ବିଜେଡ଼ିର ଆସନ ସଂଖ୍ୟା ହ୍ରାସ ପାଉଛି, ଏହି ଟ୍ରେଣ୍ଡ ବଳବତ୍ତର ରହିଲେ କେସିଆର ହୋଇଯିବେ ନବୀନ….
ଭୁବନେଶ୍ୱର : ବିଜେଡିର ଲୋକପ୍ରିୟତା ହ୍ରାସ ପାଉଛି। କେବଳ ଲୋକପ୍ରିୟତା ନୁହେଁ, ଭୋଟ୍ ମଧ୍ୟ ହ୍ରାସ ପାଉଛି। ମୁଖ୍ୟ ବିରୋଧୀ ଦଳର ଭୋଟ ବଢୁଛି। ବିଦ୍ରୋହୀ ବିଜେଡି ଆଶାୟୀ ମୁଖ୍ୟ ବିରୋଧୀ ଦଳକୁ ଯିବା ପାଇଁ ସଜବାଜ ହେଲେଣି। ବର୍ତ୍ତମାନ ସମୟରେ ବିଜେଡି ଶତାଧିକ ବିଧାୟକ ରହିଛନ୍ତି। ମାତ୍ର ଏହି ସଂଖ୍ୟାରେ ଅହେତୁକ ହ୍ରାସ ଦେଖାଗଲାଣି। ଏକଥା ଓଡ଼ିଶା ପତ୍ରିକା କହୁନାହିଁ। ବିଜେଡି ଦ୍ୱାରା ନିୟୋଜିତ ହୋଇଥିବା ଏକାଧିକ ସର୍ଭେକ୍ଷଣ ସଂସ୍ଥା ଏବଂ ଜନମତ ନାମକ ଏକ ସର୍ଭେକ୍ଷଣ ସଂସ୍ଥା ଏହି ରିପୋର୍ଟ ପ୍ରଦାନ କରାଯାଇଛି। ବିଜେଡି ଦ୍ୱାରା ନିୟୋଜିତ ସଂସ୍ଥା ଏହି କଥା ସାର୍ବଜନୀନ କରିନାହାନ୍ତି। ମାତ୍ର ଜନମତ ନିଜର ଆନୁଷ୍ଠାନିକ ଟୁଇଟର ହ୍ୟାଣ୍ଡେଲରୁ ଏହା ପ୍ରକାଶିତ କରିଛି। ପ୍ରାୟ ଅଢେଇ ଦଶନ୍ଧିରେ ପ୍ରଥମ ଥର ପାଇଁ ବିଜେଡିର ନିଶ୍ଚିତ ଜିତିବା ଆସନ ସଂଖ୍ୟା ହ୍ରାସ ପାଇବାର ଟ୍ରେଣ୍ଡ ରେକର୍ଡ କରାଯାଇଛି। ଗତ ଜାନୁୟାରୀ ୨୦ରୁ ୨୭ ତାରିଖ ମଧ୍ୟରେ କରାଯାଇଥିବା ସର୍ଭେରୁ ଏହି ଆଭାସ ମିଳିଛି। ବିଜେଡ଼ି-ବିଜେପି ମେଣ୍ଟ ଥିବା ବେଳେ ବିଜେଡି 60 ଆସନ ନିଶ୍ଚିତ ଜିତିବା ଭଳି ରହିଥିଲା। ଯାହା ୨୦୦୦ଏବଂ ୨୦୦୪ ସାଧାରଣ ନିର୍ବାଚନରେ ପ୍ରତିଫଳିତ ହୋଇଥିଲା। ଅନୁରୂପ ଭାବେ ମେଣ୍ଟ ଭାଙ୍ଗିବା ପରେ ନିଶ୍ଚିତ ଆସନ ସଂଖ୍ୟା ୮୫ରୁ ୯୦ ରହିଲା। ଏହା ୨୦୦୯, ୨୦୧୪ଏବଂ ୨୦୧୯ରେ ମଧ୍ୟ ସମାନ ଭାବରେ ରହିଲା। ପ୍ରଥମ ଥର ପାଇଁ ବିଜେଡିର ନିଶ୍ଚିତ ବିଜୟ ଆସନ ସଂଖ୍ୟା ମ୍ୟାଜିକ୍ ନମ୍ବର ୭୫ ଠାରୁ ହ୍ରାସ ପାଇଛି। ଏହି ଟ୍ରେଣ୍ଡ ଯଦି ଜାରି ରହେ। ତେବେ ଆଗାମୀ ଦିନରେ ଏହା ଆହୁରି ହ୍ରାସ ପାଇପାରେ। ବିଜେଡି ଯଦି କୌଣସି ମତେ ମ୍ୟାଜିକ୍ ନମ୍ବର ଛୁଇଁ ପାରେନି। କିମ୍ବା ଏହି ମ୍ୟାଜିକ୍ ନମ୍ବର