ସ୍ଥାୟୀ ଏସପିଙ୍କୁ ଅପେକ୍ଷା କରି ରହିଛି ବ୍ରହ୍ମପୁର ପୁଲିସ୍, ଟ୍ରାଫିକ ବ୍ୟବସ୍ଥା ଅସମ୍ଭାଳ..ଆସୁଛି ପାର୍ବଣ.. ହଣା ଖାଇବା ଭୟରେ ସୁନା ଦୋକାନୀ… ଜୁନିୟର ଜିଲ୍ଲାପାଳଙ୍କ ଅଭିଯୋଗ ଶୁଣାଣିକୁ ଯାଉନାହାନ୍ତି ସିନିୟର ଆଇପିଏସ୍ ….
ବ୍ରହ୍ମପୁର: (ବ୍ୟୁରୋ)- ରାଜ୍ୟରେ ଥିବା ପାଞ୍ଚୋଟି ମହାନଗର ନିଗମ ମଧ୍ୟରେ ବ୍ରହ୍ମପୁର ଟିକେ ସ୍ୱତନ୍ତ୍ର। ଆପରାଧିକ କାର୍ଯ୍ୟକଳାପ, ଗୋଷ୍ଠୀ ସଂଘର୍ଷ ଓ ପାର୍ବଣକୁ ନେଇ ଅପରାଧରେ ଏହା ଅନ୍ୟ ଚାରି ମହାନଗର ଠାରୁ ଢେର ଆଗରେ। ବ୍ରହ୍ମପୁର ଗଞ୍ଜାମ ଜିଲ୍ଲାର ହୃଦୟ। ବ୍ରହ୍ମପୁରରେ ବିବାଦ, ଗଣ୍ଡଗୋଳ ତୁରନ୍ତ ଏହାର ଆଖପାଖ ଅଞ୍ଚଳକୁ ବ୍ୟାପିଥାଏ। ଦୁଇରୁ ତିନିମାସ ହେବ ବ୍ରହ୍ମପୁର ସମେତ ଗଞ୍ଜାମ ଜିଲ୍ଲାର ଆଇନ ଶୃଙ୍ଖଳା ପରିସ୍ଥିତି ନେଇ ବିଭ୍ରାଟ ସୃଷ୍ଟି ହୋଇଛି। ଏହା ଏକ ପ୍ରଶାସନିକ ବିଭ୍ରାଟ। ଯାହା ରାଜ୍ୟ ଶୀର୍ଷ ପ୍ରଶାସନ ଦ୍ୱାରା ସୃଷ୍ଟି କରାଯାଇଛି। ଗଞ୍ଜାମ ଜିଲ୍ଲାକୁ ଆଇନ ଶୃଙ୍ଖଳା ଦୃଷ୍ଟିରୁ ଦୁଇ ଭାଗରେ ବିଭକ୍ତ କରାଯାଇଛି। ପୂର୍ବ ଗଞ୍ଜାମ ଜିଲ୍ଲାକୁ ଭାଗ କରାଯାଇ ବ୍ରହ୍ମପୁର ପୁଲିସ୍ ଜିଲ୍ଲା କରାଯାଇଛି। ହେଲେ ନୂତନ ସରକାର ଆସିବା ପରେ ଏକ ପୂର୍ଣ୍ଣକାଳୀନ ଆରକ୍ଷୀ ଅଧିକ୍ଷକ ନିଯୁକ୍ତ ହୋଇପାରିନାହାନ୍ତି। ବର୍ତ୍ତମାନ ସାର୍ଥକ ଷଡଙ୍ଗୀ ଏହି ଦାୟିତ୍ୱରେ ଅଛନ୍ତି। ସେ ଡିଆଇଡି ପାହ୍ୟାରେ ଅଛନ୍ତି। ତାଙ୍କ ଅଧିନରେ ଦୁଇ ଜଣ ଅତିରିକ୍ତ ଏସପି କାମ କରୁଛନ୍ତି। ଏହି ଦୁଇ ଜଣ ହେଉଛନ୍ତି- ରମେଶ ସେଠୀ ଏବଂ ଅସୀମ ରଥ। ନିକଟରେ ଗଞ୍ଜାମ ଜିଲ୍ଲାରେ ମଦମୃତ୍ୟୁ ହୋଇଥିଲା। ଆଗକୁ ପାର୍ବଣଋତୁ ଆସୁଛି। ତେଣୁ ଆଇନ ଶୃଙ୍ଖଳାକୁ ଦୃଷ୍ଟିରେ ରଖି ପୁଲିସ୍ ପ୍ରଶାସନରେ ଏକ ବ୍ୟାପକ ଅଦଳବଦଳ ଆଶା ରହିଛି।
