ମୋଦିଙ୍କୁ ସୋନିଆଙ୍କ ଚିଠି, କେଉଁ ଦାବି ଦଳର ହୃତ ଗୌରବ ଫେରାଇ ଆଣିପାରେ…ଜାଣନ୍ତୁ
ନୂଆଦିଲ୍ଲୀ : ପ୍ରିୟ ପ୍ରଧାନମନ୍ତ୍ରୀ I ସଂସଦର ଆସନ୍ତା ସ୍ୱତନ୍ତ୍ର ଅଧିବେଶନରେ କଣ କାର୍ଯ୍ୟସୂଚୀ ରହିଛି । ସେ ନେଇ ସମସ୍ତଙ୍କୁ ଅବଗତ କରାନ୍ତୁ । ସ୍ୱତନ୍ତ୍ର ଅଧିବେଶନ ଡକା ଯାଇଥିବାରୁ ଅନ୍ୟ କେତେକ ଗୁରୁତ୍ଵପୂର୍ଣ ପ୍ରସଙ୍ଗରେ ଆଲୋଚନା କରିବା ନେଇ କଂଗ୍ରେସ ନେତ୍ରୀ ସୋନିଆ ଗାନ୍ଧୀ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ପରାମର୍ଶ ଦେଇଛନ୍ତି। ଏନେଇ ସୋନିଆ ଗାନ୍ଧୀ ପ୍ରଧାନମନ୍ତ୍ରୀ ଶ୍ରୀ ମୋଦିଙ୍କୁ ଚିଠି ଲେଖି ଅବଗତ କରିଛନ୍ତି ।
ଚିଠିରେ ଏକାଧିକ ସାମାଜିକ ଏବଂ ଆର୍ଥିକ ପ୍ରସଙ୍ଗରେ ସୋନିଆ ଉଲ୍ଲେଖ କରିଛନ୍ତି । ଏହି ଚିଠିରେ ସୋନିଆ ଗାନ୍ଧୀ ଅଣୁ, କ୍ଷୁଦ୍ର ଓ ମଧ୍ୟମ ଶିଳ୍ପର ବିକାଶ। ଧାନର ସର୍ବନିମ୍ନ ସହାୟକ ମୂଲ୍ୟ ବୃଦ୍ଧି । ଅଦାନୀ ସାମ୍ରାଜ୍ୟର ଅନିୟମିତତା ନେଇ ଯୁଗ୍ମ ସଂସଦୀୟ କମିଟି ଦ୍ୱାରା ଯାଞ୍ଚ କରିବା ନେଇ ଗାନ୍ଧୀ କହିଛନ୍ତି। ଅନୁରୂପ ଭାବେ ମଣିପୁର ଓ ହରିୟାଣାର ସାମ୍ପ୍ରଦାୟିକ ହିଂସା, ଚୀନର ବିସ୍ତାରବାଦୀ ନୀତିର ସମାଲୋଚନା, ସଂଘୀୟ ବ୍ୟବସ୍ଥାରେ ଉନ୍ନତି ଏବଂ କେତେକ ରାଜ୍ୟର ବିପର୍ଯ୍ୟୟକୁ ଜାତୀୟ ବିପର୍ଯ୍ୟୟର ମାନ୍ୟତା ଦେବା ପାଇଁ ସୋନିଆ ଚିଠିରେ ଅନୁରୋଧ କରିଛନ୍ତି। ଶେଷରେ ଦେଶର ଜାତିଭିତ୍ତିକ ଜନଗଣନା ନେଇ କେନ୍ଦ୍ର ସରକାର ପ୍ରକ୍ରିୟା ଆରମ୍ଭ କରନ୍ତୁ ବୋଲି ସୋନିଆ ଗାନ୍ଧୀ କହିଛନ୍ତି । ବର୍ତ୍ତମାନ ସମୟରେ ଏହା ବହୁତ ବଡ କଥା। କଂଗ୍ରେସର ଶୀର୍ଷ ନେତୃତ୍ବ ସାମାଜିକ ନ୍ୟାୟର ପ୍ରଥମ ସୋପାନ ଜାତିଭିତ୍ତିକ ଜନଗଣନା ଦାବି କରିଛନ୍ତି। ୟୁପିଏ ସରକାର ସମୟରେ ପ୍ରଣବ ମୁର୍ଖାଜୀ, ଚିଦାମ୍ବରମ ଏହା ବିପକ୍ଷରେ ରହିଥିଲେ । ତେଣୁ ସୋନିଆଙ୍କ ଏହି ଚିଠି ବିଭିନ୍ନ ରାଜ୍ୟର କଂଗ୍ରେସ ସଙ୍ଗଠନ ଓ ରାଜନୀତିରେ ପରିବର୍ତ୍ତନ ଆଣିପାରେ ବୋଲି ରାଜନୈତିକ ସମୀକ୍ଷକମାନେ କହିଛନ୍ତି।
