ନବାନ୍ନ ଘେରାଉ କାହାର ପ୍ରତିଫଳନ ଥିଲା ?
କୋଲକାତା : (ବିଜୟ ସାହୁ)-RG KAR ମେଡ଼ିକାଲରେ ନୃଶଂସ ଦୁଷ୍କର୍ମ ଓ ହତ୍ୟାର ଏକ Political Twist ଥିଲା ନବାନ୍ନ ବା ପଶ୍ଚିମବଙ୍ଗ ନୂତନ ସଚିବାଳୟ ଅଭିଯାନ । ଗତ ୨୭ ତାରିଖରେ ପ୍ରତିବାଦକାରୀଙ୍କ କ୍ଷୋଭର ବର୍ଷଣ ଦେଖା ଯାଇଥିଲା । ହାୱଡା ଓ କଲିକତାର ଯମଜ ସହର ଗୁଡିକରୁ ଯୁବକମାନେ ଅପରାହ୍ନରେ ବିଭିନ୍ନ କୋଣରେ ବହୁ ସଂଖ୍ୟାରେ ବିକ୍ଷୋଭ ପ୍ରଦର୍ଶନ କରି ମମତା ବାନାର୍ଜୀଙ୍କର ଇସ୍ତଫା ଦାବୀ କଲେ । ସେମାନଙ୍କ ଦାବୀ ଥିଲା ମମତା ବାନାର୍ଜୀଙ୍କ ହାତରେ ସ୍ୱାସ୍ଥ୍ୟ ଓ ଗୃହ ମନ୍ତ୍ରଣାଳୟ ଥିବା ହେତୁ ୯ ଅଗଷ୍ଟ ନୃଶଂସ ଦୁଷ୍କର୍ମ ଓ ହତ୍ୟା ପାଇଁ ନୈତିକ ଦାୟିତ୍ବ ନେଇ ଇସ୍ତଫା ଦିଅନ୍ତୁ । ଦୀର୍ଘ ସମୟ ପର୍ଯ୍ୟନ୍ତ ସେମାନେ ସଚିବାଳୟ ନିକଟକୁ ଯିବା ଉଦ୍ୟମ କରିବାରୁ ନିରାପତ୍ତା ରକ୍ଷୀ ଓ ବିକ୍ଷୋଭକାରୀଙ୍କ ମଧ୍ୟରେ ସଂଘର୍ଷ ହେଇଥିଲା । ବିଜେପି ରାଜ୍ୟ ସଭାପତି ସୁକାନ୍ତ କୁମାର ମଜୁମଦାର ଏହାର ପରଦିନ ମଧ୍ୟ ୧୨ ଘଣ୍ଟିଆ ବନ୍ଦ ଡାକରା ଦେଇଛନ୍ତି ।
ପୋଲିସ ବିକ୍ଷୋଭକାରୀଙ୍କୁ ନିୟନ୍ତ୍ରଣ କରି ନ ପାରି ଅନ୍ତତଃ ପକ୍ଷରେ ଡଜନେ ସ୍ଥାନରେ ପୋଲିସ ଲାଠିଚାର୍ଜ କରିଛି । ବିକ୍ଷୋଭକାରୀମାନେ ଲାଠିଚାର୍ଜ ବେଳେ ସାମୟିକ ପଛ ଘୁଞ୍ଚା ଦେଇ ପୁଣି ସଂଗଠିତ ହେଇ ନବାନ୍ନ ରାସ୍ତାରେ ପହଞ୍ଚୁ ଥିଲେ । ଯଦିଓ ସେମାନେ କେତେକ ସ୍ଥାନରେ ପୋଲିସ କର୍ଡନ ଭାଙ୍ଗିଥିଲେ, ତଥାପି ନବାନ୍ନ ପାଖାପାଖି ଆସି ପାରି ନ ଥିଲେ । କାରଣ ପୋଲିସ ଅଭେଦ୍ୟ ଦୁର୍ଗ କରିଥିଲା । ଜନତାଙ୍କୁ ନିୟନ୍ତ୍ରଣ କରିବା ପାଇଁ ପୋଲିସ ଲୁହ ବୁହା ଗ୍ୟାସ, ବାଷ୍ପ ବୋମା, ଜଳ କାନନ , ଲାଠିଚାର୍ଜ ହେଇଥିଲା । ପୋଲିସର କଣ୍ଟା