ମନମୋହନଙ୍କ କଥା ଆଉ ରାଜଧାନୀ ପାଗ..ଘଣ୍ଟାକୁ ଘଣ୍ଟା ବଦଳିଲା…General Election 2024
ନୂଆଦିଲ୍ଲୀ : ମାର୍ଚ୍ଚ ମାସ ୧୪ ତାରିଖ, ଗୁରୁବାର। ଭୁବନେଶ୍ୱରର ସକାଳୁଆ ପାଗ ହାଲକା ଖରା। ହେଲେ ସାମାନ୍ୟ ଗୁଳୁଗୁଳି। ମଧ୍ୟାହ୍ନରେ ଖରା ମଧ୍ୟମ ଧରଣର। ଗୁଳୁଗୁଳି ଟିକେ ବଢିଲା। ଗାଧୁଆ ବେଳ ସରି ଖାଇବା ବେଳକୁ ବର୍ଷା। ବରଷିଲା ହେଲେ ବେଶୀ ବରଷିଲା ନାହିଁ। ବର୍ଷା ପରେ ସାମନ୍ୟ ଶୀତଳତା ଲାଗିବା କଥା। ହେଲେ ସେତେ ଲାଗିଲା ନାହିଁ। ଘର ଭିତରେ ଓ ବାହାରେ ଗରମ ସେମିତି ଲାଗିକି ରହିଲା। ଇଏ ତ ଗଲା ମାତ୍ର ୧୦ ଘଣ୍ଟାର ପାଗ। ଯାହା ଘଡିକେ ବଦଳିଲା। ଏ ପାଗ ସହ ବିଜେପି ସଭାପତି ମନମୋହନ ସାମଲଙ୍କ କଥା ପୂରା ସାମଞ୍ଜସ୍ୟ ଖାଉଥିଲା। କେତେବେଳେ କେଉଁ ବିବୃତି ଦେଉଥିଲେ। କଣ ଟୁଇଟ୍ କରୁଥିଲେ। କଣ ଡିଲିଟ୍ କରୁଥିଲେ, ତାହା ଜାଣି ହେଉ ନ ଥିଲା। ଖାଲି ବଦଳୁଥିଲା। ସକାଳେ ଦିଲ୍ଲୀରୁ ଆସିଥିଲେ ପୁଣି ଡକରା ପାଇଲେ। ସନ୍ଧ୍ୟାରେ ନୂଆଦିଲ୍ଲୀ ପାଇଁ ଟିକେଟ୍ କାଟିଲେଣି। ମନମୋହନଙ୍କ ପ୍ରଥମ ବୟାନରେ ଭୁବନେଶ୍ୱର ଏମପି ଅପରାଜିତା ଷଡଙ୍ଗୀ ଉତ୍ସବ ପାଳିବାକୁ କହିଲେ। ହେଲେ ଦ୍ୱିତୀୟ ବୟାନ ବେଳକୁ ଲେଟ୍ସ ୱେଟ୍ ଏଣ୍ଡ ୍ୱାଚ୍ ବୋଲି କହିଲେ। ମନମୋହନ ଦିନରେ କହିଥିଲେ ଯେ, ବିଜେପି ଏକାକୀ ଲଢିବ। ଓଡିଆ ଅସ୍ମିତାର ଲଢେଇ ଲଢିବ। ଏକାକୀ ସରକାର କରିବ। ହେଲେ ଏହାକୁ କିଛି ବିଜେପି ନେତା, ଗଣମାଧ୍ୟମ ପ୍ରତିନିଧି ମେଣ୍ଟ ହେବନି ବୋଲି ଚିତ୍ରଣ କଲେ। ଭାୟା ସୁନୀଲ ବଂଶଲ ଗୋଟିଏ ଫୋନ୍ କଲ ମନମୋହନ ଧରିଲେ। ତା ପରେ ପୁଣି ତାଙ୍କ ଆଡୁ ଗଣମାଧ୍ୟମକୁ ଡାକିଲେ କହିଲେ..ମୋ ବୟାନଙ୍କୁ କଦର୍ଥ କରାଯାଉଛି। ଯେ କୌଣସି ନିଷ୍ପତ୍ତି ଦଳର ଶୀର୍ଷ ନେତୃତ୍ୱ ନେବ। ସଂସଦୀୟ କମିଟି ନେବ। ଏକଥା ପୁଣି ମେଣ୍ଟ ଚର୍ଚ୍ଚାକୁ ଉଜ୍ଜୀବିତ କରି ରଖିଲା। ସୂତ୍ରରୁ ମିଳିଥିବା ଖବର ଅନୁଯାୟୀ, ଅମିତ ଶାହାଙ୍କ ଶେଷ ଗସ୍ତ ସମୟରୁ ମେଣ୍ଟ ସମ୍ପର୍କରେ ଫାଇନାଲ କରାଯାଇଥିଲା। ସେଥିପାଇଁ ସୁନୀଲ ବଂଶଲ ଏବଂ ବୈଜୟନ୍ତ ପଣ୍ଡାଙ୍କୁ ଅବଗତ କରାଯାଇଥିଲା। ମନମୋହନ ସାମଲ ପୂର୍ବରୁ ମେଣ୍ଟ ସରକାରରେ ସାମିଲ ଥିବାରୁ ତାଙ୍କୁ ପୁର୍ନବାର ସଭାପତି ଦାୟିତ୍ୱ ଦିଆଯାଇଥିଲା। କିଛିଦିନ ତଳେ ଦଳୀୟ ମୁଖପାତ୍ରଙ୍କ ସହ ଆଲୋଚନା ବେଳେ ସୁନୀଲ ବଂଶଲ କହିଥିଲେ ଯେ, ବିଜେଡି ବିରୋଧରେ ଚାର୍ଜସିଟ୍ ଦାଖଲ କରିବାକୁ ପଡିବନି। ସେମିତି ଲଢେଇ ହେବ। ଏହାର ଅର୍ଥ ଆମେ ଏକାଠି ଲଢିବା। ଏହି କଥାକୁ କେହି ଡିକୋର୍ଡ କରିନାହାନ୍ତି। ତେଣୁ ନରେନ୍ଦ୍ର ମୋଦି-ଅମିତ ଶାହା ବଂଶଲଙ୍କ ଜରିଆରେ ହିଁ ସବୁ କରାଉଛନ୍ତି। ଏକଥା ବୁଝିବାରେ ରାଜ୍ୟ ବିଜେପି ନେତା ବିଳମ୍ବ କରି ଦେଇଛନ୍ତି।
