ବିଜେଡି ସହ ସମ୍ପର୍କ ଛିଣ୍ଡେଇଲେ ଭର୍ତ୍ତୃହରି ମହତାବ……କ୍ଷୋଭର ସହ କହିଲେ ବହୁତ କଥା…..

ଭୁବନେଶ୍ୱର :  କଟକ ଏମପି ତଥା ବରିଷ୍ଠ ନେତା ଭର୍ତ୍ତୃହରି ମହତାବ ଶୁକ୍ରବାର ବିଜେଡିରୁ ଇସ୍ତଫା ଦେଇଛନ୍ତି। ଦଳର ସଭାପତି ତଥା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ଚିଠି ଲେଖି ସେ ନିଜ ଇସ୍ତଫା ପତ୍ର ପ୍ରଦାନ କରିଛନ୍ତି। ଖବରଦାତା ସମ୍ମିଳନୀ କରି ସେ କଟକରେ ନିଜ ଇସ୍ତଫା କଥା ଘୋଷଣା କରିଥିଲେ। ଶ୍ରୀ ମହତାବ କହିଥିଲେ ଯେ, ଭଗ୍ନ ହୃଦୟରେ ବିଜେଡିରୁ ଇସ୍ତଫା ଦେଉଛି। ମୋ ଧୈର୍ଯ୍ୟ ସୀମା ଲଂଘନ କରିଛି। ସେଥିପାଇଁ ଏ ନିଷ୍ପତ୍ତି ନେଇଛି। ଦଳର ପରିଚାଳନା ଓ ସଞ୍ଚାଳନରେ ଖୁସି ନାହିଁ। ଏସବୁକୁ ସୁଧାରିବାକୁ ଚେଷ୍ଟା କରି ବିଫଳ ହୋଇଛି। ଦଳରେ ମୋ କଥାତୁ ଗୁରୁତ୍ୱ ଦିଆଯାଇନାହିଁ। ବିଜେଡିରେ ଏକ ବନ୍ଧନରେ ରହିବା ପରି ଅନୁଭବ କରୁଥିଲି। ନିର୍ବାଚନ ଲଢିବା ନେଇ ସମର୍ଥକଙ୍କ ସହ କଥା ହେବି ବୋଲି ଶ୍ରୀ ମହତାବ କହିଛନ୍ତି। ଗତକାଲି ରାଜ୍ୟ ସରକାରଙ୍କ ପୁଲିସ୍ ବିଭାଗ ପକ୍ଷରୁ ଦଶନ୍ଧି ତଳର ଏକ ମାମଲା ରୁଜୁ କରାଗଲା। ନିର୍ବାଚନକୁ ଦୃଷ୍ଟିରେ ରଖି ଏଭଳି ଆକ୍ରୋଶମୂଳକ ପଦକ୍ଷେପ ନିଆଯାଇଥିବା ଭର୍ତ୍ତୃହରି ମହତାବ ଅନୁଭବ କରିଥିବା ଉଲ୍ଲେଖ କରିଥିଲେ।