। ଏହି କଥାଟି ସାଧାରଣତଃ ସମସ୍ତଙ୍କ ପାଇଁ ଅବୁଝା। ଏଠାରେ ସ୍ପଷ୍ଟ କରିଦେବାକୁ ଚାହୁଁଛୁ ଯେ, ୨୦୨୪ ସାଧାରଣ ନିର୍ବାଚନକୁ ଫାଇନାଲ କୁହାଯାଉଛି। ସେହିପରି ଆଗାମୀ ଦିନରେ ରାଜସ୍ଥାନ, ଛତିଶଗଡ଼, ମଧ୍ୟପ୍ରଦେଶ, ତେଲେଙ୍ଗାନା ଓ ମିଜୋରମରେ ହେବାରୁ ଥିବା ନିର୍ବାଚନକୁ ସେମି ଫାଇନାଲ କୁହାଯାଉଛି।

ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଅନୁଭବ କରୁଛନ୍ତି ଯେ, ରାଜ୍ୟସ୍ତରୀୟ ନିର୍ବାଚନରେ ତାଙ୍କର ପ୍ରଭାବ ହ୍ରାସ ପାଉଛି। ଯାହା ସେ କର୍ନାଟକ ଏବଂ ହିମାଚଳ ପ୍ରଦେଶରୁ ଶିକ୍ଷା ଗ୍ରହଣ କଲେ। କେବଳ ଗୁଜରାଟରେ ତାଙ୍କର ପ୍ରଭାବ ରହିଛି। ୟୁପିରେ ଯୋଗୀ ଏବଂ ଆସାମରେ ହିମନ୍ତ ବିଶ୍ୱଶର୍ମାଙ୍କ ପ୍ରଭାବ ରହୁଛି। ମାତ୍ର ଲୋକସଭାରେ ତାଙ୍କ ପ୍ରଭାବ ଅତୁଟ ରହିଛି। ତେଣୁ ଫାଇନାଲ ଓ ସେମି ଫାଇନାଲକୁ ଏକାଠି କରି ନିର୍ବାଚନ କଲେ ବିଜେପିକୁ କମ୍ କ୍ଷତି ସହିବାକୁ ପଡିବ। ତେଣୁ ଆସନ୍ତା ଡିସେମ୍ବର-ଜାନୁୟାରୀ ମାସରେ ନିର୍ବାଚନ କଲେ କଣ ହେବ, ସେ ନେଇ ପ୍ରଧାନମନ୍ତ୍ରୀ ତର୍ଜମା କରୁଛନ୍ତି। ଯଦି ସବୁ କିଛି ଠିକ୍ ଯାଏ। ତେବେ ଲୋକସଭା ସହ ଧାର୍ଯ୍ୟ ସମୟରେ ପଡୁଥିବା ୫ ରାଜ୍ୟ ଏବଂ ଓଡ଼ିଶା, ଆନ୍ଧ୍ର, ମହାରାଷ୍ଟ୍ର ଏବଂ ହରିୟାଣାର ବିଧାନସଭା ନିର୍ବାଚନ ସପକ୍ଷରେ ମୋଦି ରହିଛନ୍ତି।

ଗୃହ ମନ୍ତ୍ରୀ ଅମିତ ଶାହା କୁଆଡେ ସେମି ଫାଇନାଲ ସପକ୍ଷରେ ରହିଛନ୍ତି। ସେମିଫାଇନାଲ ଫଳାଫଳ ଯାହା ହେଉ ନା କାହିଁକି। କେନ୍ଦ୍ରୀୟ ସଂସ୍ଥା ଜରିଆରେ ବିରୋଧିଙ୍କ ମଧ୍ୟରେ ଫାଟ ସୃଷ୍ଟି କରାଯାଇ ସଫଳତା ପାଇ ହେବ ବୋଲି ଶ୍ରୀ ଶାହା ବିଶ୍ୱାସ କରୁଛନ୍ତି। ମାତ୍ର ଶେଷ ନିଷ୍ପତ୍ତି ନରେନ୍ଦ୍ର ମୋଦି ନେବେ। ଅନ୍ୟ ଦୁଇଟି କଥା ମଧ୍ୟ ଆଗୁଆ ନିର୍ବାଚନର ସଙ୍କେତ ଦେଉଛି। ଗତକାଲି ମମତା ବାନାର୍ଜୀ କହିଥିଲେ ଯେ, ଡିସେମ୍ବର ମାସରେ ସବୁ ଟପ୍ପର ବୁକିଂ ହୋଇସାରିଛି। ତେଣୁ କେନ୍ଦ୍ର ସରକାର ବୋଧେ ସେହି ସମୟରେ ନିର୍ବାଚନ କରିବାକୁ ଚାହୁଁଛନ୍ତି। ଅନୁରୂପ ଭାବେ ଶରଦ ପାଓ୍ୱାର ମଧ୍ୟ ଲୋକସଭା ସହ ମହାରାଷ୍ଟ୍ର ବିଧାନସଭା ନିର୍ବାଚନ କରାଇବା ସପକ୍ଷରେ କେନ୍ଦ୍ର ରହିଥିବା ମତ ପ୍ରକାଶ କରିଛନ୍ତି। କିଛିମାସ ତଳେ ଗୋଟିଏ ସରକାରୀ ସଭାରେ ବିହାର ମୁଖ୍ୟମନ୍ତ୍ରୀ ନୀତିଶ କୁମାର କେନ୍ଦ୍ର ଡିସେମ୍ବରରେ ନିର୍ବାଚନ କରିବାକୁ ଚାହୁଁଥିବା ଉଲ୍ଲେଖ କରିଥିଲେ।