୩ ରାଜ୍ୟସଭା ଆସନ ପାଇଁ ୩୦ ଆଶାୟୀ…ଓଡ଼ିଶାରୁ ଆଉ ଯିବେନି ଅଶ୍ୱିନୀ…ପ୍ରଶାନ୍ତଙ୍କୁ ମିଳିବନି ଦ୍ୱିତୀୟ ସୁଯୋଗ…ଚେଷ୍ଟା ଜାରି ରଖିଛନ୍ତି ଅମର..

ଭୁବନେଶ୍ୱର: ବିଜେଡି ରାଜନୀତିରେ ଘଡ଼ିକେ ଘୋଡ଼ା ଛୁଟିଛି। କିଏ କେତେବେଳେ କ୍ଷମତାରେ ରହିବ। କିଏ କେତେବେଳେ କ୍ଷମତାରୁ ବିଦା ହୋଇଯିବ, ତାହା ଜାଣିବା କଷ୍ଟକର। ତେଣୁ କୌଣସି ମତେ ଦଳୀୟ ଟିକେଟ୍ ହାସଲ କରିଦେବା ପାଇଁ ସମସ୍ତେ ବ୍ୟାକୁଳ. ବିଧାୟକ ଟିକେଟ୍ ପାଇଁ ଅଧିକ ଲବି ଥିବା ବେଳେ ଦ୍ୱିତୀୟରେ ରାଜ୍ୟସଭା ଆସନ ନେଇ ଜୋରଦାର ଲବି ଆରମ୍ଭ ହୋଇଯାଇଛି। ଆସନ୍ତା ବର୍ଷ ପ୍ରଥମାର୍ଦ୍ଧରେ ବିଜେଡ଼ିର ତିନୋଟି ରାଜ୍ୟସଭା ଆସନ ଖାଲି ହେବାକୁ ଯାଉଛି। ତେଣୁ ଏହି ତିନି ଆସନର ଲୋଭ ତିରିଣ ଆଶାୟୀଙ୍କୁ ଦେଖାଗଲାଣି।

ବିଜେଡି-ବିଜେପି-କର୍ପୋରେଟର ତ୍ରିବେଣୀ ସଙ୍ଗମ ପ୍ରାର୍ଥୀ ଭାବେ ଅଶ୍ୱିନୀ ବୈଷ୍ଣବ ରାଜ୍ୟସଭା ଯାଇଥିଲେ। ସେହିପରି ଡକ୍ଟର ଅମର ପଟ୍ଟନାୟକ ଏବଂ ଅଭିନେତା ପ୍ରଶାନ୍ତ ନନ୍ଦ ମଧ୍ୟ ରାଜ୍ୟ ସଭା ଯାଇଥିଲେ। ଅଶ୍ୱିନୀ ବୈଷ୍ଣବ ପୁର୍ନବାର ଓଡ଼ିଶାରୁ ଏବଂ ପ୍ରଶାନ୍ତ ନନ୍ଦ ଦ୍ୱିତୀୟ ଥର ରାଜ୍ୟସଭା ଯିବାର ସମ୍ଭାବନା କ୍ଷୀଣ ରହିଛି। ବୈଜୟନ୍ତ ପଣ୍ଡା, ପ୍ୟାରୀମୋହନ ମହାପାତ୍ରଙ୍କ ପରେ ସସ୍ମିତ ପାତ୍ର ଏକମାତ୍ର ନେତା ଯାହାଙ୍କୁ ଦ୍ୱିତୀୟଥର ରାଜ୍ୟସଭା ପଠାଯାଇଛି। ଏହି କ୍ରମରେ ଡକ୍ଟର ଅମର ପଟ୍ଟନାୟକ ଯଦି ରାଜ୍ୟସଭା ଯାଆନ୍ତି, ତେବେ ସେ ଚତୁର୍ଥ ବ୍ୟକ୍ତି ହେବେ। ମାତ୍ର ଏହି ସୁଯୋଗ ଯେ ତାଙ୍କୁ ମିଳିବ, ସେନେଇ ଶ୍ରୀ ପଟ୍ଟନାୟକ ନିଶ୍ଚିତ ନୁହଁନ୍ତି। ତେଣୁ ନିଜ ପାଇଁ ପ୍ଲାନ ବି ସ୍ୱରୂପ ଆଉ ଏକ ଲାଭଜନକ ପଦ ଲବିରେ ନିଜକୁ ସାମିଲ କରିସାରିଲେଣି।