ଠାରୁ ସର୍ବାଧିକ ୧୦ଟି ଆସନରେ ଅଧିକ ରହେ। ତେବେ ବିଜେପି ଏକ ମନସ୍ତାତ୍ତ୍ୱିକ ଫାଇଦା ପାଇବ। ଦାଗୀ ନେତାଙ୍କୁ ଇଡି, ସିବିଆଇ, ଆୟକର ଏବଂ କିଛି ପୁରୁଣା ଭିଡିଓ ଦ୍ୱାରା ବ୍ଲାକ ମେଲିଂ କରିହେବ। ଏହା ଦ୍ୱାରା ବିଜେଡିକୁ ଅଳ୍ପମତକୁ ଆଣିହେବ। କେସିଆର ଏବଂ ବିଆରଏସ୍ ବିରୋଧରେ ଯେପରି କଂଗ୍ରେସ ଉର୍ଦ୍ଧ୍ୱଗାମୀ ହେବାରେ ଲାଗିଥିଲା। ବିଜେପି ପାଇଁ ଓଡ଼ିଶାରେ ସେମିତି ଆଗକୁ ବଢିବାର ଗୋଟେ ସୁଯୋଗ ରହିଛି। ବିଜେପିକୁ ଭଲ ପାଇକି ଭୋଟ ଦେବା ଅପେକ୍ଷା ବିଜେଡ଼ି ବିରୋଧୀ ଜନମତରୁ ଏହି ଗୈରିକ ଦଳରୁ ଫାଇଦା ମିଳିବ।
ବିଜେଡିର ହେଭି୍ୱେଟ୍ ଲଢୁଥିବା ବଡମ୍ବା-ନରସିଂହପୁର, ଏକାମ୍ର ଭୁବନେଶ୍ୱର, ରେଢାଖୋଲ, ବୀରମହାରାଜପୁର, ସତ୍ୟବାଦୀ, ନିମାପଡ଼ା, ପୁରୀ, ଜଗତସିଂହପୁର, ମହାକାଳପଡ଼ା, ବରଗଡ଼, ବଡ଼ଚଣା, ବାରବାଟୀ-କଟକ, ଚୌଦାର କଟକ, ନର୍ଲା, ଟିଟିଲାଗଡ଼, ରାଉରକେଲା ଆସନର ସ୍ଥିତି ଏତେଟା ଭଲ ନାହିଁ। ଅନୁରୂପ ଭାବେ ପିପିଲି, ଭୋଗରାଇ, କୋରାପୁଟ ଜିଲ୍ଲାର ଦୁଇଟି, ମାଲକାନଗିରି ଜିଲ୍ଲାର ଦୁଇଟି ଏବଂ ନବରଙ୍ଗପୁର ଓ ରାୟଗଡ଼ା ଜିଲ୍ଲାର ଦୁଇଟି ଲେଖାଏଁ ବିଧାନସଭା ଆସନରେ ବିଜେଡି ଭୋଟ ହ୍ରାସ ପାଉଥିବା ଟ୍ରେଣ୍ଡ ଆସୁଛି। ଢେଙ୍କାନାଳ, ପରଜଙ୍ଗ, ପାଲଲହଡ଼ା, ଅନୁଗୋଳ ସ୍ଥାନୀୟ ସମୀକରଣ ବିଜେଡି ନେତୃତ୍ୱକୁ ଝଟକା ଦେବାର ସର୍ଭେକ୍ଷଣ ସଂସ୍ଥା ଆଶଙ୍କା କରିଛି। ଗଞ୍ଜାମ ଜିଲ୍ଲାରେ ତିନିରୁ ଚାରୋଟି ଆସନ ବିଜେପି ଜିତିବାର ସୁଯୋଗ ସୃଷ୍ଟି ହୋଇଛି। ଅଫିସରଙ୍କ ବୁଲିବା ନେଇ ମଧ୍ୟ ସର୍ଭେକ୍ଷଣ ଆସିଛି। ଏହା କିପରି ପ୍ରଭାବ ପକାଉଛି। ସେ ସମ୍ବଦ୍ଧୀୟ ଏକ ରିପୋର୍ଟ ମଧ୍ୟ ପ୍ରଦାନ କରାଯାଇଛି। ନୀତିଶ କୁମାର-ନବୀନ ପଟ୍ଟନାୟକଙ୍କ କ୍ଷମତାପିପାସୁ ଚରିତ୍ର ଗୋଟିଏ ପ୍ରକାରର ବୋଲି ଏକ ଧାରଣା ରହିଛି। ତେଣୁ ନୀତିଶ ଏନଡିଏ ମୁହାଁ ହେବା ପରେ ବିଜେଡ଼ି ମନସ୍ତାତ୍ତ୍ୱିକ ଭାବେ ଦୁର୍ବଳ ହୋଇଛି।
