ପାଣ୍ଡିଆନଙ୍କ ସ୍ୱେଚ୍ଛାକୃତ ଅବସର ପରେ  କଣ କହିଲେ ଜୟରାମ ରମେଶ, ଅମର ପଟ୍ଟନାୟକ ଓ ସୁଜିତ୍ କୁମାର

ଭୁବନେଶ୍ୱର :  ସରକାରୀ ଚାକିରୀରୁ ସ୍ୱେଚ୍ଛାକୃତ ଅବସର ପରେ ଭି.କେ ପାଣ୍ଡିଆନଙ୍କୁ ନୂଆ ନିଯୁକ୍ତି ମିଳିଛି। ତାଙ୍କ ନିଯୁକ୍ତି ନେଇ ରାଜନୈତିକ ମହଲରେ ବିଭିନ୍ନ ବୟାନ ବାଜି ଆରମ୍ଭ ହୋଇଛି। ରାଜ୍ୟସ୍ତରରୁ ଆରମ୍ଭ କରି ଜାତୀୟସ୍ତରୀୟ ବିଭିନ୍ନ ନେତା ଏନେଇ ମତ ରଖିଛନ୍ତି। କଂଗ୍ରେସ ନେତା ଜୟରାମ ରମେଶ ଟୁଇଟ୍ କରି କହିଛନ୍ତି ଯେ, ସେ ଜଣେ ଭଲ ପ୍ରଶାସନିକ ଅଧିକାରୀ। ସେ ନବୀନଙ୍କୁ ବହୁତ ଭଲ ଭାବରେ ସାହାଯ୍ୟ କରିଛନ୍ତି। ଛାୟା ରହୁଥିବା ବ୍ୟକ୍ତି ସାମନାକୁ ଆସିଲେ। ସେ ତାଙ୍କ ନିଜ ଅଧିକାର ବଳରେ ରାଜନୈତିକ ଅଧିକାରୀ ହୋଇପାରିବେ। କିଛିବର୍ଷ ହେବ ଓଡ଼ିଶା ରାଜନୀତିରେ ନବୀନ ପଟ୍ଟନାୟକ ଅନୁପସ୍ଥିତ ଜମିଦାର ଏବଂ ପାଣ୍ଡିଆନ୍ ତାଙ୍କର ସିଇଓ ଭଳି କାର୍ଯ୍ୟ କରୁଥିବା ମନେ ହେଉଥିବା ଶ୍ରୀ ରମେଶ କହିଥିଲେ। ବିଜେଡି ରାଜ୍ୟସଭା ଏମପି ଅମର ପଟ୍ଟନାୟକ ଏବଂ ସୁଜିକ କୁମାର ମଧ୍ୟ ଏହି ପ୍ରସଙ୍ଗରେ ମତାମତ ରଖଛନ୍ତି। ଅମର ପଟ୍ଟନାୟକ କହିଛନ୍ତି ଯେ, ନୂଆ ଅଧ୍ୟାୟ ଆରମ୍ଭ ନେଇ ପାଣ୍ଡିଆନଙ୍କୁ ଶୁଭେଚ୍ଛା। ତାଙ୍କ ତତ୍ତ୍ୱାବଧାନରେ ରୂପାନ୍ତରଣ ଏବଂ ଉନ୍ନୟନମୂଳକ କାର୍ଯ୍ୟ ଆହୁରି ଉଚ୍ଚତର ସୋପାନକୁ ଯିବ। 2036 ସୁଦ୍ଧା ଓଡ଼ିଶା ଏକ ନୂତନ ଶିଖର ଛୁଇଁବ। ଆଇଏଏସ୍ ଭଳି ଚାକିରୀ ଛାଡିଦେବା କାହା ପକ୍ଷରେ ଏତେ ସହଜ ନୁହେଁ। ମାତ୍ର ଓଡ଼ିଶାବାସୀଙ୍କ ସେବା କରିବା ପାଇଁ ସେ ଏହା କରିଦେଲେ, ସେଥିପାଇଁ ତାଙ୍କୁ ସାଲ୍ୟୁଟ ବୋଲି ଶ୍ରୀ ପଟ୍ଟନାୟକ କହିଛନ୍ତି।

ଅନୁରୂପ ଭାବେ ସୁଜିତ୍ କୁମାର କହିଛନ୍ତି ଯେ, 5-ଟି ଉପକ୍ରମ କାର୍ଯ୍ୟକ୍ରମ ପଛରେ ସେ ମୁଖ୍ୟ ବଳ ଭାବେ ନିୟମିତ କାର୍ଯ୍ୟ କରିଆସୁଥିଲେ। ଯାହା ଦ୍ୱାରା ପ୍ରଶାସନରେ ବ୍ୟାପକ ରୂପାନ୍ତରଣ ହୋଇପାରିଛି। ତାଙ୍କ ନୂଆ ଭୂମିକା ଉନ୍ନତିକରଣ ଗତିକୁ ଆହୁରି ସୁଦୃଢ କରିବ ବୋଲି ଶ୍ରୀ କୁମାର କହିଛନ୍ତି।