ବବି, ପାଣ୍ଡିଆନଙ୍କୁ ମନଇଚ୍ଛା ଶୁଣାଇଲେ ପ୍ରଭାତ, କହିଲେ କର୍ମଫଳ ମିଳିଛି..
ସାଧାରଣ ନିର୍ବାଚନ ସରିଲା। ବିଜେଡି ନିଜ ରାଜନୈତିକ ଯାତ୍ରାର ପ୍ରଥମ ପରାଜୟ ଚାଖିଲା। ଏହା ପରେ ବିଜେଡିର ଦ୍ୱିତୀୟ ମୁଖ୍ୟ ଭିକେ ପାଣ୍ଡିଆନ ଏବଂ ସଙ୍ଗଠନ ସମ୍ପାଦକ ପ୍ରଣବ ପ୍ରକାଶ ଦାସଙ୍କୁ ଅନେକ କ୍ଷେତ୍ରରେ ଟାର୍ଗେଟ କରାଯାଇଥିଲା। ଏହା ମଧ୍ୟରେ ଭିକେ ପାଣ୍ଡିଆନଙ୍କୁ ନେଇ ମଧ୍ୟ ଗଣମାଧ୍ୟମରେ ବିଭିନ୍ନ ଖବର ପ୍ରସାରିତ ହୋଇଥିଲା। ଶେଷରେ ବିଜେଡିର ରାଜ୍ୟସଭା ଏମପି ସସ୍ମିତ ପାତ୍ର ଭିକେ ପାଣ୍ଡିଆନ ନବୀନଙ୍କ ନିର୍ଦ୍ଦେଶ କ୍ରମେ ନୂଆଦିଲ୍ଲୀ ଗସ୍ତ କରିଥିବା କହିଥିଲେ। ନବୀନ ପଟ୍ଟନାୟକ ନିଜେ ମଧ୍ୟ ଭିକେ ପାଣ୍ଡିଆନ ସପକ୍ଷରେ ଛିଡା ହୋଇଥିଲେ। ଯାହା ସାଧାରଣ ଭାବେ ବିଜେଡି ଶିବିରରେ ଏହାକୁ ଭଲ ଭାବେରେ ଦେଖା ଯାଇ ନ ଥିଲା। କିଛିଦିନ ବ୍ୟବଧାନ ପରେ ପୁଣି ଦଳ ଭିତରେ ଭିକେ ପାଣ୍ଡିଆନ ଏବଂ ପ୍ରଣବ ପ୍ରକାଶ ଦାସଙ୍କୁ ନେଇ ପ୍ରଶ୍ନ ଉଠିଛି।
ଗତକାଲି ପରାଜୟକୁ ନେଇ ସିଧାସଳଖ ଭି. କେ. ପାଣ୍ଡିଆନ ଓ ବିଜେଡିର ସଙ୍ଗଠନ ସଂପାଦକ ପ୍ରଣବପ୍ରକାଶ ଦାସ (ବବି)ଙ୍କୁ ଟାର୍ଗେଟ କରିଥିଲେ ପୂର୍ବତନ ବିଧାୟକ ପ୍ରଭାତରଂଜନ ବିଶ୍ବାଳ। ତାଙ୍କ ପୁତ୍ର ସୌଭିକ ବିଶ୍ୱାଳ ବର୍ତ୍ତମାନ ସେଠାରେ ବିଧାୟକ ଭାବେ ନିର୍ବାଚିତ ହୋଇଛନ୍ତି। ପ୍ରଭାତ ଏହି ସଭାରେ କହିଥିଲେ ଯେ, ବବି ଓ ତାଙ୍କ ମା’ ନିର୍ବାଚନରେ ହାରିବା ଘଟଣା ହେଉଛି ସେମାନଙ୍କର କର୍ମଫଳ। ପାଣ୍ଡିଆନ ଯେତେବେଳେ ନିର୍ବାଚନ ପୂର୍ବରୁ ସାରା ରାଜ୍ୟ ଗସ୍ତ କରିବା ଆରମ୍ଭ କଲେ, ସେତେବେଳେ ଲୋକଙ୍କ ଭିତରେ ତାହାକୁ ନେଇ ସୃଷ୍ଟି ହେଉଥିବା ପ୍ରତିକ୍ରିୟା ସଂପର୍କରେ ସେ ନିଜେ ଦଳର ମୁଖ୍ୟ ନବୀନ ପଟ୍ଟନାୟକଙ୍କୁ ଭେଟି ସୂଚାଇଥିଲେ। ଅନୁରୂପ ଭାବେ ବହୁଚର୍ଚ୍ଚିତ ତାମିଲ ବିପଦ ସଂପର୍କରେ ବି ଅବଗତ କରିଥିଲେ ବୋଲି ଶ୍ରୀ ବିଶ୍ୱାଳ କହିଥିଲେ। ଏମିତିକି ୨୦୧୯ ନିର୍ବାଚନ ପରେ ଯେତେବେଳେ ମନ୍ତ୍ରିମଣ୍ଡଳ ଗଠନ ହେଲା, ସେତେବେଳେ ସୌମ୍ୟରଂଜନ ପଟ୍ଟନାୟକଙ୍କୁ ମନ୍ତ୍ରୀ କରିବା ପାଇଁ ସେ ଲେଖି କରି ଦେଇଥିଲେ ବି ସେମାନେ ସେହି କାଗଜକୁ ଚିରି ଫିଙ୍ଗି ଦେଇଥିଲେ। ତାଙ୍କ ବିରୋଧରେ ଚୌଦ୍ବାର-କଟକ ନିର୍ବାଚନମଣ୍ଡଳୀରେ ଲୋକଙ୍କୁ ଉସୁକାଇବା କାମ ସେମାନେ କରି ଆସୁଥିଲେ। କିଏ ଚୋର ଆଉ କିଏ ସାଧୁ, ତାର ସବୁ ପ୍ରମାଣ ତାଙ୍କର ମୋବାଇଲ୍ ଫୋନରେ ଅଛି। ନିଜେ ଚୋରି କରି ତାଙ୍କ ମୁଣ୍ଡରେ ସେମାନେ ଅଠା ବୋଳିବାକୁ ଚେଷ୍ଟା କରିଛନ୍ତି। ପ୍ୟାରୀ ବାବୁଙ୍କୁ ନେଇ ମେ’ ୨୯ ଘଟଣାରେ ତାଙ୍କ ବିରୋଧରେ ଷଡ଼ଯନ୍ତ୍ର କରିଛନ୍ତି। ସେ ସବୁର ଫଳ ଏବେ ସେମାନେ ପାଉଛନ୍ତି ବୋଲି ପ୍ରଭାତ କହିଛନ୍ତି। ସେ ପାଣ୍ଡିଆନଙ୍କୁ କହିଥିଲେ, ନବୀନ ବାବୁଙ୍କ ଆଗରେ ନ ରହି ପଛରେ ରହିଲେ ଭଲ ବୋଲି। କିନ୍ତୁ ସ୍ଥିତି ଏମିତି ହେଲା ଯେ ପାଣ୍ଡିଆନ ଆଉ ବବିଙ୍କ ଫଟୋ ଥିବା ପୋଷ୍ଟର ମାରିବାକୁ କୁହାଗଲା। ଏହା ଦଳର ବହୁତ ବଡ଼ କ୍ଷତି କଲା ବୋଲି ପ୍ରଭାତ କହିବା ସହ ବର୍ଷିଥିଲେ।
