ଆଗୁଆ ନିର୍ବାଚନ : ରାଜଭବନକୁ ପରାମର୍ଶ ମାଗିଲେ ଓଡ଼ିଶା ସରକାର Exclusive …
ଭୁବନେଶ୍ୱର : ୨୦୦୪ ମସିହାରେ ଓଡ଼ିଶା ବିଧାନସଭା ଭଙ୍ଗ କରି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଲୋକସଭା ସହ ବିଧାନସଭା ନିର୍ବାଚନ ପାଇଁ ସୁପାରିଶ କରିଥିଲେ। ଧାର୍ଯ୍ୟ ସମୟର ପ୍ରାୟ ବର୍ଷକ ପୂର୍ବରୁ ଏହି ନିଷ୍ପତ୍ତି ନେଇଥିଲେ। ସେତେବେଳେ ବିଜେଡିର ବିଜେପି ସହ ମେଣ୍ଟ ମଧ୍ୟ ରହିଥିଲା। ପୂର୍ବାପେକ୍ଷା ଆସନ ମେଣ୍ଟ କିଛି ଆସନ ହରାଇଥିଲା। ହେଲେ ଦ୍ୱିତୀୟ ଥର ସରକାର ଗଢିବାରେ ସଫଳ ହୋଇଥିଲା। ତେଣୁ ସେ ସମୟରେ ବିଧାନସଭା ଭଙ୍ଗ କରିବା ପରିପ୍ରେକ୍ଷୀରେ କଣ ସବୁ ପ୍ରକ୍ରିୟା ସମ୍ପାଦିତ ହୋଇଥିଲା, ତାହାର ଏକ ବିବରଣୀ ରାଜ୍ୟ ସରକାରଙ୍କ ପକ୍ଷରୁ ରାଜଭବନକୁ ମଗାଯାଇଛି।
ଗତ ଶୁକ୍ରବାର ରାଜଭବନକୁ ରାଜ୍ୟ ସରକାରଙ୍କ ପକ୍ଷରୁ ଏନେଇ ବିଧିବଦ୍ଧ ପ୍ରସ୍ତାବ ମଗାଯାଇଥିବା ଜଣାପଡିଛି। ଉଭୟ ସୂତ୍ରରୁ ଓଡ଼ିଶା ପତ୍ରିକାକୁ ମିଳିଥିବା ସୂଚନା ଅନୁଯାୟୀ ରାଜଭବନର ଉତ୍ତର ପରେ ଆଗୁଆ ନିର୍ବାଚନ ନେଇ ପ୍ରକ୍ରିୟା ଆରମ୍ଭ ହେବାର ଯଥେଷ୍ଟ ସମ୍ଭାବନା ରହିଛି। ମେ ମାସ ଶେଷ ସପ୍ତାହରେ ପ୍ରଥମେ ଆଗୁଆ ନିର୍ବାଚନ ନେଇ ଓଡ଼ିଶା ପତ୍ରିକା ପକ୍ଷରୁ କୁହାଯାଇଥିଲା।
ବିଜେଡିକୁ ପରିଚାଳନା କରୁଥିବା ନିର୍ଦ୍ଦିଷ୍ଟ ଗୋଷ୍ଠୀ ପକ୍ଷରୁ ମିଳିଥିବା ଖବର ଅନୁଯାୟୀ ଜାତୀୟ ରାଜନୀତି ସ୍ଥିତି ଦୃଷ୍ଟିରୁ ବିଜେଡି ଏହି ନିଷ୍ପତ୍ତି ନେଉଥିବା ଜଣାପଡିଛି। ଆଗାମୀ ଦିନରେ ଏନଡିଏ କିମ୍ବା ଇଣ୍ଡିଆ ସପକ୍ଷରେ ଏକ ବାତାବରଣ ହେବାକୁ ଯାଉଛି। ଜାତୀୟସ୍ତରର ଦ୍ୱିମୁଖି ନିର୍ବାଚନୀ ବାତାବରଣରେ ବିଜେଡି କୌଣସି ସ୍ପଷ୍ଟ ଆଭିମୁଖ୍ୟ ଗ୍ରହଣ କରିବା ପରିସ୍ଥିତିରେ ନାହିଁ। ତେଣୁ ଗତଥର ତେଲେଙ୍ଗାନାରେ ବିଆରଏସ୍ ଏହି ନିଷ୍ପତ୍ତି ନେଇ ଫାଇଦାରେ ରହିଥିଲା। ବର୍ତ୍ତମାନ ରାଜ୍ୟରେ ବିଜେପି ଓ କଂଗ୍ରେସ ଭଲ ସ୍ଥିତିରେ ନାହାନ୍ତି। ତେଣୁ ଆଗୁଆ ନିର୍ବାଚନ ବିଜେଡିକୁ ଫାଇଦା ଦେବ ବୋଲି ଶାସକ ଦଳ ବିଶ୍ୱାସ କରୁଛି।