ବ୍ୟାରିକେଡ ଭାଙ୍ଗିବାକୁ ଅନେକ ବିକ୍ଷୋଭକାରୀ ଓ ପୋଲିସ ରକ୍ତାକ୍ତ ହେଇଥିଲେ । ଏହାର ରାଜନୈତିକ ଦିଗକୁ ଆମେ ଆଲୋଚନା କରିବା। ତେବେ ସିବିଆଇ ଘଟଣାର ତଦନ୍ତ କରୁଛି ଓ ସୁପ୍ରିମକୋର୍ଟ ଏହା ଉପରେ ସର୍ବାଧିକ ଗୁରୁତ୍ୱ ଦେଉଛି । କିନ୍ତୁ ତିନି ସପ୍ତାହ ବିତି ଯାଇଥିଲେ ମଧ୍ୟ କେତେକ ଅମୀମାଂଶିତ ପ୍ରଶ୍ନ ରହି ଯାଇଛି । କିଛି ଦିନ ପୂର୍ବରୁ ପଶ୍ଚିମବଙ୍ଗ ଛାତ୍ର ସଙ୍ଘ ନାମରେ ଏକ ଅଜଣା ସଂଗଠନ ଏହି ଅଭିଯାନ ପାଇଁ ଆହ୍ୱାନ ଦେଇଥିଲା । ପୋଲିସ ଏହି ଅଭିଯାନକୁ ବେ ଆଇନ ଘୋଷଣା କରି ୧୪୪ ଧାରା ଜାରି କରିଥିଲା । ପୋଲିସ ଏହି ସଂଗଠନଟି ବିଜେପି ଓ ଏହାର ସମ୍ପର୍କିତ ସଂଗଠନର ବୋଲି ଘୋଷଣା କରିଥିଲା ।
ସାମ୍ବାଦିକ ସମ୍ମିଳନୀରେ ଛାତ୍ରନେତା ମାନେ ମଧ୍ୟ ପୋଲିସର ଅଭିଯୋଗକୁ ଅସ୍ବୀକାର କରି ନ ଥିଲେ । ଛାତ୍ର ନେତା ମାନେ କହିଥିଲା ସେମାନେ ବିନା ଝଣ୍ଡା ରେ ଏହି ଅଭିଯାନ କରିବେ ଓ ସହରର ପ୍ରତ୍ୟେକ ଘରୁ ଦଳ ମତ ନିର୍ବିଶେଷରେ ଜଣେ ଲେଖାଏଁ ଯୋଗ ଦେବାକୁ ନିବେଦନ କରିଥିଲେ । ସେମାନେ ୧୪ ଅଗଷ୍ଟ ର Reclaim The Night ଭଳି ନାଗରିକ ସମାଜ ହାତରେ ଜାତୀୟ ପତାକା ଧରି ଯୋଗ ଦେବେ ବୋଲି ଆଶା କରିଥିଲେ । କିନ୍ତୁ ୧୪ ଅଗଷ୍ଟ ଭଳି ସାଧାରଣ ଛାତ୍ର ଓ ନାଗରିକ ଯୋଗ ଦେଇ ନ ଥିଲେ । ସେମାନେ ଜାଣି ପାରିଥିଲେ ଏହି ଅଭିଯାନ ବିଜେପିର ଏକ ରାଜନୈତିକ ଏଜେଣ୍ଡା କାର୍ଯ୍ୟକ୍ରମ । କାରଣ ପଶ୍ଚିମ ବଙ୍ଗ ଛାତ୍ର ସମାଜ ଡାକରାକୁ ବିଜେପି ରାଜ୍ୟ କମିଟି ତୁରନ୍ତ ସମର୍ଥନ କରିଥିଲା । ବାମପନ୍ଥୀ ଦଳମାନେ ଆନୁଷ୍ଠାନିକ ଭାବେ ଘୋଷଣା କରିଥିଲେ ଯେ ସେମାନେ ଏଥିରେ ଯୋଗ ଦେବେ ନାହିଁ । ଆନ୍ଦୋଳନକାରୀ ଡାକ୍ତର ମାନେ ମଧ୍ୟ ଏଥିରେ ସାମିଲ ହେବେ ନାହିଁ ବୋଲି