ରଙ୍ଗ ବଦଳାଇଦେଲେ କଂଗ୍ରେସ ନେତା ନରସିଂହ ମିଶ୍ର, ସେତେବେଳେ କରୁଥିଲେ ବିରୋଧି, ଏବେ ସପକ୍ଷରେ କହିଲେଣି
ଭୁବନେଶ୍ୱର : ସାରା ଦେଶରେ ମଣ୍ଡଳ କମିସନ ଲାଗୁ ହେବା ପାଇଁ ପ୍ରସ୍ତୁତ ଲାଗି ରହିଥାଏ। ମାତ୍ର ଓଡ଼ିଶା ସରକାର ମଣ୍ଡଳ କମିସନ ସୁପାରିସ୍ ବିରୋଧରେ ସୁପ୍ରିମକୋର୍ଟ ଯିବା ପାଇଁ ପ୍ରସ୍ତୁତ ହୋଇଥିଲେ। ସୁପ୍ରିମକୋର୍ଟରେ ମଣ୍ଡଳ କମିସନ ବିରୋଧରେ ରାଜ୍ୟ ସରକାରଙ୍କ ପ୍ରତିନିଧି ଭାବେ ନରସିଂହ ମିଶ୍ର ଛିଡ଼ା ହୋଇଥିଲେ। ଏହା ହେଉଛି ନବେ ଦଶକର କଥା। ରାଜ୍ୟରେ ପଛୁଆବର୍ଗଙ୍କୁ ଯେପରି ସଂରକ୍ଷଣରୁ ବଞ୍ଚିତ କରାଯିବ, ସେ ନେଇ ନରସିଂହ ସବୁ ପ୍ରକାର ଚେଷ୍ଟା କରୁଥିଲେ। ଏଥିରେ ସଫଳ ମଧ୍ୟ ହୋଇଥିଲେ। ଯାହା ଦ୍ୱାରା ଓବିସିମାନେ ମାତ୍ର 11.25 ପ୍ରତିଶତ ସଂରକ୍ଷଣ ପାଉଛନ୍ତି। ସେତେବେଳେ ଠିକ୍ ଭାବେ ତଥ୍ୟ ଉପସ୍ଥାପନ କରାଯାଇଥିଲେ ଆଜି 33 ପ୍ରତିଶତ ସଂରକ୍ଷଣ ସୁନିଶ୍ଚିତ କରାଯାଇପାରିଥାନ୍ତା। ତେଣୁ ସେତେବେଳେ ସାମାଜିକ ନ୍ୟାୟ ଆନ୍ଦୋଳନ ପାଣିକୁ ଗୋଳିଆ କରିଥିବା ନରସିଂହ ଆଜି ଗଙ୍ଗା ପାଣିରେ ଗାଧେଇବାକୁ ମିଛ ତତ୍ପରତା ପ୍ରଦର୍ଶନ କରୁଛି। ସେହି ନରସିଂହ ମିଶ୍ର ଯିଏ ବର୍ତ୍ତମାନ କଂଗ୍ରେସ ବିଧାୟକ ଦଳର ନେତା ରହିଛନ୍ତି। ଏହା ପୂର୍ବରୁ ବିରୋଧି ଦଳ ନେତା ରହିଥିଲେ। ନବେ ଦଶକରେ ବିଜୁ ପଟ୍ଟନାୟକ ମୁଖ୍ୟମନ୍ତ୍ରୀତ୍ୱ ସମୟରେ ଆଇନ ମନ୍ତ୍ରୀ ଭାବେ ଶ୍ରୀ ମିଶ୍ର କାର୍ଯ୍ୟ କରୁଥିଲେ। ଓଡ଼ିଶା ଜନସଂଖ୍ୟାର ଅଧାରୁ ଅଧିକ ବର୍ଗ(ଚଷା, ଖଣ୍ଡାୟତ ଓ ବିଭିନ୍ନ କୌଳିକ ବୃତ୍ତିଧାରୀ ସମାଜ)କୁ ସେମାନଙ୍କୁ ଯେପରି ସାମ୍ବିଧାନିକ ଅଧିକାର ନ ମିଳିବ, ସେ ନେଇ ନରସିଂହ କୌଣସି ସୁଯୋଗ ହାତଛଡା କରି ନ ଥିଲେ। ବିଜୁ ବାବୁଙ୍କ କ୍ୟାବିନେଟ୍ ଅନ୍ୟତମ ସହଯୋଗୀ ବିଜୟ ମହାପାତ୍ର ମଧ୍ୟ ମଣ୍ଡଳ କମିସନର ବିରୋଧରେ ରହିଥିଲେ।
