ସମ୍ବଲପୁର ଲୋକସଭା ଓ ଜିଲ୍ଲା ପୋଛି ନେବ ବିଜେପି…ବିଜେଡ଼ିକୁ କାଳ ଗୋଷ୍ଠୀ କନ୍ଦଳ..କଂଗ୍ରେସକୁ ପାଗ ଭିଡ଼ୁ ଭିଡ଼ୁ ଯାଉଛି ବେଳ…
ସମ୍ବଲପୁର : କେନ୍ଦ୍ରୀୟ ବିଜେପିର ଅପେକ୍ଷାକୃତ ନରମ ମନୋଭାବ ସତ୍ତ୍ୱେ ଓଡ଼ିଶାର ପଶ୍ଚିମ ପ୍ରାନ୍ତରେ ଦଳ ଭଲ ସ୍ଥିତିରେ ରହିଛି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଗସ୍ତ ପରେ କର୍ମୀମାନେ ଉତ୍ସାହିତ ହୋଇଛନ୍ତି। ଗୋଷ୍ଠୀ କନ୍ଦଳ ବିଜେଡି ଏବଂ ଉପଯୁକ୍ତ ରଣନୀତି କଂଗ୍ରେସକୁ ବିଜେପି ଠାରୁ ବହୁ ପଛରେ ରଖିଛି। ପ୍ରଧାନମନ୍ତ୍ରୀ ଶ୍ରୀ ମୋଦିଙ୍କ ଗସ୍ତ ପରେ କେନ୍ଦ୍ର ବିଜେପିର ରିସର୍ଚ୍ଚ ଟିମ୍ ଏହି ତଥ୍ୟ ପ୍ରଦାନ କରିଛି। ଆରଏସଏସ୍, ଜନମତ, ବରାହେ ଇତ୍ୟାଦି ସଂସ୍ଥା ଦ୍ୱାରା କରାଯାଇଥିବା ସର୍ଭେକ୍ଷଣରେ ହତଚକିତ କରିଦେବା ଭଳି ରିପୋର୍ଟ ଆସିଛି। ଗତଥର ଅପେକ୍ଷା ବିଜେଡି ବିରୋଧରେ ଜନମତ ବୃଦ୍ଧି ପାଇଛି। ସମ୍ବଲପୁର ଲୋକସଭା ଓ ବିଧାନସଭା ବିଜେପି ପୁର୍ନବାର ଜିତିବାର ସମ୍ଭାବନା ରହିଛି। ଏହି ସର୍ଭେକ୍ଷଣରେ ସମ୍ବଲପୁର ଲୋକସଭା ଏବଂ ଜିଲ୍ଲାର ସ୍ଥିତି ନେଇ ପ୍ରଶ୍ନ ପଚରାଯାଇଥିଲା। ସମ୍ବଲପୁର ଲୋକସଭା କ୍ଷେତ୍ର ଅନ୍ତର୍ଗତ ଛେଣ୍ଡିପଦା ଏବଂ ରେଢାଖୋଲରେ ବିଜେଡି ବିଧାନସଭାରେ ଭଲ ପରିସ୍ଥିତି ରହିଛି। ଅନ୍ୟ ପାଞ୍ଚଟି ଯଥା-ସମ୍ବଲପୁର, ରେଙ୍ଗାଲୀ, ଆଠମଲ୍ଲିକ, କୁଚିଣ୍ଡା ଏବଂ ଦେଓଗଡ଼ରେ ବିଜେପି ବିଧାନସଭା ଜିତିବାର ସମ୍ଭାବନା ରହିଛି। ଲୋକସଭାରେ ବିଜେପି ଓ ବିଜେଡିର ବ୍ୟବଧାନ ବୃଦ୍ଧି ପାଇବ ବୋଲି ରିପୋର୍ଟରେ ଦର୍ଶାଯାଇଛି। କେନ୍ଦ୍ର ମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଏହି ଆସନରୁ ଲୋକସଭା ଲଢିବାକୁ ଯାଉଥିବା ଜଣାପଡିଛି।