ଘୋଷଣା କରିଥିଲେ । ଅନ୍ୟ ପକ୍ଷରେ ପୋଲିସ ବିକ୍ଷୋଭ କାରୀଙ୍କୁ ରୋକିବା ପାଇଁ 10 ଫୁଟ ଉଚ୍ଚ ବ୍ୟାରିକେଡ , ଜେସିଭି ସାହାଯ୍ୟରେ କଣ୍ଟେନର ଲାଇନ ବ୍ୟାରିକେଡ, ଅନ୍ୟାନ୍ୟ ଅବରୋଧ କାରୀ ବ୍ୟବସ୍ଥା କରିଥିଲେ । Rapid Action force, ମହିଳା କମାଣ୍ଡୋ ବହୁ ସଂଖ୍ୟାରେ ମୁତୟନ କରି ଥିଲେ ।ମମତା ବାନାର୍ଜୀ ଘୋଷଣା କରିଥିଲେ ପରିସ୍ଥିତି ଯାହା ହେଲେ ବି ଗୁଳି ଚାଳନା ହେବ ନାହିଁ । ତେଣୁ ପୋଲିସ କୌଣସି Fire Arm ଧରି ନ ଥିଲେ । ପୋଲିସ ସହ ସଂଘର୍ଷରେ ଅନେକ ବିଜେପି କର୍ମୀ , ସଂଗଠକ ଆହତ ହେଇଛନ୍ତି, ପୋଲିସ ମଧ୍ୟ ରକ୍ତାକ୍ତ ହେଇଛି । ଅଭିଯାନ ପୂର୍ଵ ଦିନ ବିଜେପିର ୪ ଜଣ ଛାତ୍ର ଓ ଯୁବ ନେତାଙ୍କୁ ଉତ୍ତେଜନାକାରୀ Fake Video ଛାଡିବା ଅଭିଯୋଗରେ ଗିରଫ କରି ହାଜତକୁ ନେଇଛି । ରାଜ୍ୟ ପୋଲିସ କର୍ତ୍ତୃପକ୍ଷଙ୍କ ପାଖରେ ସୋସିଆଲ ମିଡ଼ିଆ ସୂତ୍ରରୁ ଗୋଇନ୍ଦା ସୂଚନା ଥିଲା ଯେ ଅଭିଯାନ ଦିନ ଏକ ବଡ଼ ଧରଣର ହିଂସାକାଣ୍ଡ ଓ ବିଶୃଙ୍ଖଳା କରିବା ଯୋଜନା ହେଇଛି ।
୨୭ ତାରିଖ ଅଭିଯାନ ସେଥିରୁ ବର୍ତ୍ତି ଯାଇଛି । ଏଠାରେ ଲକ୍ଷଣୀୟ ଯେ ବିଜେପିର Political Twist ଯୋଗୁଁ ଘଟଣା ପର ଠାରୁ ଯେଭଳି ସାଧାରଣ ଜନତା, ମହିଳା, ଛାତ୍ରଛାତ୍ରୀ,ଡାକ୍ତରୀ ଛାତ୍ରଛାତ୍ରୀ, ସ୍କୁଲ ଛାତ୍ରଛାତ୍ରୀ, ବୁଦ୍ଧିଜୀବୀ ଦଳ ମତ ନିର୍ବିଶେଷରେ ଏକଜୁଟ ହେଇ ରାସ୍ତାକୁ ଆସୁଥିଲେ 27 ତାରିଖରେ ତାହା ପରିଦୃଶ୍ୟ ହେଇ ନ ଥିଲା । ବିଜେପିର ନିଜସ୍ଵ କାର୍ଯ୍ୟକ୍ରମ ଯୋଗୁଁ ଏହା ବିଶେଷ ପ୍ରଭାଵ ପକେଇ ପାରି ନାହିଁ । ରାଜନୀତି ନିଜ ରାସ୍ତାରେ ଚାଲିବ , କିନ୍ତୁ ସମସ୍ତେ ଆଶା କରୁଛନ୍ତି ଘଟଣାର ଗୁରୁତ୍ୱ ହ୍ରାସ ନ ହେଉ ଓ ରାଜ୍ୟର ସାମୁହିକ ଚେତନା ଦୁର୍ବଳ ନ ହେଉ )
