ପଶ୍ଚିମ ଓଡ଼ିଶା ବହୁ ବିଧାନସଭା ଆସନରେ ବିଜେଡ଼ିର ଭୋଟ ହ୍ରାସ ପାଉଛି
ଭୁବନେଶ୍ୱର: ସାଧାରଣ ନିର୍ବାଚନ ପୂର୍ବରୁ ଓଡ଼ିଶା ରାଜନୀତି ପୁଣି ସରଗରମ ହେବାରେ ଲାଗିଛି। କିଛି ଦିନ ତଳେ ପ୍ରକାଶ ପାଇଥିବା ଛତିଶଗଡ ନିର୍ବାଚନ ଫଳାଫଳ ରାଜ୍ୟ ବିଜେପିକୁ ମନସ୍ତ୍ୱାତ୍ତିକ ଫାଇଦା ପ୍ରଦାନ କରାଯାଇଛି। ଛତିଶଗଡ଼ ବିଜୟ ପରେ ଦଳର ଦୁଇ ବରିଷ୍ଠ ନେତାଙ୍କ ବକ୍ତବ୍ୟରୁ ଏହା ସ୍ପଷ୍ଟ ଅନୁମେୟ। ପ୍ରଦୀପ ପୁରୋହିତ କହିଛନ୍ତି ଯେ, ବିଜେଡିକୁ ହଜମ ହୋଇନାହିଁ କଂଗ୍ରେସର ଛତିଶଗଡ଼ ପରାଜୟ। ତେଣୁ ଦଳ କଂଗ୍ରେସ ସହ ଭିତିରିଆ ମେଣ୍ଟ କରି ପଶ୍ଚିମ ଓଡ଼ିଶାର ଆସନ ଜିତିବାକୁ ଚେଷ୍ଟା କରିବ ବୋଲି ଶ୍ରୀ ପୁରୋହିତ କହିଛନ୍ତି। ଅନୁରୂପ ଭାବେ ଖାରବେଳ ସ୍ୱାଇଁ ନିଜେ ଲଢିବା ସହ କିଏ ବିଧାନସଭା ଲଢିବ, ସେ କଥା କହିଲେଣି। ପଶ୍ଚିମ ଓଡ଼ିଶାରୁ ସର୍ବାଧିକ ଆସନ ସହ ରାଜ୍ୟରେ ବିଜେପି ଶହେ ଆସନ ଟପି ପାରିବ ବୋଲି ଶ୍ରୀ ସ୍ୱାଇଁ ଆକଳନ କରିଛନ୍ତି। ଇତି ମଧ୍ୟରେ ବିଜେଡି ପକ୍ଷରୁ ସର୍ଭେ କରୁଥିବା ସଂସ୍ଥା ପଶ୍ଚିମ ଓଡ଼ିଶା ବିଧାନସଭା ଆସନଗୁଡିକରେ ବିଜେଡିର ଅନ୍ତଃ କନ୍ଦଳ ଏବଂ ଅନ୍ୟ କାରଣରୁ ଭୋଟ ହ୍ରାସ ପାଉଥିବା ରିପୋର୍ଟ ପ୍ରଦାନ କରିଛି। ଯାହା ବିଜେଡିର ଚିନ୍ତାର କାରଣ ହୋଇଛି।
ସମ୍ବଲପୁର, ସୁନ୍ଦରଗଡ, ବଲାଙ୍ଗୀର, କଳାହାଣ୍ଡି ଏବଂ ବରଗଡ଼ ଅଧିନରେ ଆସୁଥିବା ୩୫ଟି ବିଧାନସଭା ବହୁ ଆସନରେ ବିଜେଡିକୁ ସତର୍କତାର ସହ ପ୍ରାର୍ଥୀ ଚୟନ କରିବାକୁ ପଡିବ। ଏମିତି କିଛି ଆସନ ରହିଛି-ଯେଉଁ ଥିରେ ଲଗାତର ସର୍ଭେ ନକରାତ୍ମକ ରିପୋର୍ଟ ଆସୁଛି। ଏହି ଆସନ ଗୁଡିକ ହେଉଛି- ସମ୍ବଲପୁର, ଭବାନୀପାଟଣା, ନର୍ଲା, ଜୁନାଗଡ, ବରଗଡ। ଏହି ଆସନରେ ଉପଯୁକ୍ତ ପ୍ରାର୍ଥୀ ସହ ବିଦ୍ରୋହୀଙ୍କୁ ପରିଚାଳନା ନ କଲେ ପରାଜୟ ସୁନିଶ୍ଚିତ ବୋଲି ସର୍ଭେ ସଂସ୍ଥା ଆକଳନ କରିଛି। ସୁନ୍ଦରଗଡ଼ ଜିଲ୍ଲା ଦୁଇଟି ଆସନକୁ ଛାଡି ଦେଲେ କାହାକୁ ପ୍ରାର୍ଥୀ କରାଯିବ, ସେହି ଚିନ୍ତା ପର୍ଯ୍ୟବେକ୍ଷକଙ୍କୁ ଘାରିଛି। ତୃତୀୟ ମହଲାକୁ ସୁନ୍ଦରଗଡ଼ ଅଧିକାରୀ ଗଣ ଗୋଟିଏ ରିପୋର୍ଟ ଦେଉଥିବା ବେଳେ ପର୍ଯ୍ୟବେକ୍ଷକଙ୍କ ରିପୋର୍ଟ ଭିନ୍ନ ରହୁଛି। ତେଣୁ କାହା ଆଧାରରେ ପ୍ରାର୍ଥୀ ଚୟନ ହେବ, ତାହା ବିଜେଡି ନେତୃତ୍ୱର ଚିନ୍ତାର କାରଣ ହେଉଛି। ତଳସରା, ସୁନ୍ଦରଗଡ଼,ବୀରମିତ୍ରପୁରରେ ବିଜେଡ଼ି ପୁରୁଣା ପ୍ରାର୍ଥୀ ଦୋହରାଇବା ସପକ୍ଷରେ ନାହିଁ। ରଘୁନାଥପାଲ୍ଲୀରେ ଦଳର ଭୋଟ ହ୍ରାସ ପାଉଥିବା ରିପୋର୍ଟରେ ଦର୍ଶାଯାଇଛି। ଏସବୁ ମଧ୍ୟରେ ବଣାଇ ଆସନରେ ବିଜେଡି ପୂର୍ବାପେକ୍ଷା ଭଲ କରିବ ବୋଲି ରିପୋର୍ଟ ଆସିଛି। ଉପରୋକ୍ତ ପାଞ୍ଚଟି ଆସନକୁ ବାଦ୍ ଦେଲେ ବଲାଙ୍ଗୀର ଜିଲ୍ଲାର ଏକାଧିକ ଆସନରେ ବିଜେଡି କଡ଼ା ଟକ୍କର ସମ୍ମୁଖୀନ ହେବ। ଏହି ଆସନ ଗୁଡିକ ହେଉଛି- ବଲାଙ୍ଗୀର, ଲୋଇସିଂହା, ଟିଟିଲାଗଡ଼ ଏବଂ ବଲାଙ୍ଗୀର ଲୋକସଭା ଅଧିନରେ ଆସୁଥିବା ବୀରମହାରାଜପୁର ବିଧାନସଭା ଆସନ। କଳାହାଣ୍ଡି ଲୋକସଭା ଅଧିନରେ ଆସୁଥିବା ଖଡିଆଳ ଓ ନୂଆପଡ଼ାରେ ଦଳ ହାରାହାରି ସ୍ଥିତିରେ ରହିଛି। ପଶ୍ଚିମ ଓଡ଼ିଶାର ୩୫ ଆସନରୁ ୧୫ଟି ଆସନରେ ଅତି ବିପଦ ସ୍ଥିତିରେ ରହିଛି।
