କେନ୍ଦୁଝର ପରେ ଅନୁଗୋଳ : ଦଳୀୟ ଗୋଷ୍ଠୀ କନ୍ଦଳ, ପ୍ରଶାସନିକ ଅସହଯୋଗ କାରଣରୁ ଆଠମଲ୍ଲିକ ବିଧାୟକ ରମେଶ ସାଏଙ୍କ ଇସ୍ତଫା ଚର୍ଚ୍ଚା…

ଆଠମଲ୍ଲିକ :  ଅନୁଗୋଳ ଜିଲ୍ଲା ବିଜେଡିରେ ଗୋଷ୍ଠୀ କନ୍ଦଳ ବୃଦ୍ଧି। ଦଳ ଭିତରେ ଏକାଧିକ ଗୋଷ୍ଠୀ ମଧ୍ୟ ଶୀତଳ ଯୁଦ୍ଧ। ଦଳୀୟ କାର୍ଯ୍ୟକ୍ରମ ହେଉ କି ଜନ ସମ୍ପର୍କ ଯାତ୍ରା। ଏକାଧିକ ଗୋଷ୍ଠୀରେ ଭାଗ ହେଉଛନ୍ତି ଦଳୀୟ ଛାମୁଆ କର୍ମୀ ଓ ସମର୍ଥକ। ବର୍ତ୍ତମାନର ବିଧାୟକ ରମେଶ ସାଏ ଏବଂ ସମ୍ବଲପୁର ଲୋକସଭା ବିଜେଡି ସାଂସଦ ପ୍ରାର୍ଥୀ ନଳିନୀକାନ୍ତ ପ୍ରଧାନଙ୍କ ଭିତରେ ଶୀତଳ ଯୁଦ୍ଧ ଦାଣ୍ଡରେ ପଡ଼ି ହାଟରେ ଗଡିଲାଣି। ଆଶ୍ଚର୍ଯ୍ୟର କଥା, ତୃତୀୟ ମହଲାର ହସ୍ତକ୍ଷେପ ପରେ ଏହି ବିବାଦ ଆହୁରି ବୃଦ୍ଧି ପାଇଛି। ବିଶେଷ ସୂତ୍ରରୁ ମିଳିଥିବା ଖବର ଅନୁଯାୟୀ ଆଠମଲ୍ଲିକ ବିଧାୟକ ରମେଶ ସାଏ ବିଜେଡିରୁ ଇସ୍ତଫା ଦେବା ନେଇ ପତ୍ର ଲେଖିଛନ୍ତି। ନିକଟରେ ଶ୍ରୀମନ୍ଦିର ପରିକ୍ରମା ଓ ବିଶ୍ୱ ଓଡ଼ିଶା ସମ୍ମିଳନୀ ବିଜ୍ଞାପନ ପାଇଥିବାରୁ ରାଜ୍ୟ ମୁଖ୍ୟ ଗଣମାଧ୍ୟମ ଏହି ଖବରକୁ ଏତେଟା ଗୁରୁତ୍ୱ ଦେଇନାହିଁ।

ତୃତୀୟ ମହଲା ରମେଶ ସାଏଙ୍କ ନିର୍ଦ୍ଦେଶରେ କୌଣସି କାର୍ଯ୍ୟ ଯେପରି ନ ହୁଏ। ତାହା ସୁନିଶ୍ଚିତ କରିଛନ୍ତି। ଯାହା ଫଳରେ ସ୍ଥାନୀୟ ଅଧିକାରୀ ଶ୍ରୀ ସାଏଙ୍କୁ ଅବଜ୍ଞା କରୁଛନ୍ତି। ଅପରପକ୍ଷରେ ନଳିନୀକାନ୍ତ ପ୍ରଧାନଙ୍କ ନିର୍ଦ୍ଦେଶରେ କାମ ହେଉଛି। ଜଣେ ନିର୍ବାଚିତ ପ୍ରତିନିଧିଙ୍କ କଥା ରହୁନାହିଁ। ଜଣେ ସାଧାରଣ ନେତାଙ୍କ କଥା ରହୁଛି। ଏହି ବାର୍ତ୍ତା ମଧ୍ୟ ଆଠମଲ୍ଲିକରେ ଅଫିସର ରାଜ ବିରୋଧରେ ଏକ ବାତାବରଣ ସୃଷ୍ଟି କରିଛି। ଶ୍ରୀ ପ୍ରଧାନ ଏବଂ ଶ୍ରୀ ସାଏଙ୍କ ନିଜସ୍ୱ ସମାଜ ରହିଛି। ନଳିନୀଙ୍କ ପରି ରମେଶ ସାଏଙ୍କ ସ୍ୱତନ୍ତ୍ର ସମାଜ ଭୋଟ ରହିଛି। ଏହି ଭୋଟ୍ ଦ୍ୱାରା ସେ ପୁନର୍ବାର ବିଧାୟକ ହୋଇ ନ ପାରନ୍ତି, ମାତ୍ର ଆଗାମୀ ନିର୍ବାଚନରେ ବିଜେଡିର ଆନୁଷ୍ଠାନିକ ପ୍ରାର୍ଥୀଙ୍କ ସମ୍ଭାବ୍ୟ ପରାଜୟର କାରଣ ହୋଇପାରନ୍ତି।

ଉଲ୍ଲେଖଯୋଗ୍ୟ, ପୂର୍ବତନ ବିଜେଡି ବିଧାୟକ ସଞ୍ଜୀବ ସାହୁ ବିଜେପିରୁ ପ୍ରାର୍ଥୀ ହେବାର ଯଥେଷ୍ଟ ସମ୍ଭାବନା ରହିଛି। ସଞ୍ଜୀବଙ୍କ ବିଜେପିରୁ ପ୍ରାର୍ଥୀତ୍ୱ ସହ ରମେଶଙ୍କ ନୀରବତା ୨୦୨୪ରେ ଖେଳ ବିଗାଡି ଦେଇପାରେ। ସଞ୍ଜୀବ ସାହୁଙ୍କ ସମାଜର ପ୍ରାୟ ୩୨୦୦୦ଭୋଟ ରହିଛି। ଯାହା ପ୍ରଧାନ ସମାଜର ଭୋଟ ଠାରୁ ପ୍ରାୟ ତିନି ହଜାର ଅଧିକ। ଶ୍ରୀ ସାଏ ସାମାଜିକ ସମୀକରଣ ୧୮ରୁ ୨୨ ହଜାର ଭୋଟର ବିଗାଡିବାର କ୍ଷମତା ରଖିଛନ୍ତି। ଅନୁରୂପ ଭାବେ କେନ୍ଦ୍ର ମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ପ୍ରାର୍ଥିତ୍ୱ ବିରୋଧୀ ବିଜେପି ପାଇଁ ଏକ  ପ୍ରମୁଖ ଭୂମିକା ଗ୍ରହଣ କରିପାରେ ବୋଲି ରାଜନୈତିକ ସମୀକ୍ଷକମାନେ ମତ ପ୍ରକାଶ କରିଛନ୍ତି।