ପାଣ୍ଡିଆନଙ୍କ ଅବସର ପରେ କେଉଁ ସବୁ ବିକଳ୍ପ ନେଇ ଜାରି ରହିଛି ଚର୍ଚ୍ଚା

ଭୁବନେଶ୍ୱର :  ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ବ୍ୟକ୍ତିଗତ ସଚିବ ଦାୟିତ୍ୱ ତୁଲାଇ ଆସୁଥିବା ଭି.କେ ପାଣ୍ଡିଆନ୍ ବର୍ତ୍ତମାନ ନୂଆ ଭୂମିକାରେ ଅବତୀର୍ଣ୍ଣ ହୋଇଛନ୍ତି। ଦିନକ ପୂର୍ବରୁ ସେ କେନ୍ଦ୍ର ସରକାରଙ୍କ ପ୍ରଶାସନିକ ସେବା ଚାକିରୀରୁ ଅବସର ଗ୍ରହଣ କରିବା ଘଟଣା ସାର୍ବଜନୀନ ହୋଇଛି। ଏହି ଖବରକୁ ମାତ୍ର ଚବିଶି ଘଣ୍ଟା ନ ପୁରୁଣୁ ଭି.କେ ପାଣ୍ଡିଆନଙ୍କୁ କ୍ୟାବିନେଟ୍ ପାହ୍ୟା ସହ ନବୀନ ଓଡ଼ିଶା କାର୍ଯ୍ୟକ୍ରମର ଅଧ୍ୟକ୍ଷ ଭାବେ ନୂତନ ଦାୟିତ୍ୱ ଦିଆଯାଇଛି। ଏଣିକି କେନ୍ଦ୍ର ସରକାରଙ୍କ ପ୍ରଶାସନିକ ଶୃଙ୍ଖଳରୁ ସେ ମୁକ୍ତ ହୋଇ କାର୍ଯ୍ୟ କରିବେ। ଏହି ପଦଟି ରାଜନୈତିକ ପଦ ନ ହୋଇ ଥିଲେ ବି ରାଜ୍ୟ ରାଜନୀତିର ଅନ୍ୟତମ କେନ୍ଦ୍ର ବିନ୍ଦୁ।

ମୁଖ୍ୟମନ୍ତ୍ରୀଙ୍କ ବୟସାଧିକ୍ୟ, ଆସନ୍ନ ନିର୍ବାଚନ, ପୂର୍ବାପେକ୍ଷା ସବଳ ଲାଗୁଥିବା ବିରୋଧୀଙ୍କ ସାଜସଜ୍ଜା କାରଣରୁ କାର୍ତ୍ତିକେୟନଙ୍କ ଇସ୍ତଫା ନେଇ ବହୁତ କଥା ପ୍ରକାଶ ପାଇଥିଲା। ହେଲେ ସୂଚନା ଅଧିକାର ବଳରେ ହାସଲ କରାଯାଇଥିବା ତଥ୍ୟ ଭିନ୍ନ ରହିଛି। ୨୦୦୦ ବ୍ୟାଚ୍ ଆଇଏଏସ୍ ଅଧିକାରୀ ଭି.କେ ପାଣ୍ଡିଆନ ଏବଂ ସୁଜାତା କାର୍ତ୍ତିକେୟନଙ୍କୁ ତିନି ବର୍ଷିଆ ଆନ୍ତଃ ସେବା ପ୍ରଶିକ୍ଷଣ ପାଇଁ ନିର୍ଦ୍ଦେଶ ଦିଆଯାଇଥିଲା। ଏହା ପରେ କେନ୍ଦ୍ର ସରକାରଙ୍କ ଅଧିନରେ ନିଯୁକ୍ତି ପାଇଁ ନିର୍ଦ୍ଦେଶାବଳୀ ରହିଥିଲା। ଏହି କାରଣରୁ ଶ୍ରୀ ପାଣ୍ଡିଆନ ରାଜ୍ୟ ପ୍ରଶାସନକୁ ଅଧିକ ସମୟ ଦେବା ପାଇଁ ସ୍ୱେଚ୍ଛାକୃତ ଅବସର ନେଇଥାଇପାରନ୍ତି ବୋଲି ସମୀକ୍ଷକମାନେ ମତ ଦେଇଛନ୍ତି।

 ଭି.କେ ପାଣ୍ଡିଆନଙ୍କ ଅବସର ପରେ ରାଜ୍ୟ ଶୀର୍ଷ ପ୍ରଶାସନରେ ପରିବର୍ତ୍ତନ ନେଇ ଚର୍ଚ୍ଚା ଆରମ୍ଭ ହୋଇଯାଇଛି। ତାଙ୍କ ସ୍ଥାନରେ ମୁଖ୍ୟମନ୍ତ୍ରୀଙ୍କ ସଚିବ ତଥା ୫-ଟି ବ୍ୟାପାର ଦାୟିତ୍ୱ ଭିନିଲ୍ କ୍ରିଷ୍ଣା କିମ୍ବା ସୁଜାତା କାର୍ତ୍ତିକେୟନ ନେଇ ପାରନ୍ତି ବୋଲି କୁହାଯାଉଛି। କୁଲାଙ୍ଗେଙ୍କୁ ଭୁବନେଶ୍ୱର ପ୍ରଶାସନରୁ ବାହାର କରି ରାଜ୍ୟ ମୁଖ୍ୟାଳୟ ପ୍ରଶାସନରେ ନୂତନ ଦାୟିତ୍ୱ ଦିଆଯାଇପାରେ ବୋଲି ଆକଳନ କରାଯାଉଛି। ଅନୁରୂପ ଭାବେ ପାଣ୍ଡିଆନ୍ ରାଜନୀତିରେ ପ୍ରବେଶ କରିବା ରାସ୍ତା ଉନ୍ମୃକ୍ତ ହୋଇ ହୋଇଯାଇଛି। ତେଣୁ ବିଜେଡିରେ କାର୍ଯ୍ୟକାରୀ ସଭାପତି କିମ୍ବା ପ୍ରଶାସନରେ କୌଣସି ମନ୍ତ୍ରୀ ଭାବେ ସେ ଦାୟିତ୍ୱ ନେଇ ପାରନ୍ତି ବୋଲି ଆଲୋଚନା ଜାରି ରହିଛି।