ନୂଆ ସରକାର ଆସିବା ପରେ କେତେକ କନଷ୍ଟବଳ ଓ ହାବିଲଦାର ବଦଳି ହୋଇଛନ୍ତି। କିଛି କମ୍ ମାତ୍ରାରେ ଏସଆଇ ଏବଂ ଆଇଆଇସି ବଦଳି ହୋଇଛନ୍ତି। କିଛି ଦିନ ତଳେ ଅପରାଧିମାନେ ସୁନା ଦୋକାନୀମାନଙ୍କୁ ଟାର୍ଗେଟ କରୁଛନ୍ତି। ସୁନା ଦୋକାନୀ ଲୁଟିବା, ତାଙ୍କୁ ହତ୍ୟା କରିବା ଭଳି କାର୍ଯ୍ୟ କରୁଛନ୍ତି। ଆଗକୁ ଦଶହରା ପୂଜା ଆସୁଛି। ଏହା ପରେ କୁମାର ପୂର୍ଣ୍ଣିମା। ଯାହାର ବ୍ରହ୍ମପୁର ଓ ଗଞ୍ଜାମରେ ସ୍ୱତନ୍ତ୍ର ଆଦର ରହିଛି। ଏହି ସମୟରେ ସୁନା ବ୍ୟବସାୟୀଙ୍କୁ ଅଧିକ ଟାର୍ଗେଟ କରାଯିବାର ଆଶଙ୍କା କରାଯାଉଛି। ପାର୍ବଣ ସମୟରେ ଜୁଆ ଖେଳରେ ବହୁତ ଆଦର ରହିଛି। ଏହି ଜୁଆ ଖେଳକୁ ଭିତ୍ତିକରି ଗଣ୍ଡଗୋଳ, ଗୋଷ୍ଠୀ ସଂଘର୍ଷ ହେବାର ନଜିର ରହିଛି। ଯଦି ପୂଜାର ଯଥେଷ୍ଟ ପୂର୍ବରୁ ରୋଡ୍ ମ୍ୟାପ୍ ପ୍ରସ୍ତୁତି ନ କରାଯାଏ, ତେବେ ଏ ଧରଣର ଗଣ୍ଡଗୋଳ ବ୍ରହ୍ମପୁରରୁ ଗ୍ରାମାଞ୍ଚଳକୁ ମାତିବ। ଜିଲ୍ଲାର କଲେକ୍ଟର ଦିବ୍ୟଜ୍ୟୋତି ପରିଡା ନୂତନ ଭାବେ ଦାୟିତ୍ୱ ଗ୍ରହଣ କରିଛନ୍ତି। ଆରକ୍ଷୀ ଅଧିକ୍ଷକ ସାର୍ଥକ ଷଡଙ୍ଗୀ ଡିଆଇଜି ପାହ୍ୟାର ହୋଇଥିବାରୁ ସରକାରୀ ଜନଶୁଣାଣୀରେ ବି ତାଙ୍କୁ ଦେଖିବାକୁ ମିଳୁନାହିଁ। ଏସପି ଭାବେ ତାଙ୍କୁ ଜିଲ୍ଲାପାଳଙ୍କୁ ସାଲ୍ୟୁଟ ମାରିବାକୁ ପଡିବ। ତେଣୁ ଏଭଳି କିଛି ପରିସ୍ଥିତିରୁ ସେ ଦୂରେଇ ରହୁଛନ୍ତି।
