ଓଡ଼ିଆ-ଅଣ ଓଡ଼ିଆ ବିବାଦରେ ସାମାଜିକ ଗଣମାଧ୍ୟମ ସରଗରମ
ଭୁବନେଶ୍ୱର: କାର୍ତ୍ତିକ ପୂର୍ଣ୍ଣିମା ଦିନ ଭି କାର୍ତ୍ତିକେୟନ ପାଣ୍ଡିଆନ୍ ବିଜୁ ଜନତା ଦଳରେ ବିଧିବଦ୍ଧ ଯୋଗଦାନ କରିଛନ୍ତି। ତାଙ୍କ ଜନ୍ମସ୍ଥାନ ଓଡ଼ିଶା ନୁହେଁ, ସେ ତାମିଲ ଜନ୍ମିତ। ମାତ୍ର ଦୀର୍ଘ ଅଢେଇ ଦଶନ୍ଧିରୁ ସାମାନ୍ୟ କମ୍ ସମୟ ସେ ଓଡ଼ିଶାରେ ବିତାଇଛନ୍ତି। ତାଙ୍କ ଧର୍ମପତ୍ନୀ ସୁଜାତା ରାଉତ କାର୍ତ୍ତିକେୟନ କେନ୍ଦ୍ରାପଡ଼ା ଜିଲ୍ଲାର ମୂଳ ବାସିନ୍ଦା। ପାଣ୍ଡିଆନଙ୍କ ଯୋଗଦାନ ପରେ ଓଡ଼ିଆ-ଅଣ ଓଡ଼ିଆ ନେଇ ସାମାଜିକ ଗଣମାଧ୍ୟମରେ ଚର୍ଚ୍ଚା ଜୋର ଧରିଛି। ଆମେ ଏଠାରେ କହିରଖିବାକୁ ଚାହୁଁ ଯେ, ବର୍ତ୍ତମାନ ତୃଣମୂଳସ୍ତରରେ ଏହି ଅଣ-ଓଡ଼ିଆ-ଓଡ଼ିଆ ବିବାଦ ଧାର ଧରିନି। ଏହି ବିବାଦକୁ ନେଇ ସୋସିଆଲ ମିଡିଆରେ କିଛି ରୋଚକ ତଥ୍ୟ ପ୍ରକାଶ ପାଇଛି। ଯାହାକୁ ନେଇ ଆମ୍ଭର ଏହି ଖବରଟି ପରିବେଷିତ ହୋଇଛି। ବିଜେଡି ପକ୍ଷରୁ ଅନ୍ୟତମ ଲୋକପ୍ରିୟ ଫେସବୁକ୍ ଗ୍ରୁପ୍ ଦିଲ୍ ସେ ନବୀନ ଦ୍ୱାରା ଅଣ ଓଡ଼ିଆ ପ୍ରସଙ୍ଗରେ ବିରୋଧିଙ୍କୁ ବିରୋଧ କରାଯାଇଛି।
ଦିଲ୍ ସେ ନବୀନରେ ଦୁଇଟି ପୋଷ୍ଟ ଚର୍ଚ୍ଚାର କାରଣ ହୋଇଛି। ଗୋଟିଏ ସାମଗ୍ରିକ ଭାବେ ମୂଳତଃ ଅଣ ଓଡ଼ିଆ ନେତାଙ୍କୁ ନେଇ ଏବଂ ଅନ୍ୟଟି କଂଗ୍ରେସ ପ୍ରଚାର କମିଟି ଅଧ୍ୟକ୍ଷ ବିଜୟ ପଟ୍ଟନାୟକଙ୍କୁ ନେଇ। ସାମଗ୍ରିକ ଭାବେ ପ୍ରଦାନ କରାଯାଇଥିବା ଫଟୋରେ ଭୁବନେଶ୍ୱର ଏମପି ଅପରାଜିତା ଷଡଙ୍ଗୀ, ଭୁପିନ୍ଦର ସିଂ, ସନ୍ତୋଷ ସିଂ ସାଲୁଜା, ଅରବିନ୍ଦ ଢାଲି, ରାଜେନ୍ଦ୍ର ଢୋଲକିଆ, ସୁଜିତ କୁମାର, ଅଶ୍ୱିନୀ ବୈଷ୍ଣବ, ବେଦପ୍ରକାଶ ଅଗ୍ରଓ୍ୱାଲ, ବୀରେନ ମିତ୍ର, ଅଚ୍ୟୁତ ସାମନ୍ତ, ସମୀର ଦେ, ଅରୁଣ ଦେ, ଏନ୍ ଭାସ୍କର ରାଓ, କେ ସୂର୍ଯ୍ୟା ରାଓ ଏବଂ ସଜ୍ଜନ ଶର୍ମାଙ୍କ ଫଟୋ ରହିଛି। ସେହିପରି ଅନ୍ୟ ଏକ ଫେସବୁକ୍ ପୋଷ୍ଟରେ ତୁଷାରକାନ୍ତ ଶତପଥୀ ଏକ ପୋଷ୍ଟରେ ଉଲ୍ଲେଖ କରିଛନ୍ତି ଯେ, ପୂର୍ବତନ ମୁଖ୍ୟମନ୍ତ୍ରୀ ହରେକୃଷ୍ଣ ମହତାବ ମୂଳତଃ ପଞ୍ଜାବୀ ଏବଂ ବୀରେନ୍ ମିତ୍ର ମୂଳତଃ ବଙ୍ଗାଳୀ। ବରିଷ୍ଠ ସାମ୍ବାଦିକ ଦେବେନ୍ଦ୍ର ପୃଷ୍ଟି କହିଛନ୍ତି ଯେ, ତମେ ଆମର ୫ ହଜାର ଟଙ୍କାର ଖଣିଜ ୫ ଶହ ଟଙ୍କାରେ ଲୁଟି ନିଅ, ଆମକୁ ଟନ୍ ପିଛା ୧୦ ଟଙ୍କା ଦେଲେ ଆମେ ସହଯୋଗ କରିବୁ। ଏଇପରି ଓଡ଼ିଆମାନେ ସେହିପରି ଅଣଓଡ଼ିଆଙ୍କ ସେବକ ହୋଇ ନିଜକୁ ଧନ୍ୟ ମନେ କରୁଛନ୍ତି। ଅନୁରୂପ ଭାବେ ଟୁଇଟରରେ ମତାମତ ଦେଇ ସବ୍ୟସାଚୀ ଅମିତାଭ କହିଛନ୍ତି ଯେ, ପାଣ୍ଡିଆନ୍ଂକ ପରି କର୍ମଠ ଓ କର୍ତ୍ତବ୍ୟନିଷ୍ଠ ଲୋକ ଏ ରାଜ୍ୟର ମୁଖ୍ୟମନ୍ତ୍ରୀ ହେଲେ କିଛି ଅସୁବିଧା ନାହିଁ। ଲୋକଂକ ପାଇଁ କାମ କରିବା ମାନସିକତା ରଖୁଥିବା ବ୍ୟକ୍ତିତ୍ବକୁ ସୁଯୋଗ ମିଳିବା ଦରକାର। ବାକି ରହିଲା, ବିରୋଧ !! ସମ୍ବିଧାନ ବାରଣ କରୁନି ତ, ଆମେ ବିରୋଧ କରିବାକୁ କିଏ ? ବୋଲି ସେ କହିଛନ୍ତି। ଅମିତାଭ ଆହୁରି କହିଛନ୍ତି ଯେ, ପ୍ରଶଂସା ଓ ତେଲମରାରେ ବ୍ୟସ୍ତ ଥିବା ନେତାଏ ଆଜି ରାତିରେ ଶୋଇବା ପୁର୍ବରୁ ନିଜକୁ ପ୍ରଶ୍ନ ପଚାରିବା ଦରକାର, “ସେ କ’ଣ ପାଇଁ ବିଶ୍ଵାସଭାଜନ ହେଇପାରିଲେ, ମୁଁ ବା ଆମେ କ’ଣ ପାଇଁ ହେଇପାରିଲୁନି?”
