ନୂଆ ଆଞ୍ଚଳିକ ଦଳ ପାଇଁ ବାଟ ଫିଟୁଛି କି !!! ସହଯୋଗୀ ଦଳ ପାଇଁ ୩ ଲୋକସଭା , ୪୨ ବିଧାନସଭା ଆସନ ଛାଡିପାରେ ବିଜେପି

ଭୁବନେଶ୍ୱର : ବିଜେଡ଼ି ଉପସଭାପତି ପଦରୁ ବିଦା ହେବା ପରେ ସୌମ୍ୟ ରଞ୍ଜନ ପଟ୍ଟନାୟକ ମୁହଁ ଖୋଲି ଥିଲେ। ଏହା ପରେ ତାଙ୍କୁ ବିଭିନ୍ନ ଫୋରମ୍ ଜରିଆରେ ଦଳ ପକ୍ଷରୁ ସମାଲୋଚନା କରାଯାଇଛି। ଏଥିସହ ସେ ଜଡିତ ଥିବା ସଂସ୍ଥା ଉପରେ ଚଢଉ ମଧ୍ୟ କରାଯାଇଛି। ମାତ୍ର କିଛିଦିନ ହେବ ସୌମ୍ୟ ରଞ୍ଜନ ପଟ୍ଟନାୟକଙ୍କ କୌଣସି ପ୍ରତିକ୍ରିୟା ପ୍ରକାଶ କରୁନାହାନ୍ତି। କେହି କେହି ଏହାକୁ ଝଡ଼ ପୂର୍ବର ନୀରବତା ବୋଲି ମତ ଦେଲେଣି।
ବିଜେଡି ପ୍ରାଥମିକ ଭାବେ ବିଜେପି ସହ ମେଣ୍ଟ କରି ଶାସନ କ୍ଷମତାକୁ ଆସିଥିଲା। ଏହା ପରେ କନ୍ଧମାଳ ଦଙ୍ଗା ପ୍ରସଙ୍ଗରେ ବିଜେପି ଠାରୁ ଆନୁଷ୍ଠାନିକ ଭାବେ ଦୂରେଇ ଗଲା। ସେତବେଳକୁ ଦଳ ସାଙ୍ଗଠନିକ ଭାବେ ବହୁତ ଦୃଢ ହୋଇସାରିଥାଏ। ବର୍ତ୍ତମାନ ପରିସ୍ଥିତିରେ ବିଜେଡି ବିରୋଧରେ ମଧ୍ୟ ମତ ରହିଛି। ହେଲେ ତାହା ଆସନରେ ରୂପାନ୍ତରିତ ହେଉନି। ପୁରୁଣା ଫର୍ମୁଲାରେ ଆଉ ଏକ ଆଞ୍ଚଳିକ ଦଳ ଗଠନ କରି ବିଜେପି ମେଣ୍ଟ ନେଇ ବିଚାରବିମର୍ଶ କରୁଥିବା ଜଣାପଡିଛି।

ଏହାକୁ ଚୂଡ଼ାନ୍ତ ରୂପ ମିଳି ନ ଥିଲେ ବି ପ୍ରଦୀପ ପାଣିଗ୍ରାହୀ, ସୌମ୍ୟ ରଞ୍ଜନ ପଟ୍ଟନାୟକ, ଦେବାଶିଷ ନାୟକ ଇତ୍ୟାଦି ବିଜେଡିରେ ବିଦ୍ରୋହୀ ହୋଇଗଲେଣି। ଜାତୀୟ ଦଳ ଅପେକ୍ଷା ଆଞ୍ଚଳିକ ଦଳରେ ନିଜକୁ ବିଜୟ ମହାପାତ୍ର ଭଲ ସ୍ଥିତିରେ ଦେଖି ଥାଆନ୍ତି। ବିଜେଡ଼ିର ବିଦ୍ରୋହୀ ସଂଖ୍ୟା ଆଗକୁ ବଢିବାରେ ଲାଗିଛି। ତେଣୁ ୨୧ ଲୋକସଭାରୁ ବିଜେପି ୧୮ ଏବଂ ୧୪୭ ବିଧାନସଭାରୁ ୧୦୫ ଲଢି ବାକି ଆସନ ପ୍ରସ୍ତାବିତ ଆଞ୍ଚଳିକ ଦଳକୁ ପ୍ରଦାନ କରୁ ବୋଲି ମତ ପ୍ରକାଶ ପାଇଛି। ଆଉ ଗୋଟିଏ ଉଲ୍ଲେଖନୀୟ କଥା ହେଉଛି-ଜାତୀୟସ୍ତରରେ ବଢୁଥିବା କଂଗ୍ରେସର ରାଜ୍ୟ ନେତୃତ୍ୱ ସହ ଭିତିର ବୁଝାମଣା କରିବାକୁ ମଧ୍ୟ ଚିନ୍ତା କରାଯାଉଛି। କଂଗ୍ରେସକୁ ଆହୁରି ଦୁର୍ବଳ କରି ସେହି ଭୋଟ କିପରି ବିଜେପି ଏବଂ ନୂଆ ଆଞ୍ଚଳିକ ଦଳକୁ ପ୍ରଦାନ କରାଯାଇପାରିବ, ସେ ନେଇ ମଧ୍ୟ କାର୍ଯ୍ୟ କରାଯିବ। ଏଥିରେ ଜଣେ ପୂର୍ବତନ ପିସିସି ସଭାପତି ସକ୍ରିୟ ଭୂମିକା ଗ୍ରହଣ କରିବେ। ଏହାକୁ ନେଇ କୌଣସି ସୂଚନା ସାର୍ବଜନୀନ କରାଯାଇନାହିଁ। ମାତ୍ର ଜଣେ ସାମାଜିକ ଗଣମାଧ୍ୟମ ବ୍ୟବହାରକାରୀଙ୍କ ପୋଷ୍ଟ ଏବେ ଚର୍ଚ୍ଚାର କାରଣ ହୋଇଛି। ସେହି ପୋଷ୍ଟ ନିମ୍ନରେ ପ୍ରଦାନ କରାଯାଇଛି।