ସାମାଜିକ ନ୍ୟାୟର କାର୍ଯ୍ୟସୂଚୀ ହିଁ ବିଜୟର ଚାବିକାଠି, ବିଜେଡି ଛାତ୍ର ସାମ୍ମୁଖ୍ୟ ମାନସମନ୍ଥନରେ ମନଖୋଲି କହିଲେ ସଭିଏଁ
ଭୁବନେଶ୍ୱର : ଓଡ଼ିଶାର ଜନସଂଖ୍ୟାର ଅଧା ପଛୁଆବର୍ଗ। ପ୍ରାୟ 40 ପ୍ରତିଶତ ଅନୁସୂଚିତ ଜାତି ଓ ଜନଜାତି ବର୍ଗର। ଏହି ବର୍ଗର ଛାତ୍ରଛାତ୍ରୀମାନଙ୍କ ଉନ୍ନତି ହିୱ ରାଜ୍ୟର ଭବିଷ୍ୟତକୁ ସୁଦୃଢ କରିବ। ଅତୀତରେ କଣ ହୋଇଛି ବା କଣ ନ ହୋଇଛି, ତାହା ପର କଥା। ଭବିଷ୍ୟତର ରଣନୀତି ନିର୍ଦ୍ଦାରଣ କରାଯିବା ଦରକାର। ପଛୁଆବର୍ଗଙ୍କ ପାଇଁ ଶିକ୍ଷାରେ ସଂରକ୍ଷଣ ସୁନିଶ୍ଚିତ କରିବା ପାଇଁ ରାଜରାସ୍ତାକୁ ଓହ୍ଲାଇବାକୁ ପଡିବ। ଅନୁରୂପ ଭାବେ ଏସସି,ଏସଟି ଛାତ୍ରଛାତ୍ରୀଙ୍କ ପାଇଁ ଡାକ୍ତରୀ ଓ ଇଂଜିନିୟରିଂରେ ସଂରକ୍ଷଣ ସୁନିଶ୍ଚିତ କରିବାକୁ ପଡିବ। ଏହି ପ୍ରସଙ୍ଗକୁ ନେଇ ଆଗକୁ ବଢିଲେ ବିଜୁ ଛାତ୍ର ଜନତା ଦଳ ପରବର୍ତ୍ତୀ ସମୟରେ ସରକାର ଗଠନ କରିବାରେ ପ୍ରମୁଖ ଭୂମିକା ଗ୍ରହଣ କରିବ। ତେଣୁ ଦଳ ସାମାଜିକ ନ୍ୟାୟ ରାସ୍ତାରେ ଓହ୍ଲାଇ ପଡୁ ବୋଲି ଚିନ୍ମୟ ସାହୁ କହିଥିଲେ। ନିର୍ବାଚନ ପରେ ପ୍ରଥମଥର ପାଇଁ ଛାତ୍ର ବିଜେଡି ପକ୍ଷରୁ ଏକ ମାନସମନ୍ଛନ ବୈଠକ କରାଯାଇଥିଲା।
ବୈଠକ ପୂର୍ବାହ୍ନରୁ ଆରମ୍ଭ ହୋଇ ଅପରାହ୍ନ ଯାଏଁ ଚାଲିଥିଲା। ଶେଷରେ ଦଳର ସଭାପତି ନବୀନ ପଟ୍ଟନାୟକ ଆସି ଯୋଗଦାନ କରି ଉଦବୋଧନ ଦେଇଥିଲେ। ଏହା ପୂର୍ବରୁ ଦାୟିତ୍ୱରେ ଥିବା ଛାତ୍ର ସଭାପତି ଦେବୀ ରଞ୍ଜନ ତ୍ରିପାଠୀ ବକ୍ତବ୍ୟ ରଖିଥିଲେ। ଏହା ପରେ କିଛି ରାଜ୍ୟ ସଙ୍ଗଠନ କାର୍ଯ୍ୟକର୍ତ୍ତା ଓ ଜିଲ୍ଲା ସଭାପତି ବକ୍ତବ୍ୟ ରଖିଥିଲେ। ଭି.