ଚିରଞ୍ଜୀବ-ମୋକ୍କିମଙ୍କ ନିଲମ୍ବନ ପ୍ରତ୍ୟାହାର, ସଗରିଆଙ୍କ ପ୍ରତ୍ୟାବର୍ତ୍ତନ ଘୋଷଣା ଅଶୋଭନୀୟ ଥିଲା କାହିଁକି…..
ଭୁବନେଶ୍ୱର : ପିସିସିର ପୂର୍ବତନ କାର୍ଯ୍ୟକାରୀ ସଭାପତି ଚିରଞ୍ଜୀବ ବିଶ୍ୱାଳ,କଟକ-ବାରବାଟୀ ବିଧାୟକ ମହମ୍ମଦ ମୋକ୍କିମ୍ ଏବଂ ପୂର୍ବତନ ବିଧାୟକ କୃଷ୍ଣଚନ୍ଦ୍ର ସଗରିଆଙ୍କ ଉପରେ ନିଲମ୍ବନ/ବହିଷ୍କାର ଉଠିସାରିଛି। ଗତକାଲି କଂଗ୍ରେସ ପକ୍ଷରୁ ନିଲମ୍ବନ ଉଠି ସାରିଥିବା ଓଡ଼ିଶା ପ୍ରଭାରୀ ଅଜୟ କୁମାର ଗଣମାଧ୍ୟମକୁ ସୂଚନା ଦେଇଛନ୍ତି। ମାତ୍ର ଯେଉଁଭଳି ଢଙ୍ଗରେ ଏହା କରାଗଲା, ତାହାକୁ ନେଇ ଦଳର କେତେକ ବରିଷ୍ଠ ନେତା ଅସନ୍ତୋଷ ଜାହିର କରିଛନ୍ତ। ଏନେଇ ଖୋଲାଖୋଲି ଗଣମାଧ୍ୟମରେ କହି ନ ଥିଲେ ବି ନିଜ ନିଜ ମଧ୍ୟରେ ଆଲୋଚନା କରୁଛନ୍ତି।
ଅଜୟ କୁମାରଙ୍କ ଓଡ଼ିଶା ଗସ୍ତ ସମୟରେ ଏକ ଘରୋଇ ହୋଟେଲରେ ଦୁଇ ଜଣ(ଚିରଞ୍ଜୀବ-ମୋକ୍କିମ) ଶ୍ରୀକୁମାରଙ୍କୁ ସାକ୍ଷାତ କରିଥିଲେ। ମାତ୍ର ସାକ୍ଷାତକାର ସମୟର ଏହି ଗୋପନ ଫଟୋକୁ ସାମାଜିକ ଗଣମାଧ୍ୟମରେ ଭାଇରାଲ କରାଗଲା। ଏଆଇସିସି କିମ୍ବା ପିସିସି ପକ୍ଷରୁ କୌଣସି ବିଜ୍ଞପ୍ତି ପ୍ରକାଶ ପାଇବା ପୂର୍ବରୁ ଅଜୟ କୁମାର ଏହି ଘୋଷଣା କଲେ। ମାତ୍ର ଏହି ସମୟରେ ସେ କହିଲେ ଯେ, ଏହି ତିନି ନେତା ଦଳରେ ମିଶିବା ନେଇ ଲିଖିତ ଭାବେ ଅବଗତ କରିଥିଲେ। ତାଙ୍କ ଦରଖାସ୍ତ ଉପରେ ପୁର୍ନବିଚାର କରି ଦଳ ସେମାନଙ୍କୁ ଫେରାଇ ଆଣିଛି। ଯେଉଁମାନେ ଦଳକୁ ଆସିବାକୁ ଚାହୁଁଛନ୍ତି, ସେମାନଙ୍କୁ ସ୍ୱାଗତ ବୋଲି ଶ୍ରୀ କୁମାର କହିଥିଲେ। ଏହା ଏପରି ଏକ ସ୍ପଷ୍ଟୀକରଣ ଥିଲା ଯାହା କୌଣସି କର୍ପୋରେଟ କମ୍ପାନୀର ସୂଚନା ଅଧିକାରୀ କହିବା ଭଳି ଥିଲା। ଦଳର ଏକ ଆଭ୍ୟନ୍ତରୀଣ ବ୍ୟାପାର ଓ ଆଲୋଚନାକୁ ପ୍ରଭାରୀ ହିସାବରେ ଏପରି ସାର୍ବଜନୀନ କରିବାଟା ଠିକ୍ ନୁହେଁ ବୋଲି ଅନେକ ନେତା କହିଛନ୍ତି। ଏକାଧିକ ଥର ବିଧାୟକ ହୋଇଥିବା ଜଣେ ବରିଷ୍ଠ ନେତା କୁହନ୍ତି ଯେ, ଦିନ ଥିଲା କଂଗ୍ରେସ ନେତୃତ୍ୱ ସଂଘର୍ଷ କରୁଥିଲା। ସେ ସମୟରେ ସ୍ୱର୍ଗତ ବସନ୍ତ ବିଶ୍ୱାଳ ଦଳକୁ ଆର୍ଥିକ ଭାବେ ମଜଭୁତ୍ କରିବାରେ ବହୁତ ସହଯୋଗ କରିଛନ୍ତି। ବିଶ୍ୱାଳ ପରିବାର କଂଗ୍ରେସ ଦ୍ୱାରା ଉପକୃତ ହୋଇଛନ୍ତି ସତ। ହେଲେ ସେମାନେ ମଧ୍ୟ ଦଳକୁ ଅନେକ କ୍ଷେତ୍ରରେ ସହଯୋଗ କରିଛନ୍ତି। ଥରେ ଭାବିଲେ ଚିରୁ ନ ରହିଲେ ଜଗତସିଂହପୁର, ତିର୍ତ୍ତୋଲ ଏବଂ ବାଲିକୁଦା-ଏରସମାରେ କଂଗ୍ରେସ ଲଢେଇରେ ରହିବ ତ। ଅନୁରୂପ ଭାବେ ଦୀର୍ଘଦିନ ପରେ କଟକ ସହର ଜଣେ ବିଧାୟକ ଦେଇଛି। ସେ ପୁଣି ଜଣେ ସଂଖ୍ୟାଲଘୁ। ରାଷ୍ଟ୍ରପତି ନିର୍ବାଚନ ପରି ଏକ ଗୌଣ ପ୍ରସଙ୍ଗକୁ ଧରି ତାଙ୍କୁ ନିଲମ୍ବନ କରାଯିବା କଣ ନିହାତି ଆବଶ୍ୟକ ଥିଲା। ତାଙ୍କୁ ବାଦ୍ ଦେଲେ କଂଗ୍ରେସ ସେଠି ଲଢିପାରିବ ତ ବୋଲି ସେହି ବରିଷ୍ଠ ନେତା କହିଥିଲେ।
ସାମଗ୍ରିକ ଘଟଣାକୁ ଅନୁଶୀଳନ କରି ରାଜନୈତିକ ବ୍ୟଙ୍ଗ କବି ତଥା ସମୀକ୍ଷକ ଦୀପ୍ତି ରଞ୍ଜନ ରାଉତରାୟ କହିଛନ୍ତି ଯେ, ମଲ୍ଲିକାର୍ଜୁନ ଖଡ଼ଗେ ଏବଂ ରାହୁଲ ଗାନ୍ଧୀ ଓଡ଼ିଶା ମାମଲାରେ କେସି ବେଣୁଗୋପାଳଙ୍କ ଉପରେ ନିର୍ଭରଶୀଳ। କେସି ବେଣୁ ଗୋପାଳ ସମ୍ପୂର୍ଣ୍ଣ ଭାବେ ପୂର୍ବତନ ପ୍ରଭାରୀ ଜିତେନ୍ଦ୍ର ସିଂଙ୍କ ଉପରେ ନିର୍ଭରଶୀଳ। ଜିତେନ୍ଦ୍ର ସିଂ ଦିଲ୍ଲୀ କଂଗ୍ରେସ ରାଜନୀତିରେ ନିରଞ୍ଜନଙ୍କ ସାନ ଭାଇ ଭଳି କାମ କରନ୍ତି। ରାହୁଲ ଗାନ୍ଧୀ ମଧ୍ୟ ଜିତେନ୍ଦ୍ରଙ୍କୁ ବହୁତ ବିଶ୍ୱାସକୁ ନିଅନ୍ତି। ନିରଞ୍ଜନ-ଜିତେନ୍ଦ୍ର ସିଂ-ନବଜ୍ୟୋତିଙ୍କ ମିଳନର ଟ୍ରେଲର ଓ ସିନେମା ଗତ ନିର୍ବାଚନରେ ଦେଖାଯାଇଛି। ତେଣୁ କିଛି ପରିବର୍ତ୍ତନ ହେବାର ନାହିଁ। କଂଗ୍ରେସ ସଙ୍ଗଠନକୁ ନବଜ୍ୟୋତିଙ୍କ ପାରିଷଦ ପାଇଁ ପ୍ରସ୍ତୁତ କରାଯାଉଛି। ନିର୍ବାଚନ ପୂର୍ବରୁ ସବୁ କମିଟି, ପର୍ଯ୍ୟବେକ୍ଷକଙ୍କ ନାମ ଘୋଷଣା ପରେ ଚିରଞ୍ଜୀବ ଏବଂ ମୋକ୍କିମଙ୍କୁ ଅଣାଯାଇଛି। ତେଣୁ ସାମଗ୍ରିକ ଘଟଣାକୁ ଶାଳୀନତାର କରାଯାଇ ପାରିଥାନ୍ତା।
