ଘଟଣାବହୁଳ ହେବାକୁ ଯାଉଛି ଜୁଲାଇ, କେନ୍ଦ୍ର ମନ୍ତ୍ରିମଣ୍ଡଳ ଅଦଳବଦଳରୁ ଆରମ୍ଭ କରି ବଦଳିବ କଂଗ୍ରେସ ପ୍ରଭାରୀ…
ନୂଆଦିଲ୍ଲୀ : ଭାରତୀୟ ରାଜନୀତିରେ ନିର୍ବାଚନୀ ବର୍ଷରୁ ଗୁରୁତ୍ୱ କାହିଁରେ କେତେ। ନିର୍ବାଚନ ପାଖେଇଲେ କେତେ ଘଟଣା ଘଟେ। ଏହି କ୍ରମରେ ଚଳିତ ମାସ ତଥା ଜୁଲାଇ ଅନେକ ଘଟଣା ବହୁଳ ହେବାକୁ ଯାଉଛି। ରାଷ୍ଟ୍ରୀୟ ରାଜନୀତି ଠାରୁ ଆରମ୍ଭ କରି ରାଜ୍ୟ ରାଜନୀତିରେ ବ୍ୟାପକ ପରିବର୍ତ୍ତନ ଦେଖିବାକୁ ମିଳିବ।
ବିଜେପି ଚାରି ରାଜ୍ୟର ସଭାପତିଙ୍କୁ ବଦଳାଇବା ସହ ନିର୍ବାଚନ ହେବାକୁ ଥିବା ରାଜ୍ୟର ନୂତନ ପ୍ରଭାରୀ ନିଯୁକ୍ତ କରିଛି। ଗୌହାଟିରେ ତିନିଦିନିଆ ମନ୍ଥନ ଶିବିର ସମାପ୍ତ ହୋଇଛି। ଏହା ପରେ କେନ୍ଦ୍ରୀୟ କ୍ୟାବିନେଟରେ ଅଦଳବଦଳ କରାଯିବା ସହ ସଙ୍ଗଠନରେ ବ୍ୟାପକ ପରିବର୍ତ୍ତନ କରାଯିବ। ଏହି ସମ୍ପ୍ରସାରଣରେ ନୂତନ କରି ଏନଡିଏକୁ ଆସିଥିବା ସିନ୍ଧେ ଏବଂ ଅଜିତ ପା୍ୱାର, ଚିରାଗ ପାଶ୍ୱାନ ପ୍ରଭୂତି ନେତାମାନଙ୍କୁ ନେଇ ବିଜେପି ନିଷ୍ପତ୍ତି ନେବ। ଆସନ୍ତା 18 ତାରିଖରେ ଏନଡିଏ ଦଳ ଗୁଡିକର ବୈଠକ ଡକାଯାଇଛି। ଅନୁରୂପ ଭାବେ ଓଡ଼ିଶା ସମେତ କେତେକ ରାଜ୍ୟର ବିଜେପି କମିଟି ଗଠନ କରିବାକୁ ଯାଉଛି। କର୍ନାଟକରେ ନିର୍ବାଚନ ଫଳାଫଳ ବିଜେପିକୁ ହତୋତ୍ସାହିତ କରିଛି। ଦଳ ଆନୁଷ୍ଠାନିକ ଭାବେ ବିରୋଧି ଦଳ ନେତା ଘୋଷଣା କରିପାରିନାହିଁ। ତେଲେଙ୍ଗାନାରେ ଆମଦାନୀ କରିଥିବା ନେତାଙ୍କୁ ଥଇଥାନ କରିନାହିଁ। ସବୁ ମନ୍ତ୍ରୀଙ୍କୁ ସୋମବାରରୁ ଗୁରୁବାର ମନ୍ତ୍ରଣାଳୟ କାର୍ଯ୍ୟ ଦେଖିବାକୁ କୁହାଯାଇଛି। ମାତ୍ର ଶୁକ୍ରବାରରୁ ରବିବାର ଦଳର ସଙ୍ଗଠନ କାର୍ଯ୍ୟ ଦେଖିବାକୁ କୁହାଯାଇଛି। ଓଡ଼ିଶା