କେ ପାଣ୍ଡିଆନ ଅନୁପସ୍ଥିତ ରହିଥିଲେ। ଛାତ୍ର ବିଜେଡି ପିଲାମାନେ ନବୀନ ନିବାସ ଗଲା ସମୟରେ ମଧ୍ୟ ପାଣ୍ଡିଆନଙ୍କୁ ଦେଖିବାକୁ ମିଳି ନ ଥିଲା। ବରିଷ୍ଠ ନେତା ଦେବୀ ପ୍ରସାଦ ମିଶ୍ର, ସଞ୍ଜୟ ଦାସବର୍ମା, ଅତନୁ ସବ୍ୟସାଚୀ ନାୟକ, ଅରୁଣ ସାହୁ ଏବଂ ପ୍ରଣବ ପ୍ରକାଶ ଦାସ ଉପସ୍ଥିତ ରହିଥିଲେ। ବୈଠକରେ ମହିଳା ସଂଖ୍ୟା ଉଦବେଗଜନକ ଥିଲା। ପ୍ରାସଙ୍ଗିକ ମନେ କରି ତାଙ୍କୁ ଡକାଯାଇଥିବାରୁ ସଞ୍ଜୟ ଦାସବର୍ମା ଆୟୋଜକମାନଙ୍କୁ ଧନ୍ୟବାଦ ଦେଇଥିଲେ। ଅରୁଣ ସାହୁ ଭାଷଣ ଦେବା ସମୟରେ ଅତନୁ ସବ୍ୟସାଚୀ ହଠାତ୍ ଉଠି ଯିବା ପାଇଁ ଉଦ୍ୟତ ହେଉଥିଲେ। ଏହାର ସୁଯୋଗ ନେଇ ଶ୍ରୀ ସାହୁ କହିଲେ , ଭାଇ କମ୍ ସମୟରେ ସାରି ଦେବି। ଏକାଠି ଯିବା। ଏକାଠି ବସୁଥିଲେ। ପୁଣି ମଝିରେ ଅଲଗା ହୋଇଗଲେ । ତେଣୁ ଏ ଅବସ୍ଥା। ଆସ ଏକାଠି ରହିବ।। ଏହି ବାର୍ତ୍ତାଳାପ ଆଜି ଛାତ୍ର ବିଜେଡିରେ ଚର୍ଚ୍ଚାର କାରଣ ହୋଇଛି।
ନାମଗୋପନ ରଖିବା ସର୍ତ୍ତରେ ତିନୋଟି ଜିଲ୍ଲାର ଛାତ୍ର ସଭାପତି କହିଛନ୍ତି ଯେ, ଉପର ନିର୍ଦ୍ଦେଶ ଅନୁଯାୟୀ କରୋନା କାଳରେ ଜୁମ୍ ମିଟିଂ ଆଳରେ ସଙ୍ଗଠନ ଦୁର୍ବଳ ହୋଇଗଲା। ପଞ୍ଚାୟତ ଓ ପୌର ଫଳାଫଳ ଭଲ ହେବା ପରେ ସବୁ କିଛି ସ୍ୱଭାବିକ ମନେ ହେଲା। ନିର୍ବାଚନ ବେଳକୁ ଛୋଟମୋଟ ଗୁଡାଏ ଫାଟ। ତେଣୁ ଏ ପରିସ୍ଥିତି। କିନ୍ତୁ ବିଜେପି ଜାତୀୟସ୍ତରରେ ଦୁର୍ବଳ ହେଉଛି। ଉପଯୁକ୍ତ ରାଜନୈତିକ ରଣନୀତି ଦଳକୁ ଆହୁରି ସକ୍ରିୟ କରି ପାରିବ। ବୈଠକରେ କୌଣସି ନିର୍ଦ୍ଦିଷ୍ଟ ପ୍ରସଙ୍ଗ ଉପରେ ପ୍ରସ୍ତାବ ଗୃହୀତ ହୋଇପାରିନାହିଁ।
