କେଉଁ ୪ଟି ପ୍ରସଙ୍ଗରେ ସୌମ୍ୟ ରଞ୍ଜନ- ଅମିତ ଶାହା କରିଲେ ଆଲୋଚନା…

ଭୁବନେଶ୍ୱର : ସୌମ୍ୟ ରଞ୍ଜନ ପଟ୍ଟନାୟକ ବିଜେଡିରୁ ବହିଷ୍କୃତ ହେବା ପରେ ଗତ ୧୮ ତାରିଖ ଦିନ ଅମିତ ଶାହାଙ୍କୁ ଭେଟିଥିବା ଆଲୋଚନା ହେଉଛି। ହେଲେ ଏହି ଭେଟଘାଟ କେତେ ଫଳପ୍ରଦ ହେବ, ତାହା ସମୟ କହିବ। ନିର୍ବାଚନ ଆସନ୍ନ ହୋଇଥିବାରୁ ଉଭୟଙ୍କ ଭେଟଘାଟକୁ ନେଇ ରାଜନୈତିକ ମହଲରେ ଏକ ଚର୍ଚ୍ଚା ଜୋର ଧରିଛି। ଯେ ଉଭୟଙ୍କ ମଧ୍ୟରେ କେଉଁ କଥାକୁ ନେଇ ଆଲୋଚନା ହୋଇଥିବ।

ଅମିତ ଶାହା ନିଶ୍ଚୟ ସୌମ୍ୟ ରଞ୍ଜନ ପଟ୍ଟନାୟକଙ୍କୁ ବିଜେଡିର କେତେ ବିଧାୟକ ଏବଂ ସାଂସଦ ତାଙ୍କ ସମର୍ଥନରେ ରହିଥିବେ ପଚାରିଥିବେ। ଏହାର କି ଉତ୍ତର ଶ୍ରୀ ପଟ୍ଟନାୟକ ଦେଇଥିବେ, ତାହା ସମୀକ୍ଷକମାନେ ଅନୁମାନ କରିପାରିବେ। ଦ୍ୱିତୀୟତଃ ଜାତୀୟସ୍ତରରେ ଯେପରି ଗଣମାଧ୍ୟମ ଗୁଡ଼ିକୁ କେନ୍ଦ୍ର ସରକାର ଯେପରି ନିୟନ୍ତ୍ରଣ କରୁଛନ୍ତି, ସେହି ଢାଞ୍ଚାରେ ସମ୍ବାଦ ଓ କନକର ସମର୍ପଣ ଶ୍ରୀ ଶାହା ଚାହିଁଥିବେ। ଏ ପ୍ରସ୍ତାବ ସୌମ୍ୟ ବ୍ୟବସାୟିକ ଦୃଷ୍ଟିକୋଣରୁ ଅଧିକ ବିଚାର କରିଥିବେ। କିନ୍ତୁ ଏହା ହୋଇଥିଲେ ସୌମ୍ୟଙ୍କ ସମ୍ବାଦ ଓ କନକ ଏକପାଖିଆ ଭାବେ ରାଜ୍ୟ ସରକାରଙ୍କୁ ବିରୋଧ କରିବ। ହେଲେ କେନ୍ଦ୍ର ସରକାରଙ୍କୁ କରିବ ନାହିଁ। ବର୍ତ୍ତମାନ ସମ୍ବାଦରେ ସ୍ତମ୍ଭ ଲେଖୁଥିବା ରାମଚନ୍ଦ୍ର ଗୁହା, ଯୋଗେନ୍ଦ୍ର ଯାଦବ ଏବଂ ସରଳ ଦାସଙ୍କ ଲେଖା ପ୍ରକାଶ ପାଇବନାହିଁ। ତେଣୁ ଏହା ସମ୍ବାଦର ପୂର୍ବମାନ ହ୍ରାସ କରିବ। ତୃତୀୟତଃ ସୌମ୍ୟ ବାବୁଙ୍କୁ କୌଣସି ରାଜ୍ୟର ରାଜ୍ୟପାଳ ଭାବେ ଅବସ୍ଥାପିତ କରି ତାଙ୍କ ପରିବାରର ଅନ୍ୟ କାହାକୁ ବିଜେପି ନିଜ ଦଳରେ ସାମିଲ କରିପାରେ। ଏହି ତିନୋଟି ପ୍ରସ୍ତାବ ସହ ଅନ୍ୟ ଏକ ରାଜନୈତିକ ବିକଳ୍ପ ନେଇ ମଧ୍ୟ ଆଲୋଚନା କରାଯାଇଥିଲା।

ଚତୁର୍ଥ ରାଜନୈତିକ ବିକଳ୍ପ ଅନୁସାରେ ସୌମ୍ୟ ରଞ୍ଜନ ପଟ୍ଟନାୟକ-ବିଜୟ ମହାପାତ୍ର,  ନବ ନିର୍ମାଣ କୃଷକ ସଙ୍ଗଠନ ତଥା ଅକ୍ଷୟ ଓ ସହଯୋଗୀଙ୍କୁ ନେଇ ଆଞ୍ଚଳିକ ଦଳ ଗଠନ। ଯଦି ସମସ୍ତେ ରାଜି ହୁଅନ୍ତି, ତେବେ ମୋ ଦଳରେ ସୌମ୍ୟ ଏବଂ ବିଜୟଙ୍କ ପରି ବରିଷ୍ଠ ନେତା ମୋ ଦଳରେ ସାମିଲ ହେବେ। ଏହି ଦଳ ବିଜେପି ସହ ମେଣ୍ଟ କରିବ। ବିଜେପି ଏହି ଦଳକୁ ୨ଟି ଲୋକସଭା(ସର୍ବାଧିକ) ଏବଂ ୩୫ରୁ ୩୭ ବିଧାନସଭା ଆସନ ଲଢିବାକୁ ଦେବ। ସୌମ୍ୟ ବାବୁ ଆଞ୍ଚଳିକ ଦଳରେ ରହିବାରୁ ପଟ୍ଟନାୟକ ପରିବାର କଂଗ୍ରେସ ଅନୁଗତମାନେ ମଧ୍ୟ ଉପକୂଳ ଓଡ଼ିଶାରେ ସହଯୋଗ କରିବେ। ନିରଞ୍ଜନ ପଟ୍ଟନାୟକ ସକ୍ରିୟା ରାଜନୀତିରେ ଅଂଶ ଗ୍ରହଣ ନ କରିପାରନ୍ତି। ଅତୀତରେ ଏହାର ଉଦାହରଣ ରହିଛି। ସୌମ୍ୟ ରଞ୍ଜନ ଯେତେବେଳେ ଆମ ଓଡ଼ିଶା ପାର୍ଟି କରିଥିଲେ। ନିରଞ୍ଜନ ନିର୍ବାଚନ ନ ଲଢି ମୂଳ କଂଗ୍ରେସ ପ୍ରାର୍ଥୀଙ୍କ ବିରୋଧରେ ସ୍ୱାଧିନ ଭାବେ ପଟ୍ଟନାୟକ ପରିବାର ଅନୁଗତଙ୍କୁ ଲଢାଇଥିଲେ। ତେଣୁ ଆଗାମୀ ଦିନରେ ଅମିତ ଶାହା ଏବଂ ସୌମ୍ୟ ପଟ୍ଟନାୟକଙ୍କ ଏହି ରଣନୀତି କେତେ ସଫଳ ହେଉଛି, ତାହା ଉପରେ ସମସ୍ତଙ୍କ ନଜର ରହିବ।