ପରି ଆନ୍ଧ୍ର ସରକାର ମଧ୍ୟ ଆଗୁଆ ବିଧାନସଭା ନିର୍ବାଚନ ସପକ୍ଷରେ ମନ ବନାଉଥିବା ସୂତ୍ରରୁ ପ୍ରକାଶ। ତେଲେଙ୍ଗାନାରେ କଂଗ୍ରେସ ସହ ଓ୍ୱାଇଏସଆର ତେଲେଙ୍ଗାନାର ମିଶ୍ରଣ ହେବା ପ୍ରସଙ୍ଗ ଜୋରଦାର ଚର୍ଚ୍ଚା ଚାଲିଛି। ଛତିଶଗଡରେ ବିଜେପିର ଚେହେରା କିଏ, ସେ ନେଇ ସନ୍ଦେହ ରହିଛି। ତେଣୁ ବିଜେପି ପାଇଁ ଏହି ମାସ ବହୁତ ଗୁରୁତ୍ୱ ରହୁଛି।
ସେହିପରି କଂଗ୍ରେସ ଏହି ମାସରେ ନିଜର ସର୍ବୋଚ୍ଚ କାର୍ଯ୍ୟକାରିଣୀ ଘୋଷଣା କରିବ। ଓଡ଼ିଶା ସମେତ ବିଭିନ୍ନ ରାଜ୍ୟର ପ୍ରଭାରୀ ଏବଂ ପିସିସି ସଭାପତି ବଦଲିବାର ରହିଛି। ସଚିନ ପାଇଲଟ-ଅଶୋକ ଗେହଲଟ ବିବାଦ ସମାଧାନ କରାଯିବ। ପଶ୍ଚିମବଙ୍ଗ, ବିହାର, ୟୁପିରେ , ହରିୟାଣା, ଦିଲ୍ଲୀ, ପଞ୍ଜାବରେ ମେଣ୍ଟ ନେଇ ନିଷ୍ପତ୍ତି ନିଆଯିବ। ଭାରତ ଯୋଡ ଯାତ୍ରା ଦ୍ୱିତୀୟ ଆରମ୍ଭ କରାଯିବ ନା ନାହିଁ, ସେ ନେଇ ନିଷ୍ପତ୍ତି ନିଆଯିବ।
ଓଡ଼ିଶାର ରାଜ୍ୟପାଳ ପ୍ରଫେସର ଗଣେଷୀ ଲାଲଙ୍କ କାର୍ଯ୍ୟକାଳ ସରିବାକୁ ଯାଉଛି। ତେଣୁ ତାଙ୍କୁ ସମ୍ପ୍ରସାରଣ କରାଯିବ ନା ବଦଳାଯିବ, ତାହା ଚଳିତ ମାସରେ ସ୍ପଷ୍ଟ ହେବ। ପୁରନ୍ଦେଶ୍ୱରୀ ପରେ କିଏ ପ୍ରଭାରୀ ହେବେ, ସେ ନେଇ ମଧ୍ୟ କଳ୍ପନାଜଳ୍ପନା ପ୍ରକାଶ ପାଇବାରେ ଲାଗିଛି। ରୋହିତ ପୂଜାରୀଙ୍କ ବିଦାୟ ପରେ ମନ୍ତ୍ରୀପଦ ଖାଲି ରହିଛି। ତାଙ୍କ ସ୍ଥାନରେ ନବୀନ ପଟ୍ଟନାୟକ କାହାକୁ ମନ୍ତ୍ରୀ କରିବେ, ସେନେଇ ମାନସମନ୍ଥନ ଚାଲିଛି। ବାଚସ୍ପତି ପଦ ଖାଲି ରହିଛି। ଏହି ପଦରେ ବିଜେଡି କାହାକୁ ପ୍ରଦାନ କରୁଛି, ସେ ନେଇ ଅଙ୍କ କଷା ଆରମ୍ଭ ହୋଇଛି। ନିର୍ବାଚନ ପୂର୍ବରୁ ବିଜେଡି ଆଉ ଥରେ କାର୍ଯ୍ୟକାରିଣୀ କରିବାର ସମ୍ଭାବନାକୁ ଏଡାଇ ଦିଆଯାଇ ନପାରେ।
