ରଜନୀକାନ୍ତ ସିଂହଙ୍କୁ ବିଧାୟକ ଟିକେଟ୍ ଦେବାକୁ ଚାହୁଁ ନାହାନ୍ତି କି ବିଜେଡି ମୁଖିଆ ?
ଅନୁଗୋଳ : ଅନୁଗୋଳ ଵିଧାୟକ ରଜନୀକାନ୍ତ ସିଂହ ଉପବାଚସ୍ପତି ପଦ ଛାଡିବା ପରେ ତାଙ୍କ ରାଜନୈତିକ ଭବିଷ୍ୟତ ନେଇ ନିର୍ବାଚନମଣ୍ଡଳୀ ଆଲୋଚନା ଜାରି ରହିଛି। ଅନୁଗୋଳ ଜିଲ୍ଲାରେ ମଣ୍ଟୁବାବୁ ଭାବରେ ପରିଚିତ ଶ୍ରୀ ସିଂହ ଏଠାରୁ ଲଗାତାର ଚାରିଥର ବିଧାୟକ ହୋଇ ଗଲେଣି। ଦୀର୍ଘ ସମୟ ଧରି ସେ ଉପ-ବାଚସ୍ପତି ପଦ ମଧ୍ୟ ଅଳଙ୍କୃତ କରିଥିଲେ। ପୂର୍ବରୁ ଜିଲ୍ଲା ସଭାପତି ଦାୟିତ୍ୱରେ ମଧ୍ୟ ଦୀର୍ଘଦିନ କାର୍ଯ୍ୟ କରୁଥିଲେ।
ଅନୁଗୋଳ ଜିଲ୍ଲାରେ ତାଙ୍କୁ ବାଦ୍ ଦେଇ ଚାରି ଚାରି ଜଣ ବିଧାୟକ ,ପୁଣି ଦୁଇ ପୂର୍ବତନ ନଗରପାଳ ଥିଲେ ମଧ୍ୟ ସେ ତାଙ୍କର ଏକାନ୍ତ ଅନୁଗତ ମହେନ୍ଦ୍ର ବସ୍ତିଆଙ୍କୁ ଜିଲ୍ଲା ସଭାପତି ପଦରେ ବସାଇ ସଙ୍ଗଠନକୁ ନିଜ ମନ ମୁତାବକ ଚଳାଇବା ଚେଷ୍ଟାରେ ,ଆଉ ତାଙ୍କ ଅନୁପସ୍ଥିତରେ ତାଙ୍କ ପୁତ୍ର ଅରୁଣାଭଙ୍କୁ ସବୁଠି ଦେଖିବାକୁ ମିଳୁଛି । କିନ୍ତୁ ଶ୍ରୀ ସିଂହଙ୍କ ଭଳି ତାଙ୍କ ପୁତ୍ର ସମସ୍ତଙ୍କ ଆସ୍ଥା ଭାଜନ ହୋଇ ପାରୁନାହାନ୍ତି। କିଛିଦିନ ହେବ ଜିଲ୍ଲାର ଜଣେ ପ୍ରମୁଖ ଶିକ୍ଷା ବ୍ୟବସାୟୀ ମହେଶ ଧଳଙ୍କୁ ଦଳୀୟ କାର୍ଯ୍ୟକ୍ରମରେ ଅଧିକ ଦେଖିବାକୁ ମିଳିବା କର୍ମୀ ମହଲରେ ଭିନ୍ନ ସଙ୍କେତ ଦେଉଛି। ସେ ଅନୁଗୋଳ ବିଜେଡି ବିଧାୟକ ଟିକେଟର ଅନ୍ୟତମ ଅଂଶୀଦାର ବୋଲି କୁହାଯାଉଛି। ମଣ୍ଟୁଙ୍କ ସମ୍ପର୍କୀୟ କୁହନ୍ତି ଯେ, ନିଜ ବଦଳରେ ଅନ୍ୟ ନେତାଙ୍କ ଭଳି ପୁତ୍ରକୁ ଥଇଥାନ କରିବା ଯୋଜନା ଫଳପ୍ରଦ ହେବାର ଆଶା କ୍ଷୀଣ । ତେଣୁ ମଣ୍ଟୁବାବୁ ଅଧିକ ସକ୍ରିୟତା ଦେଖାଉଛନ୍ତି।
ଜିଲ୍ଲା ସଭାପତି , ଉପବାଚସ୍ପତି ଆଦି ପଦରେ ରହିଥିବାରୁ ଜିଲ୍ଲାରେ ମଣ୍ଟୁଙ୍କର ପରିଚିତି ରହିଛି। ତେଣୁ ଅନୁଗୋଳ ବିଜେଡିରୁ ନୂଆ ବିଧାୟକ ପ୍ରାର୍ଥୀ ଦେଇ ମଣ୍ଟୁଙ୍କ ଆସନ ପରିବର୍ତ୍ତନ କରିପାରେ। ଏହା ହେଲେ ବିଜେଡ଼ି ଗୋଟିଏ ଗୁଳିରେ ଅନେକ ରାଜନୈତିକ ଶୀକାର କରିବ। ମଣ୍ଟୁ ସିଂହଙ୍କ ବଦଳରେ ନୂଆ ବିଧାୟକ ପ୍ରାର୍ଥୀ ହୋଇପାରିବେ, ବର୍ତ୍ତମାନ ସାଂସଦ ଥିବା ମହେଶ ସାହୁଙ୍କୁ ଅବ୍ୟାହତି ଦିଆଯାଇ ପାରିବ। ତାଙ୍କୁ ତାଙ୍କ ପୁରୁଣା ବିଧାନସଭା ଆସନରୁ ଲଢାଇ ଦିଆଯିବ। ତେଣୁ ବରିଷ୍ଠ ନେତା ମଣ୍ଟୁ ସିଂ ବିଜେଡିର ଢେଙ୍କାନାଳ ଏମପି ପ୍ରାର୍ଥୀ ହେବାର ସମ୍ଭାବନା ରହିଛି। ଯଦି ବିଜେପିରୁ ରୁଦ୍ର ପାଣି କିମ୍ବା ଧର୍ମେନ୍ଦ୍ର ପ୍ରଧାନ ପ୍ରାର୍ଥୀ ହେବାର ରହିଛି। ତେଣୁ ମଣ୍ଟୁଙ୍କୁ ନେଇ ବିଜେଡି ସୁପ୍ରିମୋଙ୍କ କଣ ଯୋଜନା ରହିଛି, ତାହା ଉପରେ ଅନୁଗୋଳ ରାଜନୈତିକ ବର୍ଗର ନଜର ରହିଛି।
