ଅରୁଣଙ୍କ ବିରୋଧରେ ଲଢିବାକୁ ଚାହୁଁ ନାହାନ୍ତି ପ୍ରତ୍ୟୁଷା, ପାଖ ଆସନ ଉପରେ ପକାଇଛନ୍ତି ନଜର …

ନୟାଗଡ଼ : ପ୍ରତ୍ୟୁଷା ରାଜେଶ୍ୱରୀ ସିଂ। ବର୍ତ୍ତମାନ ବିଜେପି ନେତ୍ରୀ। ପୂର୍ବରୁ ବିଜୁ ଜନତା ଦଳର ପ୍ରାର୍ଥିନୀ ଭାବେ କନ୍ଧମାଳ ଲୋକସଭାରୁ ପ୍ରତିନିଧିତ୍ୱ କରିଥିଲେ। ତାଙ୍କ ସ୍ୱାମୀ ହେମେନ୍ଦ୍ର ସିଂ ମଧ୍ୟ କନ୍ଧମାଳରୁ ଏମପି ହୋଇଥିଲେ। ଘଟଣାକ୍ରମରେ ପ୍ରତ୍ୟୁଷା ବିଜେଡିରୁ ଟିକେଟ୍ ମିଳି ନ ବାରୁ ବିଜେପିରେ ଯୋଗ ଦେଇଥିଲେ। ନୟାଗଡ଼ ଏବଂ କନ୍ଧମାଳ ଜିଲ୍ଲାରେ ବିଜେଡି ବିରୋଧରେ ପ୍ରଚାର କରିଥିଲେ। ହେଲେ ସେପରି କିଛି ସୁଫଳ ପାଇ ନ ଥିଲେ।

ବିଜେପିରେ ଥିଲେ ବି ବିଜେଡି ଫେରିବାକୁ ରାଣୀ ମାଙ୍କ ମନ ରହିଛି। କିଛିଦିନ ପୂର୍ବରୁ ପୁରୀ ଲୋକସଭାରେ ଅରୁଣ ସାହୁଙ୍କୁ ପ୍ରାର୍ଥୀ କରିବା ନେଇ ଚର୍ଚ୍ଚା ଜୋର ଧରିଥିଲା। ଏହା ହୋଇଥିଲେ ପ୍ରତ୍ୟୁଷା ନୟାଗଡ଼ରୁ ବିଜେଡିରୁ ବିଧାୟକ ପ୍ରାର୍ଥୀ ହୋଇପାରିବେ। ହେଲେ କେନ୍ଦ୍ର ରାଜନୀତିରେ ଲୋକହସା ହେଉଥିବା ବିଜେଡି ଟିକେଟରେ ଲଢି ଲୋକସଭା ଯିବାକୁ ଅରୁଣ ସାହୁ ଚାହୁଁ ନାହାନ୍ତି। ଏଠି ଜିତିଲେ ମନ୍ତ୍ରୀ ହେବାର ସୁଯୋଗ ରହିବ। ତେଣୁ ସେ ବିଧାନସଭା ଲଢିବାକୁ ହିଁ ଚାହିଁବେ। ରାଣୀ ଏହି କ୍ରମରେ କନ୍ଧମାଳ ଉପରେ ଆଖି ପକେଇ ପାରିବେ ନାହିଁ। ଅଚ୍ୟୁତ ସାମନ୍ତଙ୍କ ଲବି ଆଗରେ ସେ ଦୁର୍ବଳ ପଡି ଯାଉଛନ୍ତି। ତେଣୁ ରାଣୀ ମା କୁଆଡେ ରଣପୁର ଉପରେ ଆଖି ପକାଉଛନ୍ତି। ପ୍ରତିଥର ଏହି ଆସନରେ ବିଜେଡି ବିଧାୟକ ପ୍ରାର୍ଥୀ ବଦଳାଉଥିବାରୁ ରାଣୀ ମା ଆଶାବାଦୀ ରହିଛନ୍ତି। ହେଲେ ଏହି ଆଶା ପୂରଣ ହେଉଛି କି ନିରାଶାରେ ପରଣିତ ହେଉଛି, ତାହା ସମୟ କହିବ।