ଏହି ସବୁ ନେତାଙ୍କ ବ୍ୟତୀତ ପୁରୀ ସାଂସଦ ପିନାକୀ ମିଶ୍ର ଆସନ୍ତା ବର୍ଷ ରାଜ୍ୟସଭା ଯିବା ପାଇଁ ଚାହୁଁଛନ୍ତି। ଲୋକସଭା ଲଢିବାକୁ ଇଚ୍ଛା ନ ଥିବା ତାଙ୍କ ସମର୍ଥକମାନେ ପ୍ରଚାର କରୁଛନ୍ତି। ତେଣୁ ରାଜ୍ୟସଭା ଲବିରେ ସେ ପ୍ରଥମ ଧାଡ଼ିରେ ରହିବେ। ବାଲେଶ୍ୱର ପୂର୍ବତନ ସାଂସଦ ରବୀନ୍ଦ୍ର ଜେନା ନିଜ ପତ୍ନୀ ସୁବାସିନୀ ଜେନାଙ୍କୁ ବସ୍ତାରୁ ଟିକେଟ୍ ମିଳୁ ବୋଲି ଚାହୁଁଛନ୍ତି। ବିଜେଡି ବାଲେଶ୍ୱରରୁ ଅଶ୍ୱିନୀଙ୍କୁ ସମର୍ଥନ ଦେଇ ଜିତାଇବା ପାଇଁ ଯୋଜନା ରଖୁଛି। ତେଣୁ ରବୀନ୍ଦ୍ର ଜେନା ରାଜ୍ୟସଭା ଲବିରେ ଅନ୍ୟତମ ଦାବିଦାର।

ଏହି ମାନଙ୍କୁ ବାଦ୍ ଦେଲେ ପ୍ରସନ୍ନ ପାଟ୍ଟଶାଣୀ, ରମେଶ ଚ୍ୟାଉ ପଟ୍ଟନାୟକ, ଅମର ଶତପଥୀ, ରାସେଶ୍ୱରୀ ପାଣିଗ୍ରାହୀ, ଏନ୍ ଭାସ୍କର ରାଓ, ଦେବୀ ପ୍ରସାଦ ମିଶ୍ର, ଦେବାଶିଷ ସାମନ୍ତରାୟ, ମହେଶ୍ୱର ମହାନ୍ତି, ପ୍ରଫୁଲ୍ଲ ସାମଲ, ସୁବ୍ରତ ବାଗଚୀ, ପ୍ରମିଳା ମଲ୍ଲିକ ,ରଣେନ୍ଦ୍ର ପ୍ରତାପ ସ୍ୱାଇଁ, ରବି ମହାପାତ୍ର, ପଦ୍ମନାଭ ବେହେରା, ଭୁପିନ୍ଦର ସିଂ, ପ୍ରସନ୍ନ ଆଚାର୍ଯ୍ୟ, ସମୀର ରଞ୍ଜନ ଦାଶ ପ୍ରମୁଖ ରାଜ୍ୟସଭା ରେସ୍ ରେ ରହିବେ ବୋଲି ସମୀକ୍ଷକମାନେ ପ୍ରାକ୍ ଆକଳନ କରିଛନ୍ତି। ବିଜେଡି ଅଧିକ ଅବସରପ୍ରାପ୍ତ ଅଫିସର ଏବଂ ମହିଳା ପ୍ରାର୍ଥୀଙ୍କୁ ଟିକେଟ୍ ଦେବାକୁ ଚାହୁଁ ଥିବାରୁ ଏହି ଆଶାୟୀ ତାଲିକା ବୃଦ୍ଧି ପାଇବାର ସମ୍ଭାବନା ରହିଛି।