ଜୟ ନାରାୟଣ ମିଶ୍ର କୌଣସି ବିକାଶମୂଳକ କାର୍ଯ୍ୟକୁ ନେଇ ଭୋଟ ଭିକ୍ଷା କରୁନାହାନ୍ତି। ତଥାପି ବିକାଶଗତ ପ୍ରଦର୍ଶନ ଖରାପ ଥିବା ସତ୍ତ୍ୱେ ଧାର୍ମିକ ଧ୍ରୁବୀକରଣ, ଆର୍ଥିକ ଭାବେ ସମୃଦ୍ଧ ଥିବା ସମ୍ବଲପୁରର ମାରଓ୍ୱାଡ଼ି ଓ ବ୍ରାହ୍ମଣ ଲବି ଶ୍ରୀ ମିଶ୍ରଙ୍କୁ ନିର୍ବାଚନୀ ଗଣିତରେ ଆଗରେ ରଖୁଛି। କେତେକ ସମୀକ୍ଷକଙ୍କ ମତରେ ବିଜେଡି ସମ୍ବଲପୁରକୁ ଜାଣିଶୁଣି ଛାଡି ଦେଇଛି। କାରଣ କେନ୍ଦ୍ରୀୟ ନେତୃତ୍ୱ ଏହି ଲୋକସଭା ଆସନକୁ ଜିତିବାକୁ ଚାହୁଁଛି। ଜୟନାରାୟଣ ମିଶ୍ରଙ୍କ ପ୍ରାର୍ଥୀତ୍ୱ ବିଜେଡି ପାଇଁ ଚ୍ୟାଲେଞ୍ଜିଂ ମାତ୍ର ତାଙ୍କ ବ୍ୟତିରକେ ଅନ୍ୟ କେହି ପ୍ରାର୍ଥୀ ହେଲେ ବିଜେଡି ବିଧାନସଭାରେ ଭଲ ମୁକାବିଲା କରିପାରିବ ବୋଲି କୁହାଯାଇଛି। ବିଜେପି ମହିଳା ମୋର୍ଚ୍ଚା ତଥା ପଛୁଆବର୍ଗର ଜଣେ ମହିଳାଙ୍କୁ ବ୍ରାହ୍ମଣ ନେତା ଜୟ ନାରାୟଣ ମିଶ୍ରଙ୍କ ପରିବାର ପକ୍ଷରୁ ଉପଯୁକ୍ତ ବ୍ୟବହାର କରାଯାଉ ନ ଥିବା ଅଭିଯୋଗ ହୋଇଥିଲା। ରାଜ୍ୟର ପ୍ରମୁଖ ଗଣମାଧ୍ୟମ ଉଚ୍ଚବର୍ଗ ହାତରେ ରହିଥିବାରୁ ଏହି ଖବର ବାହାରକୁ ଆସିପାରିନାହିଁ। ଏହା ବିଜେପି ପାଇଁ ଏକ ନକରାତ୍ମକ ପକ୍ଷ ରହିଛି।
ସାମଗ୍ରିକ ଭାବେ ଯଦି ବିଜେଡି କଥା ବିଚାର କରାଯାଏ। ତେବେ ସମ୍ବଲପୁର ବିଜେଡି ବହୁ ଭାଗରେ ବିଭକ୍ତ। ଯଥା-ରାସେଶ୍ୱରୀ ପାଣିଗ୍ରାହୀଙ୍କ ଗୋଷ୍ଠୀ, ପ୍ରସନ୍ନ ଆଚାର୍ଯ୍ୟଙ୍କ ଗୋଷ୍ଠୀ, ରୋହିତ ପୂଜାରୀଙ୍କ ଗୋଷ୍ଠୀ, ବିଶାଲଙ୍କ ଗୋଷ୍ଠୀ, ମୂଳ ଜନତା ଦଳ ଗୋଷ୍ଠୀ, ସିର୍ଦ୍ଧାର୍ଥଙ୍କ ଗୋଷ୍ଠୀ, ବବି ଦାସଙ୍କ ଯୁବ ଗୋଷ୍ଠୀ ଇତ୍ୟାଦି। ରାସେଶ୍ୱରୀଙ୍କୁ ଅଣଦେଖା କରି ରୋହିତ ପୂଜାରୀଙ୍କୁ କାମ କରିବାକୁ ବିଜେଡି କହିସାରିଛି। ବିନା ରାସେଶ୍ୱରୀରେ ବିଜେଡି ଗୋଷ୍ଠୀ ମଧ୍ୟ ପ୍ରଭାବିତ ହେବ ବୋଲି ରାଜନୈତିକ ସମୀକ୍ଷକମାନେ କହିଛନ୍ତି। ଦେବଗଡ଼ରେ ବିଜେଡି ତିନୋଟି ଗୋଷ୍ଠୀରେ ବିଭକ୍ତ। ରେଙ୍ଗାଲୀ ଏବଂ କୁଚିଣ୍ଡାରେ କିଏ ପ୍ରାର୍ଥୀ ହେବ ସେ ନେଇ ଦ୍ୱନ୍ଦ୍ୱ ରହିଛି। ଆଠମଲ୍ଲିକରେ ନଳିନୀକାନ୍ତ ପ୍ରଧାନ ଏବଂ ରମେଶ ସାଏଙ୍କ ଲଢେଇ ଚରମସୀମାରେ ପହଞ୍ଚିଛି। ଆଗାମୀ ଦିନରେ ବିଜେଡିରୁ ନିଲମ୍ବିତ ହୋଇଥିବା ବହୁ ବରିଷ୍ଠ ନେତା କେନ୍ଦ୍ର ମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ନେତୃତ୍ୱରେ ବିଜେପିରେ ସାମିଲ ହୋଇପାରନ୍ତି ବୋଲି ଜଣାପଡିଛି।
