ପରବର୍ତ୍ତୀ ରାଜ୍ୟ ବିଜେପି ସଭାପତି କିଏ ହେବ ?…ପୁରୁଣା ଆଶାୟୀଙ୍କ ସହ ଯୋଡି ହେଲେ ନୂଆ ଚେହେରା…..

ଭୁବନେଶ୍ୱର : ନିର୍ବାଚନୀ ସଫଳତା ପରେ ସଭାପତିରୁ ଅବ୍ୟାହତି ନେବେ ମନମୋହନ ! କିଛି ଦିନ ପରେ ଯୋଜନା ବୋର୍ଡ ଉପାଧ୍ୟକ୍ଷ, ଏହା ପରେ ପୂର୍ଣ୍ଣକାଳୀନ ଛଅ ବର୍ଷ ପାଇଁ ରାଜ୍ୟସଭା । ହେଲେ ଏଠି ପ୍ରଶ୍ନ,  ମନମୋହନଙ୍କ ପରେ କିଏ ହେବ ସଭାପତି ? ହୋଇଯାଇଛି କି ଅଙ୍କ କଷା?  ନିଷ୍ପତ୍ତି ନେଇ ସାରିଛି କି ଆରଏସଏସ? ସମ୍ମତି ଦେଇ ସାରିଛନ୍ତି କି ଓଡ଼ିଶାରେ ପୁଞ୍ଜି ନିବେଶ କରିଥିବା ଶିଳ୍ପପତି। ନାଗପୁର ଅନୁମୋଦନ ପରେ ଦିଲ୍ଲୀ ଅନୁମତିକୁ ରହିଛି କି ଅପେକ୍ଷା? ଆଉ ମାତ୍ର କିଛି ଦିନ ପରେ ସ୍ପଷ୍ଟ ହେବ ଚିତ୍ର, କିଏ ଧରିବ ମଙ୍ଗ? ପ୍ରାଥମିକ ଆଲୋଚନା ପରେ କିଛି ସାଂସଦ, ଜଣେ ପୂର୍ବତନ ସଭାପତି ଆଉ ଜଣେ ବରିଷ୍ଠ ନେତା ମଧ୍ୟରୁ ଜଣଙ୍କୁ ମିଳିପାରେ ରାଜ୍ୟ ସଭାପତି ପଦ !

ସେ କିଏ । ଯଦି ସାଂସଦ ହେବେ ସେ କିଏ।  ପ୍ରଥମ ଥର ପାଇଁ ସାଂସଦ ହେଲେ ସଂଘରେ ରହିଛି ଲମ୍ବା ଅଭିଜ୍ଞତା ।

ସାମ୍ପ୍ରଦାୟିକ ଦୃଷ୍ଟିକୋଣରୁ ଅତି ସମ୍ବେଦନଶୀଳ ଆସନରୁ ଜିତିଛନ୍ତି ଏହି ନେତା ।  ବିଜେପିର ହିନ୍ଦୁତ୍ବ ବ୍ୟାକରଣରେ ସରଳାର୍ଥ ଲେଖିବେ ସେ .

ସେ କିଏ ? ସେ କଣ ପ୍ରଦୀପ ପୁରୋହିତ ? ନା ପ୍ରତାପ ଷଡ଼ଙ୍ଗୀ ? ନା ଆଦିବାସୀ ନେତା ଜୁଏଲ ? ନା ଏମାନେ କେହି ନୁହନ୍ତି ।

ସେ ହେଉଛନ୍ତି କନ୍ଧମାଳ ସାଂସଦ ସୁକାନ୍ତ ପାଣିଗ୍ରାହୀ । ନିକଟରେ ଦିଲ୍ଲୀରେ ରାଜ୍ୟ ବିଜେପିର ଏକ ପ୍ରଭାବଶାଳୀ ଗୋଷ୍ଠୀକୁ ମନେଇବାରେ ସଫଳ ହୋଇଛନ୍ତି ସୁକାନ୍ତ । ସରିଛି କବାଟ କିଳା ଆଲୋଚନା . ଅପେକ୍ଷା କେବଳ ମୋଦି – ଶାହାଙ୍କ ଅନୁଷ୍ଠାନିକ ମୋହର . ।

ହେଲେ ଅନିଶ୍ଚିତତା ର ଅନ୍ୟନାମ ତ ରାଜନୀତି। ଯଦି ସୁକାନ୍ତ ନ ହୁଅନ୍ତି, ତେବେ କିଏ ହେବେ। ଏହି ଦୌଡରେ ପୁନର୍ବାର ସାମିଲ ହୋଇଛନ୍ତି. ପୂର୍ବତନ ରାଜ୍ୟ ବିଜେପି ସଭାପତି ସମୀର ମହାନ୍ତି। ତାଙ୍କୁ ଅପ୍ରତ୍ୟାଶିତ ଭାବେ ଅପସାରଣ କରାଯାଇଥିଲା। ତେଣୁ ଆଗାମୀ ତିନି ବର୍ଷ ତାଙ୍କୁ ଦେବା ପାଇଁ ରାଜଧାନୀର ଏକ ଗୋଷ୍ଠୀ ଚାହୁଁଛି। ସମୀରଙ୍କ ପରେ ପ୍ରଦୀପ ପୁରୋହିତ ନାଁ ମଧ୍ୟ ଚର୍ଚ୍ଚାରେ ରହିଛି। ସେ ରାଜ୍ୟ ବିଜେପିର କୌଣସି ନିର୍ଦ୍ଦିଷ୍ଟ ଗୋଷ୍ଠୀର ନୁହଁନ୍ତି। ପଶ୍ଚିମ ଓଡ଼ିଶା ନେତା। ଭଲ ବକ୍ତା। ଦଳର ସବୁ ଗୋଷ୍ଠୀ ସହ ଉତ୍ତମ ସମ୍ପର୍କ ରଖିଛନ୍ତି। ତେଣୁ ତାଙ୍କ ନାଁକୁ ନେଇ ମଧ୍ୟ ଚର୍ଚ୍ଚାରେ ରହିଛି। ଏସମସ୍ତଙ୍କୁ ବାଦ୍ ଦେଇ ଯଦି କେହି ଚକମା ଦେଇ ପାରନ୍ତି। ସେ ହେଉଛନ୍ତି- ଗୋଲକ ମହାପାତ୍ର। ସେ ଜଣେ ପ୍ରଭାବଶାଳୀ ଗୋଷ୍ଠୀ ସହ ଜଡିତ। ଦଳ ବ୍ୟାପାର ପରିଚାଳନାର ଅଣ ଆନୁଷ୍ଠାନିକ ଅଭିଜ୍ଞତା ମଧ୍ୟ ରହିଛି। ମୁଖପାତ୍ର ଦାୟିତ୍ୱ ତୁଳାଇ ସାରିଛନ୍ତି। ଏମିତି ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟ ଉପରେ ତାଙ୍କର ଏକ ପ୍ରଭାବ ରହିଛି। ତେଣୁ ଏହି ଦୌଡ଼ରେ ସୁକାନ୍ତଙ୍କ ପରେ ସେ ଅନ୍ୟତମ ଦାବିଦାର।