ମାତ୍ର ସମୟ ବଡ଼ ବଳବାନ ଘଟଣାକ୍ରମରେ ପଛୁଆବର୍ଗ ସାମାନ୍ୟ ସଚେତନ ହୋଇଛି। କେନ୍ଦ୍ର ସରକାର ବିଭିନ୍ନ କ୍ଷେତ୍ରରେ ପଛୁଆବର୍ଗର ସଂରକ୍ଷଣ ସୁନିଶ୍ଚିତ କରିଛନ୍ତି। ମାତ୍ର ଓଡ଼ିଶାରେ ତାହା ହୋଇ ପାରପାରି ନାହିଁ। ବିହାର ଜାତିଭିତ୍ତିକ ଜନଗଣନା ରିପୋର୍ଟ ଆସିବା ପରେ କଂଗ୍ରେସ ଏହାକୁ ସମର୍ଥନ କରିଛି। ରାହୁଲ ଗାନ୍ଧୀ, ସୋନିଆ ଗାନ୍ଧୀ, ମଲ୍ଲିକାର୍ଜୁନ ଖଡ଼ଗେ ଏହି ପ୍ରସଙ୍ଗକୁ ସମର୍ଥନ କରିବା ପରେ ପ୍ରଦେଶ କଂଗ୍ରେସ ମୁହଁ ଖୋଲିବା ଆରମ୍ଭ କରିଦେଇଛି। ପିସିସି ସଭାପତି ଶରତ ପଟ୍ଟନାୟକଙ୍କ ପରି ନରସିଂହ ମିଶ୍ର ମଧ୍ୟ ଓବିସି ସଂରକ୍ଷଣ ଓ ଜନଗଣନା ନେଇ ମନ୍ତବ୍ୟ ଦେଉଛନ୍ତି। ନବେ ଦଶକର ନରସିଂହ ଆଜି ପ୍ରାୟଶ୍ଚିତ କରିବାକୁ ଲାଗି ପଡିଛନ୍ତି। ହେଲେ ରାଜ୍ୟ ପ୍ରଶାସନ ଦଲିଲରେ ତାଙ୍କ ଭୂମିକା ଲିପିବଦ୍ଧ ହୋଇସାରିଛି। ତେଣୁ ଏହି ପ୍ରାୟଶ୍ଚିତ କେତେ ଫଳପ୍ରଦ ହେବ, ତାହା ସମୟ କହିବ।
ଏହି ପ୍ରସଙ୍ଗରେ ନରସିଂହଙ୍କ କ୍ୟାମ୍ପର ଜଣେ ପୂର୍ବତନ ସଦସ୍ୟ କୁହନ୍ତି ଯେ, ଓଡ଼ିଶାର ପ୍ରମୁଖ ଗଣମାଧ୍ୟମ ଗୁଡିକର ମାଲିକ ସାଧାରଣ ବର୍ଗରୁ ଆସିଥାନ୍ତି। ନରସିଂହ ମଧ୍ୟ ସାଧାରଣ ବର୍ଗର। ତେଣୁ ପ୍ରକୃତ ପଛୁଆବର୍ଗର ନେତା ମତାମତକୁ ପ୍ରମୁଖ ଗଣମାଧ୍ୟମ ବେଶୀ ପ୍ରଚାର କରିବ ନାହିଁ। ନରସିଂହ ମିଶ୍ର, ପଟ୍ଟନାୟକ ପରିବାର ଏବଂ କମଣ୍ଡଳ ରାଜନୀତିର ଠିକାଦାରମାନଙ୍କ ମତାମତ ଦେଖାଯିବ। ବର୍ତ୍ତମାନ ସାମ୍ବାଦିକମାନେ ବୌଦ୍ଧିକ ଦେବାଳିଆ କାରଣରୁ ନରସିଂହ ମିଶ୍ରଙ୍କୁ ତାଙ୍କର ମଣ୍ଡଳ କମିସନ ବିରୋଧି ଆଭିମୁଖ୍ୟ ପାଇଁ ପ୍ରଶ୍ନ କରିପାରିବେ ନାହିଁ। ତେଣୁ ନରସିଂହ ଓବିସି ବିରୋଧି ବୋଲି ଜଣାପଡିବେ ନାହିଁ। ଏହାର ସୁଯୋଗ ନେଇ ଶ୍ରୀ ମିଶ୍ର ଓବିସି ସଂରକ୍ଷଣ ଓ ଜନଗଣନା ସମ୍ପର୍କରେ ମତ ଦେବେ ବୋଲି ସେ କହିଛନ୍ତି। ନରସିଂହ ମିଶ୍ର ବିଧାନସଭାରେ ଆଦିବାସୀ ଏବଂ ଅନୁସୂଚିତ ଜାତି ବିଧାୟକଙ୍କୁ ଲଜ୍ଜିତ କରିଥିଲେ। ସେ ସମ୍ପର୍କିତ ଏକ ଖବର ଲିଙ୍କ୍ ନିମ୍ନରେ ପ୍ରଦାନ କରାଗଲା।
