କାହା ନିର୍ଦ୍ଦେଶ ଆଉ ଏଜେଣ୍ଡାରେ କାମ କରୁଛି ଓଡ଼ିଶା କଂଗ୍ରେସ, ଖଡ଼ଗେ ଏବଂ ରାହୁଲଙ୍କ କଥାକୁ କାହିଁକି ନାକ ଟେକୁଛି ପିସିସି!
ଭୁବନେଶ୍ୱର- ଆମର ଚାରି ଜଣ ମୁଖ୍ୟମନ୍ତ୍ରୀ ଅଛନ୍ତି। ସେମାନଙ୍କ ମଧ୍ୟରୁ ତିନି ଜଣ ଓବିସି। କଂଗ୍ରେସ କିମ୍ବା ଏନଡିଏ କ୍ଷମତାକୁ ଆସିଲେ ନିଶ୍ଚିତ ଜାତିଭିତ୍ତିକ ଜନଗଣନା ହେବ। ଦେଶର ସରକାରୀ ପଦବୀରେ ଓବିସିଙ୍କ ସଂଖ୍ୟା ବୃଦ୍ଧି କରାଯିବ। ଏହିପରି କେତୋଟି ଲାଇନ୍ ରାହୁଲ ଗାନ୍ଧୀ ବର୍ତ୍ତମାନ ଘୋଷି ହେଉଛନ୍ତି। ହେଲେ ଜନସଂଖ୍ୟାର ଅଧା ଓବିସି ଥିବା ଓଡ଼ିଶାରେ ସଭାପତି, ବିଧାୟକ ଦଳ ନେତା, ପ୍ରଚାର କମିଟି ଅଧ୍ୟକ୍ଷ, ଇସ୍ତାହାର କମିଟି ଅଧ୍ୟକ୍ଷ ସାଧାରଣ ବର୍ଗର। ତେଣୁ ସାଙ୍ଗଠନିକ ସ୍ତରରେ ବହୁଜନ ବର୍ଗକୁ କ୍ଷମତା ଦେଇ ନ ଥିବା କଂଗ୍ରେସ ରାଜ୍ୟରେ କିପରି ପଛୁଆବର୍ଗଙ୍କ ସ୍ୱର ହେବ ବୋଲି ପ୍ରଶ୍ନ ଉଠିଛି।
ବିହାର ଜାତିଭିତ୍ତିକ ଜନଗଣନା ରିପୋର୍ଟ ପ୍ରକାଶ ପାଇବା ପରେ ରାହୁଲ ଗାନ୍ଧୀ, ମଲ୍ଲିକାର୍ଜୁନ ଖଡଗେ ଏହାକୁ ସ୍ୱାଗତ କରିଛନ୍ତି। ଦିଗବିଜୟ ସିଂ ଏହାକୁ ସ୍ୱାଗତ କରିବା ସହ ମଧ୍ୟପ୍ରଦେଶରେ ସରକାର ଆସିଲେ ଲାଗୁ କରିବେ ବୋଲି ଉଲ୍ଲେଖ କରିଛନ୍ତି। ଇଣ୍ଡିଆ ମେଣ୍ଟର ସଂସ୍ତ ସହଯୋଗୀ ଏହାକୁ ସ୍ୱାଗତ କରିଛନ୍ତି। ଆଶ୍ଚର୍ଯ୍ୟର କଥା, ବିଜେଡି ଦଳରେ ଥିବା ବେଳେ ସୌମ୍ୟ ରଞ୍ଜନ ପଟ୍ଟନାୟକଙ୍କ ପାରିବାରିକ ବ୍ୟବସାୟ ସଂସ୍ଥା ଚଢଉ ପରେ ରାଜ୍ୟ କଂଗ୍ରେସ ସଙ୍ଗେ ସଙ୍ଗେ ପ୍ରତିକ୍ରିୟା ପ୍ରକାଶ କରିଥିଲା। ଦିନକ ପାଇଁ ଓ୍ୱାର୍ଡ ମେମ୍ବର ହୋଇ ନ ଥିବା ଆର୍ଯ୍ୟ କୁମାର ଜ୍ଞାନେନ୍ଦ୍ରଙ୍କ ପରି ନେତା ସୌମ୍ୟଙ୍କୁ ହିମାଳୟ ବୋଲି ଅଭିହିତ କରିଥିଲେ। ଏହି ପ୍ରସଙ୍ଗରେ ପିସିସି ସଭାପତିଙ୍କ ବୟାନ ଗୋଟିଏ ବି ଭୋଟ କରାଇବ ନାହିଁ। ମାତ୍ର ସଭାପତି ଡେଇଁ ପଡିଲେ। ହେଲେ ଓଡ଼ିଶାର ବହୁଜନ ବର୍ଗର ଆକାଂକ୍ଷା ସମ୍ପର୍କରେ କଂଗ୍ରେସ ଏଯାଏଁ ନୀରବ ରହିଛି। ବିଧାନସଭା ଜାରି ରହିଥିଲେ ବି ବିଧାୟକ ଦଳ ନେତା ନରସିଂହ ମିଶ୍ର, ମୁଖ୍ୟ ସଚେତକ ତାରା ପ୍ରସାଦ ବାହିନୀପତି, ବରିଷ୍ଠ ବିଧାୟକ ସନ୍ତୋଷ ସିଂ ସାଲୁଜା ଜାତିଭିତ୍ତିକ ଜନଗଣନା ଏବଂ ସାମାଜିକ ନ୍ୟାୟ ସମ୍ପର୍କରେ ମୁହଁ ଖୋଲି ନାହାନ୍ତି। ତେଣୁ କଂଗ୍ରେସର ଆଭିମୁଖ୍ୟ ନେଇ ସାଧାରଣରେ ପ୍ରଶ୍ନବାଚୀ ଉଠିଛି।
