ଜଳିଗଲା ଆଦିବାସୀ ଯୁବକ, ଘଟଣାକୁ ଚାପି ଦେଲେ ସେ ସମୟର ଦୁଇ କ୍ୟାବିନେଟ୍ ମନ୍ତ୍ରୀ ଓ ପୁଲିସ୍ ମହାନିର୍ଦ୍ଦେଶକ..ଜାଣନ୍ତୁ ସେ ହୃଦୟ ବିଦାରକ ଇତିହାସ…
ଭୁବନେଶ୍ୱର : ଅଳ୍ପ ବିଦ୍ୟା ଭୟଙ୍କର। ଏହି କଥା ଯଥାର୍ଥତା କେତେ, ତାହା ଜାଣିବାକୁ ପ୍ରାୟ ତିନି ଦଶନ୍ଧି ତଳକୁ ଚାଲିଯିବା। ମଣ୍ଡଳ କମିସନଙ୍କ ସୁପାରିସ୍ ଦ୍ୱାରା ରାଜ୍ୟର ୯୪ ପ୍ରତିଶତ ଲୋକ ଉପକୃତ ହେବାର ରାସ୍ତା ଫିଟାଯାଇଥିଲା। ହେଲେ ଯେଉଁମାନେ ଏହାର ଫାଇଦା ପାଇବେ, ସେହିମାନଙ୍କୁ ଅନ୍ଧାରରେ ରଖି ମଣ୍ଡଳ କମିସନ୍ ବିରୋଧରେ ସେମାନଙ୍କୁ ମତା ଯାଇଥିଲା। ଯାହାର ଫଳ ଆଜି ବି ଓଡ଼ିଶା ଭୋଗୁଛି। ରାଜ୍ୟର ଅଧା ଜନସଂଖ୍ୟା ସେମାନଙ୍କ ସମ୍ପୂର୍ଣ୍ଣ ସାମ୍ବିଧାନିକ ଅଧିକାରୀ ପାଇନାହାନ୍ତି। ଏସସି,ଏସଟିମାନଙ୍କୁ ଉଚ୍ଚଶିକ୍ଷାରେ ପର୍ଯ୍ୟାପ୍ତ ସଂରକ୍ଷଣ ଦିଆଯାଇନାହିଁ। ପଛୁଆବର୍ଗଙ୍କୁ ଉଚ୍ଚଶିକ୍ଷାରେ ଆଦୌ ସଂରକ୍ଷଣ ଦିଆଯାଇନାହିଁ। କିନ୍ତୁ ରାଜ୍ୟରେ ଥିବା ଛଅ ପ୍ରତିଶତ ସାଧାରଣ ବର୍ଗ ପାଇଁ ୧୦ ପ୍ରତିଶତ କୋଟାର ରାସ୍ତା ଖୋଲି ଦିଆଯାଇଛି।
ଇଏ ତ ଗଲା ସାମ୍ପ୍ରତିକ ସ୍ଥିତି। ମାତ୍ର ଦଳ ମତ ନିର୍ବିଶେଷରେ ଓଡ଼ିଶା ସରକାର ସେ ସମୟରେ ଆଦିବାସୀଙ୍କ ପ୍ରତି ମନୋଭାବ ଯାହା ଥିଲା ତାହା ଆଜି ବି ରହିଛି। ଦେଶ ସାରା ମଣ୍ଡଳ ଆନ୍ଦୋଳନ। ସାଧାରଣ ବର୍ଗ ନେତାମାନେ ବ୍ୟବସ୍ଥାକୁ ଉପଯୋଗ କରି ବହୁଜନ ବର୍ଗ ବିରୋଧରେ ରାସ୍ତାକୁ ଓହ୍ଲାଇ ଥାଆନ୍ତି। ଟଙ୍କା ଅଭାବ ଥିଲେ ବି ବହୁ ସଂଖ୍ୟାରେ ବହୁଜନ ବର୍ଗ ଆନ୍ଦୋଳନକୁ ସମର୍ଥନ କରୁଥାନ୍ତି। ରାଜଧାନୀ ଭୁବନେଶ୍ୱର ବାଣୀବିହାର..ଛାତ୍ର ଓ ଯୁବ ରାଜନୀତିର ପେଣ୍ଠସ୍ଥଳୀ। ୧୯୯୦ ମସିହା ଅଗଷ୍ଟ ମାସ ୧୧ ତାରିଖ। ଖୁଦୀରାମ ଜୟନ୍ତୀ ଦିନ ବାଣୀବିହାର ଛକରୁ ସରକାରୀ ବସ ଦ୍ୱାରା ଯାତ୍ରୀମାନେ ଗମନ କରୁଥାନ୍ତି। ସେ ସମୟରେ କେନ୍ଦ୍ରରେ ସରକାରରେ ନ ଥିବା କଂଗ୍ରେସର ଗୁଣ୍ଡାବାହିନୀ ବସ୍ ରୁ ସବୁ ଯାତ୍ରୀଙ୍କୁ ଓହ୍ଲାଇ ଦିଅନ୍ତି। ବସ୍ ଡ୍ରାଇଭର ଯିଏକି ଜଣେ ଆଦିବାସୀ ଯୁବକ, ସେ କଥା ନମାନିବାରୁ ଯାତ୍ରୀ ଓହ୍ଲାଇଦେବା ପରେ ବସକୁ ବାଣୀବିହାରର ପୁରୁଣା ଏସବିଆଇ ଛକ ତଥା ପୋଷ୍ଟ ଅଫିସ୍ ନିକଟରେ ନିଆଁ ଲଗାଇ ଦିଅନ୍ତି। ବସ୍ ପୋଡିଯାଏ.. ଆଉ ତାହା ସହ ଜୀବନ୍ତ ଦଗ୍ଧ ହୋଇଯାଆନ୍ତି ସେହି ନିରୀହ ଆଦିବାସୀ ଯୁବକ। ଯେଉଁ ବର୍ଗର ସଂଖ୍ୟା ରାଜ୍ୟର ପ୍ରାୟ 22 ପ୍ରତିଶତ। ଆଉ ଏହି ଘଟଣାରେ ସେହି ବର୍ଗକୁ ନ୍ୟାୟ ଦେଇପାରନ୍ତିନି ତତ୍କାଳୀନ ଜନତା ସରକାର। ସେହି ଜନତା ସରକାର ଯିଏ କି ଭିନ୍ନ ଗାଇର ଗୋଠ ପରିକା ମଣ୍ଡଳ କମିସନକୁ ବିରୋଧ କରୁ ଥାଆନ୍ତି. ଏହି ପ୍ରସଙ୍ଗରେ ତତ୍କାଳୀନ ଜନତା ଦଳର କ୍ଷମତା ଥିବା ଗୋଷ୍ଠୀ ଏବଂ କଂଗ୍ରେସ ଆଦର୍ଶଗତ ଭାବେ ଏକ ହୋଇଯାଇଥିଲେ। ଯାହା ଫଳରେ ଆଦିବାସୀ ଯୁବକ ମୃତ୍ୟୁ ରହସ୍ୟ ହୋଇଗଲା ସିନା ତାର ପରିବାର ନ୍ୟାୟ ପାଇଲା ନାହିଁ।
ସେ ସମୟରେ ବିଜୁ ପଟ୍ଟନାୟକ ମୁଖ୍ୟମନ୍ତ୍ରୀ ଥିବା ବେଳେ ଆଇନ ମନ୍ତ୍ରୀ ଥାଆନ୍ତି ନରସିଂହ ମିଶ୍ର। ଜଳସମ୍ପଦ ମନ୍ତ୍ରୀ ଥାଆନ୍ତି ବିଜୟ ମହାପାତ୍ର। ବିଜୁ ବାବୁଙ୍କ ହାତରେ ଗୃହ ବିଭାଗ ଥିଲେ ବି ବିଜୟ ମହାପାତ୍ର ଏହାକୁ ନିୟନ୍ତ୍ରଣ କରୁଥିଲେ। ଆଉ ସେ ସମୟରେ ପୁଲିସ୍ ମହାନିର୍ଦ୍ଦେଶକ ଥାଆନ୍ତି ଧ୍ଗ୍ରୁବ ନାରାୟଣ ସିଂ। ଖାଲି ସେତିକ ନୁହେଁ ରାଜ୍ୟର 94 ଭାଗ ଲୋକଙ୍କ ବିରୋଧରେ ସୁପ୍ରିମକୋର୍ଟ ଯାଆନ୍ତି ରାଜ୍ୟ ସରକାର। ଆଉ ସରକାରଙ୍କୁ ପ୍ରତିନିଧିତ୍ୱ କରନ୍ତି ବର୍ତ୍ତମାନର କଂଗ୍ରେସ ବିଧାୟକ ଦଳ ନେତା ନରସିଂହ ମିଶ୍ର। ସରକାରଙ୍କ ପକ୍ଷରୁ ତାଙ୍କୁ ସମସ୍ତ ସହଯୋଗ ଯୋଗାଇ ଦିଅନ୍ତି ବିଜୟ ମହାପାତ୍ର। ମଣ୍ଡଳ କମିସନରୁ ସର୍ବାଧିକ ଲାଭ ପାଉଥିବା ଓଡ଼ିଶାର ଅଧା ଜନସଂଖ୍ୟାର ପ୍ରତିନିଧିତ୍ୱ କରୁଥିବା ବର୍ଗର କେତେକ ପ୍ରତିନିଧି ମଧ୍ୟ ସେମାନଙ୍କ ସହ ହାତ ମିଳାଇଥାଆନ୍ତି।
ମଣ୍ଡଳ କମିସନ ପରେ ସାରା ଦେଶର ବିଭିନ୍ନ ରାଜ୍ୟରେ ବିଧାନସଭା ନିର୍ବାଚନ ହୁଏ। ଓଡ଼ିଶାରେ ଜନତା ଦଳକୁ ଛାଡି ଦେଲେ ଅନ୍ୟ ସବୁ ରାଜ୍ୟରେ ଜନତା ଦଳ ବିପୁଳ ମତରେ ଜିତିଥାଏ। ଓଡ଼ିଶାରେ ବିଜୁ ବାବୁ ନିର୍ବାଚନ ହାରିଯାଇଥାଆନ୍ତି। ହେଲେ ତାଙ୍କ କ୍ୟାବିନେଟ୍ ଦୁଇ ବିଶ୍ୱସ୍ତ ଦୁର୍ଯ୍ୟୋଧନ ଓ ଦୁଃ)ଶାସନର ଶେଷ ହସ ହସୁଥାଆନ୍ତି।
