ମୁଖ୍ୟମନ୍ତ୍ରୀଙ୍କୁ ଭେଟିବାକୁ ସୁଯୋଗ ମିଳୁନାହିଁ : ସୌମ୍ୟ ରଞ୍ଜନ ପଟ୍ଟନାୟକ

ଭୁବନେଶ୍ୱର : ବିଜେଡି କାହାର ପୈତୃକ ସମ୍ପତ୍ତି ନୁହେଁ। ବିଜେଡ଼ିକୁ ଦୁଇ ଚାରି ଜଣ ଆଇଏଏସ୍ ଅଫିସର କାହିଁକି ପରିଚାଳନା କରିବେ। ମୁଖ୍ୟମନ୍ତ୍ରୀଙ୍କୁ ଦେଖା କରିବାକୁ ମୁଁ ଚେଷ୍ଟା କରିଛି। ହେଲେ ସୁଯୋଗ ମିଳିନାହିଁ ବୋଲି ଖଣ୍ଡପଡ଼ା ବିଜେଡି ବିଧାୟକ ସୌମ୍ୟ ରଞ୍ଜନ ପଟ୍ଟନାୟକ କହିଛନ୍ତି। ଶକ୍ତି ମନ୍ତ୍ରୀ ପ୍ରତାପଦେବ ଦଳୀୟ ଫୋରମରେ ନ ରହି ସମ୍ପାଦକୀୟ ଲେଖିବା ଉଚିତ ବୋଲି କହିଥିଲେ। ସୌମ୍ୟ ପୁଣି କହିଛନ୍ତି ଯେ, ମୁଁ ଦଳର ବୃହତ୍ତର ସ୍ୱାର୍ଥ ଦୃଷ୍ଟିରୁ ଲେଖୁଛି। ସେଥିରେ କିଛି ଅନୁଶାସନ ହୀନ କାର୍ଯ୍ୟ ନାହିଁ। ବିଜେଡି ଏତେ କ୍ଷମତା, ସଦିଚ୍ଛା ପାଇବା ପରେ କାହାକୁ ଡରୁଛି। ବିଜେଡି ନିରଙ୍କୁଶ କ୍ଷମତା ପାଇବା ପରେ କାହିଁକି ଏମିତି ହେଉଛି।

ମୁଖ୍ୟମନ୍ତ୍ରୀଙ୍କ ଗ୍ରହଣୀୟତା କମିଛି। ଏକଥା ଆମେ କହିନାହୁଁ। ଇଣ୍ଡିଆ ଟୁଡେ ସର୍ଭେ ପକ୍ଷରୁ କୁହାଯାଇଛି। ଏନେଇ ସମୀକ୍ଷା କରିବା ଆବଶ୍ୟକ ବୋଲି ଶ୍ରୀ ପଟ୍ଟନାୟକ କହିଛନ୍ତି। ତଳସ୍ତରର ବିଜେଡି କର୍ମୀ ମୋତେ ସମର୍ଥନ କରୁଛନ୍ତି। ହେଲେ କିଛି ଜଣ ଲୋକ ଦଳକୁ ଜାଗିରିଦାର କରି ରଖିଛନ୍ତି। ମୁଁ କାହିଁକି ଦଳ ଛାଡିବି। ଦଳ ମୋତେ ନିଲମ୍ବନ କାହିଁକି କରୁନାହାନ୍ତି ବୋଲି ଶ୍ରୀ ପଟ୍ଟନାୟକ କହିଛନ୍ତି।