ଅତନୁ ନିଜ ବହିରେ କାହା ବିଷୟରେ ଲେଖିଛନ୍ତି….. କଣ ରହିଛି ତୃତୀୟ ଅଧ୍ୟାୟରେ…

ଭୁବନେଶ୍ୱର : ବିଜେଡିର ବରିଷ୍ଠ ନେତା ଅତନୁ ସବ୍ୟସାଚୀ ନାୟକଙ୍କ ପୁସ୍ତକ ଆସୁଛି। ତାହା ପୁଣି ଖୁବ୍ ଅଳ୍ପଦିନ ଭିତରେ । ପୂର୍ବତନ ମୁଖ୍ୟମନ୍ତ୍ରୀ ତଥା ବିରୋଧୀ ଦଳ ନେତା ନବୀନ ପଟ୍ଟନାୟକଙ୍କ ଦ୍ୱାରା ଏହା ଲୋକର୍ପଣ ହେବାକୁ ଯାଉଛି। ବରିଷ୍ଠ ସାମ୍ବାଦିକ ପ୍ରଭୁ ଚାଓ୍ୱଲା ମଧ୍ୟ ଏହି ଲୋକାର୍ପଣ କାର୍ଯ୍ୟକ୍ରମରେ ଯୋଗ ଦେବେ। ଏହାର ନିମନ୍ତ୍ରଣ ପତ୍ର ଗଣମାଧ୍ୟମ ପ୍ରତିନିଧି, ରାଜନୈତିକ ବ୍ୟକ୍ତି ବିଶେଷ ଏବଂ ଅତନୁ ସବ୍ୟସାଚୀଙ୍କ ବନ୍ଧୁ ମଣ୍ଡଳୀ ନିକଟରେ ପହଞ୍ଚି ଗଲାଣି। ଏହି ପୁସ୍ତକର ନାମ ରହିଛି- ମୋ ଜୀବନ, ମୋ ସମୟ। ପ୍ରଚ୍ଛଦ ପୃଷ୍ଠାରେ ଅତନୁଙ୍କ ଚଷମା ପିନ୍ଧା ସ୍ମିତ ହାସ୍ୟର ଏକ ଫଟୋ। ତାଙ୍କ କାନ୍ଧରେ ପଡିଛି ବୋଧେ ଖଣ୍ଡୁଆ ପାଟ। ହେଲେ ଅତନୁଙ୍କ ବହିକୁ ନେଇ ଏକ ନିର୍ଦ୍ଦିଷ୍ଟ ବର୍ଗରେ ଏକ ଉତ୍ସାହ ରହିଛି। ତାଙ୍କ ବହିରେ ସେହି ସବୁ କଥା ରହିଛି ନା ନାହିଁ, ସେ ନେଇ ଚର୍ଚ୍ଚା ଆଲୋଚନା ଆରମ୍ଭ ହୋଇଯାଇଛି।

ଜନତା ଦଳ ୧୯୯୫ରେ ପରାଜୟ ହେବା ପରେ ଦଳର ଅବସ୍ଥାକୁ ସାମ୍ବାଦିକ ଭାବେ ସେ ବହୁତ ପାଖରୁ ଦେଖିଛନ୍ତି। ବିଜୁ ବାବୁଙ୍କ ମୃତ୍ୟୁ ପରେ ଜନତା ଦଳ ବିଭାଜନ ଓ ବିଜେଡି ଗଠନକୁ ନେଇ ସେ ଏକ ନିକଟତମ ଦର୍ଶକ ଭାବେ ଦେଖିଛନ୍ତି। ବର୍ତ୍ତମାନର ବିଜେପି ସାଂସଦ ଭର୍ତ୍ତୃହରି ମହତାବଙ୍କ ସମ୍ପାଦିତ ପ୍ରଜାତନ୍ତ୍ରର ସେ ଥିଲେ ଅଗ୍ରଣୀ ରିପୋର୍ଟର। ଜନତା ଦଳର ବିଧାନସଭାର ଦୁର୍ଦ୍ଦଶାକୁ ମଧ୍ୟ ପୁସ୍ତକରେ ବଖାଣିଛନ୍ତି ନା ନାହିଁ, ତାହା ଉପରେ ନଜର ରହିଛି। ପ୍ରତାପ ଜେନା ଜନତା ଦଳ ଦାୟିତ୍ୱରେ ଥିବା ସମୟରେ ତାଙ୍କ ଦ୍ୱାରା କାର୍ଯ୍ୟକ୍ରମ ଗୁଡିକ କଭରେଜ ପାଇଁ ଭର୍ତ୍ତୃହରି ଶ୍ରୀ ନାୟକଙ୍କୁ ହାଲକା ତାଗିଦ୍ ମଧ୍ୟ କରିଥାନ୍ତି।

