ପୁଣି ରାଜରାସ୍ତାରେ ଚାଲିବେ ରାହୁଲ ଗାନ୍ଧୀ, ଏଥର ଆସିବେ ଓଡ଼ିଶା
ନୂଆଦିଲ୍ଲୀ : ଆସନ୍ତା ଜାନୁଆରୀ ୧୪ ତାରିଖରୁ କଂଗ୍ରେସ ସାଂସଦ ରାହୁଲ୍ ଗାନ୍ଧୀ ‘ଭାରତ ଯୋଡ଼ୋ ଯାତ୍ରା’ର ଦ୍ୱିତୀୟ ସଂସ୍କରଣ ‘ଭାରତ ନ୍ୟାୟ ଯାତ୍ରା’ରେ ବାହାରିବେ ବୋଲି ଜଣାପଡିଛି। ଏନେଇ ଆଜି କଂଗ୍ରେସର ସାଧାରଣ ସମ୍ପାଦକ କେ. ସି. ବେଣୁଗୋପାଳ ଗଣମାଧ୍ୟମକୁ ସୂଚନା ଦେଇଛନ୍ତି। ବେଣୁଗୋପାଳ କହିଛନ୍ତି ଯେ, ପ୍ରଥମ ‘ଭାରତ ଯୋଡ଼ୋ ଯାତ୍ରା’ର ବିପୁଳ ଅନୁଭୂତିକୁ ସମ୍ବଳ କରି ଏଥର ରାହୁଲ୍ ଗାନ୍ଧୀ ଆଉ ଏକ ଯାତ୍ରାରେ ବାହାରିବେ। ଏହି ଯାତ୍ରାରେ ରାହୁଲ୍ ଗାନ୍ଧୀ ଯୁବକ, ମହିଳା ଓ ବଞ୍ଚିତବର୍ଗଙ୍କ ସହିତ ଭାବ ଆଦାନପ୍ରଦାନ କରିବେ। ଜାନୁଆରି ୧୪ ତାରିଖ ଦିନ କଂଗ୍ରେସ ମୁଖ୍ୟ ମଲ୍ଲିକାର୍ଜୁନ ଖଡ୍ଗେ ମଣିପୁରରେ ଏହି ‘ଭାରତ ନ୍ୟାୟ ଯାତ୍ରା’ର ଶୁଭାରମ୍ଭ କରିବେ ବୋଲି ଜଣାପଡିଛି। ସାଧାରଣ ଜନତାଙ୍କ ପ୍ରତି ଅଧିକ ଉନ୍ମୁକ୍ତ ରହିବା ଉଦ୍ଦେଶ୍ୟରେ ବସ୍ ପରିବହନ ଜରିଆରେ ‘ଭାରତ ନ୍ୟାୟ ଯାତ୍ରା’ ଚାଲିବ। ଯାତ୍ରା ମଝିରେ କିଛି କିଛି ଅଞ୍ଚଳରେ ପଦଯାତ୍ରା ମଧ୍ୟ କରାଯିବ ବୋଲି ଜଣାପଡିଛି। ଅନୁରୂପ ଭାବରେ ଉତ୍ତର-ପୂର୍ବ ରାଜ୍ୟ ମଣିପୁରରୁ ଆରମ୍ଭ ହୋଇ ମହାରାଷ୍ଟ୍ରର ମୁମ୍ବାଇରେ ଏହି ଯାତ୍ରା ଶେଷ ହେବ। ୧୪ଟି ରାଜ୍ୟର ପ୍ରାୟ ୮୫ଟି ଜିଲ୍ଲା ଦେଇ ରାହୁଲ୍ ଗାନ୍ଧୀଙ୍କର ଏହି ଯାତ୍ରା ଚାଲିବ। ମଣିପୁର, ନାଗାଲାଣ୍ଡ୍, ଆସାମ, ମେଘାଳୟ, ପଶ୍ଚିମବଙ୍ଗ, ବିହାର, ଝାଡ଼ଖଣ୍ଡ, ଓଡ଼ିଶା, ଉତ୍ତର ପ୍ରଦେଶ, ମଧ୍ୟପ୍ରଦେଶ, ଛତିଶଗଡ଼, ରାଜସ୍ଥାନ, ଗୁଜରାଟ ଓ ମହାରାଷ୍ଟ୍ର ରାଜ୍ୟ ଦେଇ ‘ଭାରତ ନ୍ୟାୟ ଯାତ୍ରା’ ୬,୨୦୦ କିଲୋମିଟର୍ ଅତିକ୍ରମ କରିବ। ‘ଭାରତ ନ୍ୟାୟ ଯାତ୍ରା’ରେ ଓଡ଼ିଶା ଆସିବେ କଂଗ୍ରେସ ନେତା ରାହୁଲ ଗାନ୍ଧୀ। ତେବେ ଓଡ଼ିଶାର କେଉଁ ସ୍ଥାନକୁ ରାହୁଲ ଆସବେ, ତାହା ସ୍ପଷ୍ଟ ହୋଇନାହିଁ।
