ଜଣେ ଅଫିସର କାହିଁକି ଅଭିଯୋଗ ଶୁଣାଣି ପାଇଁ ବୁଲିବେ : ଶ୍ରୀକାନ୍ତ ଜେନା

ଭୁବନେଶ୍ୱର : ପୂର୍ବତନ ମୁଖ୍ୟମନ୍ତ୍ରୀ ହରେକୃଷ୍ଣ ମହତାବ ଜରୁରୀକାଳୀନ ପରିସ୍ଥିତିକୁ ନେଇ ଏକ ସମ୍ପାଦକୀୟ ଲେଖିଥିଲେ। ଯାହାର ଶୀର୍ଷକ ଥିଲା ଅତି ଲେମ୍ବୁ ଚିପୁଡିଲେ ପିତା। ବର୍ତ୍ତମାନ ରାଜ୍ୟରେ ସେହିପରି ପରିସ୍ଥିତି ସୃଷ୍ଟି ହୋଇଛି। ଚନ୍ଦ୍ରାୟନ ସଫଳ ହେଉଛି। ବୈଷୟିକ ବିଦ୍ୟାର ଏପରି ଯୁଗରେ ଅଭିଯୋଗ ଆଣିବା ପାଇଁ ନିର୍ଦ୍ଦିଷ୍ଟ ଅଧିକାରୀ ଗସ୍ତ କରିବା ଓ ତାଙ୍କ ଗସ୍ତକୁ ନେଇ ଅଯଥା ରାଜନୀତି ହେବା ନିଷ୍ପତ୍ତି ହାସ୍ୟାସ୍ପଦ । ଏହା ଦ୍ୱାରା ବହୁତ ଅର୍ଥ ଖର୍ଚ୍ଚ ହେଉଛି। ଇଣ୍ଟରନେଟ୍ ଯୁଗରେ ଏକ ନିର୍ଦ୍ଦିଷ୍ଟ ମେକାନିଜିମ୍  ବ୍ୟବହାର କରି ଅଭିଯୋଗ ସଂଗ୍ରହ ଓ ଶୁଣାଣି କରାଯାଉ ବୋଲି ପୂର୍ବତନ କେନ୍ଦ୍ରମନ୍ତ୍ରୀ ଶ୍ରୀକାନ୍ତ ଜେନା କହିଛନ୍ତି।

ସେହିପରି ପଞ୍ଚାୟତ, ବ୍ଲକ ଏବଂ ଜିଲ୍ଲା ସ୍ତରରୁ ଅଭିଯୋଗ ସଂଗ୍ରହ କରାଯାଇ ତାହାର ସମାଧାନ ଯେଉଁ ସ୍ତରରେ ସେହି ସ୍ତରରେ କରାଯାଉ। ଏଥିପାଇଁ ଏକାଧିକ ଅଫିସର, ବୈଷୟିକ ସହାୟକମାନଙ୍କୁ ନିଯୁକ୍ତ କରାଯାଉ। ଏହା କୌଣସି ନୂଆ କଥା ନୁହେଁ। 90 ମସିହାରେ ବିଜୁ ବାବୁଙ୍କ ଦ୍ୱିତୀୟ ମୁଖ୍ୟମନ୍ତ୍ରୀତ୍ୱ ସମୟରେ ତାଙ୍କର ଏକ ପ୍ରସ୍ତାବକୁ ଅଭିଯୋଗ ଶୁଣାଣି ପାଇଁ ବ୍ୟବହାର କରାଯାଇଥିଲା। ମାତ୍ର ସେ ସମୟରେ ମନ୍ତ୍ରୀ ପ୍ରସନ୍ନ ପାଟ୍ଟଶାଣୀଙ୍କ ଦ୍ୱାରା ବିଭାଗଟି ଠିକ୍ ଭାବେ ପରିଚାଳିତ ହୋଇ ପାରି ନ ଥିଲା। ତେଣୁ ଅତୀତରୁ ଏହି ମେକାନିଜିମ୍ ଥିଲେ, ବର୍ତ୍ତମାନ ଏପରି ପରିସ୍ଥିତି ସୃଷ୍ଟି ହୋଇ ନଥାନ୍ତା ବୋଲି ଶ୍ରୀ ଜେନା କହିଛନ୍ତି।

ଗଣତନ୍ତ୍ରରେ କୌଣସି ପ୍ରକ୍ରିୟା କେନ୍ଦ୍ରୀକରଣ ହେବା ଉଚିତ ନୁହେଁ। ବିକେନ୍ଦ୍ରୀକରଣ ହିଁ ଗଣତନ୍ତ୍ରକୁ ସୁଦୃଢ କରିଥାଏ। ବିଧାୟକ, ଏମପି ଭୋଟ ପାଇ ଜିତିଥାନ୍ତି। ସେମାନେ ଲୋକମାନଙ୍କ ପାଖରେ ଉତ୍ତର ଦାୟୀ। ତେଣୁ ପ୍ରଶାସନକୁ ବଡ କରି ରାଜନେତାଙ୍କୁ ଛୋଟ କରା ନ ଯାଉ। ଗୋଟିଏ ଅଫିସର କାହିଁକି ବୁଲିବ..ରାଜ୍ୟରେ ବହୁତ ଦକ୍ଷ ଲୋକ ପ୍ରତିନିଧି ଏବଂ ଅଫିସର ଅଛନ୍ତି। ସମସ୍ତେ ଲୋକଙ୍କ କାମ କରନ୍ତୁ। ରାଜ୍ୟରେ ସରକାରୀ ଅଫିସକୁ ଫୋନ୍ କଲେ କେହି ଉତ୍ତର ପ୍ରଦାନ କରୁ ନାହାନ୍ତି। ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟକୁ କୌଣସି ଚିଠି ଲେଖିଲେ, ତାହାର ପ୍ରାପ୍ତି ସ୍ୱୀକାର ମିଳୁନାହିଁ ବୋଲି ଶ୍ରୀ ଜେନା କହିଛନ୍ତି।