ଏହା ପରେ ଆସିବ ୨୦୦୦ ମସିହା କଥା। ଯେଉଁ ମସିହାରେ ବିଜୁ ଜନତା ଦଳର ତତ୍କାଳୀନ ପିଏସି ଅଧ୍ୟକ୍ଷ ବିଜୟ ମହାପାତ୍ରଙ୍କ ଟିକେଟ୍ କାଟି ଦିଆଯାଇଥିଲା। ଆଉ ଅତନୁଙ୍କୁ ଶଙ୍ଖ ଚିହ୍ନରେ ଲଢିବାକୁ ସୁଯୋଗ ମିଳିଥିଲା। ସେ ସମୟର କଥା। ସେ ଲଢେଇରେ ରାଜନୈତିକ ସଂଘାତ। ପରବର୍ତ୍ତୀ ସମୟରେ ନବୀନଙ୍କ ପ୍ରୋତ୍ସାହନରେ କେନ୍ଦ୍ରାପଡ଼ା ରାଜନୀତିରେ ଆସ୍ଥାନ ଜମାଇବା ଘଟଣା ସମ୍ପର୍କରେ କଣ ଲେଖିଛନ୍ତି। ତାହା ଦେଖିବାକୁ ଉତ୍କଣ୍ଠା ରହିଛି। ବୈଜୟନ୍ତ ପଣ୍ଡାଙ୍କ ମାତା ଇଲା ପଣ୍ଡା କେଉଁ ପରିସ୍ଥିତିରେ ରାଜ୍ୟସଭା ଯାଇଥିଲେ, ତାହା କେତେକଙ୍କ ପାଇଁ ରହସ୍ୟାବୃତ। ତେଣୁ ବୈଜୟନ୍ତ ପଣ୍ଡା କାହା ଇସାରାରେ ନବୀନ ବିରୋଧୀ ଆଭିମୁଖ୍ୟ ଗ୍ରହଣ କଲେ। ସେ ଅଧ୍ୟାୟ ରହିଛି ନା ନାହିଁ, ତାହା ଉପରେ ନଜର ରହିବ।

ପ୍ୟାରୀ ମୋହନ ମହାପାତ୍ରଙ୍କ ସମୟରେ ଦଳର ଅବସ୍ଥା, ମିଡ୍ ନାଇଟ୍ ଅପରେସନ୍ ଘଟଣାକୁ କିପରି ପ୍ରକାଶ କରିଛନ୍ତି। ତାହା ଉପରେ ସମସ୍ତଙ୍କ ନଜର ତୀକ୍ଷ୍ମ ଭାବେ ରହିଛି। ପ୍ୟାରୀ ଏକାଡେମୀର ଟ୍ରାଇପଡ- ସଞ୍ଜୟ ଦାସବର୍ମା-ଅତନୁ ସବ୍ୟସାଚୀ ନାୟକ- ଅରୁଣ ସାହୁଙ୍କ ବିଷୟରେ ବହିରେ ଅଛି କି ନାହିଁ, ତାହାକୁ ନେଇ ଅନେକ ଚାତକ ପରି ଅନାଇ ବସିଛନ୍ତି। ବିଜେଡି ରାଜନୀତିରେ ଭି.କେ ପାଣ୍ଡିଆନଙ୍କ ଅଭ୍ୟୁଦୟ ଓ ୨୦୨୪ ସାଧାରଣ ନିର୍ବାଚନର ବ୍ୟବଚ୍ଛେଦ କରିଛନ୍ତି ନା ନାହିଁ, ତାହା ଉପରେ ମଧ୍ୟ ନଜର ରହିବ। ବିଜେଡି କ୍ଷମତା ରାଜନୀତିରେ ଜଣେ ଧୂରୀଣ ଭାବେ ଆଖ୍ୟା ପାଇଥିବା ସବ୍ୟସାଚୀ ସାମ୍ପ୍ରତିକ ରାଜନୀତି ଓ ଭବିଷ୍ୟତର ଆଶା ଆଶଙ୍କାକୁ କିପରି ଭାବେ କମରେ ସ୍ଥାନ ଦେଇଛନ୍ତି, ତାହା ଉପରେ ସମସ୍ତଙ୍କ ନଜର ରହିବ।