ମଦ ମୃତ୍ୟୁ କଥାରେ ବିଧାନସଭା ହୁଲୁସ୍ତୁଲୁ ହୋଇଥିଲା। ବାଲି ମାଫିଆରେ ବିଧାୟକଙ୍କ ସଂପୃକ୍ତି ନେଇ ଗଞ୍ଜାମ ଖବରର ଶିରୋନାମାରେ ରହିଥିଲା। ଗଞ୍ଜାମ ଉପକୂଳ ଓ ଆନ୍ଧ୍ର ସନ୍ନିକଟ । ତେଣୁ ଚାରିଆଡୁ ବିପଦ ରହିଛି। ଏହି ଜିଲ୍ଲାରୁ ପୂର୍ବତନ ମୁଖ୍ୟମନ୍ତ୍ରୀ, ବାଚସ୍ପତି ଆସୁଥିଲେ। ବର୍ତ୍ତମାନ ବିରୋଧୀ ଦଳ ନେତା ଏହି ଜିଲ୍ଲାର। ଜିଲ୍ଲାର ଦୁଇ ଜଣ ରାଜ୍ୟ ମନ୍ତ୍ରିମଣ୍ଡଳର ସଦସ୍ୟ। ଏସବୁ ସତ୍ତ୍ୱେ ପୁଲିସ୍ ପ୍ରଶାସନରେ ଅଦଳବଦଳ ହୋଇପାରୁନାହିଁ। ସାମାଜିକ କର୍ମୀ ଅଶ୍ୱିନୀ ସାହୁ କହିଛନ୍ତି ଯେ, ରାଜ୍ୟ ପ୍ରଶାସନ ବ୍ରହ୍ମପୁର ଓ ଗଞ୍ଜାମକୁ ହାଲୁକା ଭାବେ ନେବା ଉଚିତ ନୁହେଁ। ବ୍ରହ୍ମପୁର ଟ୍ରାଫିକ ବ୍ୟବସ୍ଥା ବିପର୍ଯ୍ୟସ୍ଥ। ସହର ଭିତରେ ସନ୍ଧ୍ୟା ସମୟରେ ଭିଡ ଅସହ୍ୟ। କୌଣସି ଅଫିସର ମନ ଲଗାଇ କାମ କରୁନାହାନ୍ତି। ପରବର୍ତ୍ତୀ ବଦଳି ନିର୍ଦ୍ଦେଶକୁ ଅନାଇ ରହୁଛନ୍ତି। କେତେକ ଘଟଣାରେ ପୁଲିସ୍ ସମାଧାନ ପରିବର୍ତ୍ତେ ବିବାଦକୁ ଆହୁରି ଘୋଷାଡୁଥିବା ଶ୍ରୀ ସାହୁ ଅଭିଯୋଗ କରିଛନ୍ତି। ଅଶ୍ୱିନୀ ଆହୁରି କହିଛନ୍ତି ଯେ, ପୁଲିସ୍ ପାଖକୁ କେସ୍ ନେଇ କଲେ ପ୍ରତିପକ୍ଷକୁ ଆରେଷ୍ଟ କିମ୍ବା ଅନୁସନ୍ଧାନ କରୁନାହିଁ। ବରଂ ଏକ କାଉଣ୍ଟର ମାମଲା କରିବା ପାଇଁ ଉସୁକାଉଛି। ତେଣୁ ରାଜ୍ୟ ସରକାର ତୁରନ୍ତ ଏସବୁକୁ ଅନୁଧ୍ୟାନ କରି ବିହିତ ପଦକ୍ଷେପ ନିଅନ୍ତୁ ବୋଲି ସେ ଦାବି କରିଛନ୍ତି। ସୂଚନାଯୋଗ୍ୟ ପୂର୍ବରୁ କେସ୍ ସମାଧାନ ନ କରି କାଉଣ୍ଟର ମାମଲା କରିବା ନେଇ ଏମ୍ ଶ୍ରବଣ ବିବେକଙ୍କୁ ମଧ୍ୟ ବିଦା ହେବାକୁ ପଡିଲା। ସ୍ଥାୟୀ ଆରକ୍ଷୀ ଅଧିକ୍ଷକ ନିଯୁକ୍ତି ନେଇ ବିଭିନ୍ନ ସଙ୍ଗଠନ ମଧ୍ୟ ଦାବି କରି ଆସୁଛନ୍ତି।
