ଗୋପାଳପୁର ଆସନରେ ବିକ୍ରମଙ୍କ କାର୍ଯ୍ୟକ୍ରମ କେତେ ଗ୍ରହଣୀୟ ହେଉଛି…କ’ଣ ଆସିଛି ରିପୋର୍ଟ…
ବ୍ରହ୍ମପୁର : ଗଞ୍ଜାମ ଜିଲ୍ଲା ଅନ୍ତର୍ଗତ ଗୋପାଳପୁର ବିଧାନସଭା ନିର୍ବାଚନମଣ୍ଡଳୀରେ କିଏ ପ୍ରାର୍ଥୀ ହେବ, ସେ ନେଇ ବିଜେଡି ଶିବିରରେ ବ୍ୟାପକ ଉତ୍ସାହ ରହିଛି। ଏକଦା ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟର ଅତି ବିଶ୍ୱସ୍ତ ଅଫିସର ଗୋପବନ୍ଧୁ ଦାଶଙ୍କୁ ଏହି ଆସନରେ ସଂଗଠନ ଦାୟିତ୍ୱ ଦିଆଯାଇଥିଲା। ପଞ୍ଚାୟତ ନିର୍ବାଚନରେ ଭଲ ଫଳାଫଳ ହୋଇଥିଲେ ବି ସଂଗଠନରେ ଆଖିଦୃଶିଆ ପରିବର୍ତ୍ତନ ଦେଖାଯାଇନଥିଲା । ପରେ ତାଙ୍କୁ କିଛି କୋଟେରୀ ନେତା ପରିବର୍ତ୍ତନ କରାଇଦେଇଥିଲେ। ଏବେ ଯାଏଁ, ବିଜେଡି କାହାରିକୁ ପ୍ରାର୍ଥୀ କରିବ, ତାହା ସ୍ଥିର କରି ନାହିଁ। ମାତ୍ର ପଡୋଶୀ ବ୍ରହ୍ମପୁର ବିଧାୟକ ବିକ୍ରମ ପଣ୍ଡାଙ୍କୁ ଗୋପାଳପୁର ଦାୟିତ୍ୱ ପ୍ରଦାନ କରାଯାଇଛି। ସେ କିଛିଟା ସାଙ୍ଗଠନିକ କାର୍ଯ୍ୟ କରିବାକୁ ଚେଷ୍ଟା କରି ଆସୁଛନ୍ତି। ମାତ୍ର ସମସ୍ତଙ୍କୁ ନେଇ ଗୋଟିଏ ଛତା ତଳେ ଏକାଠି କରିବାରେ ବିଫଳ ହେଉଥିବା ଲକ୍ଷ୍ୟ କରାଯାଉଛି। ତେଣୁ ତାଙ୍କ ପ୍ରାର୍ଥୀତ୍ୱକୁ ନେଇ ବିଜେଡି ନିର୍ବାଚନର ଯଥେଷ୍ଟ ପୂର୍ବରୁ ମତ ସ୍ପଷ୍ଟ କରିବା ଦରକାର ବୋଲି ସ୍ଥାନୀୟ କର୍ମୀ ମହଲରେ ଆଲୋଚନା ହେଉଛି।
ଦିନକ ତଳେ ଗୋପାଳପୁର ଅଞ୍ଚଳରେ ରେଡ୍ଡିକା ତଥା ରେଡ୍ଡି ସମାଜର ଲୋକଙ୍କ ଏକ ବଡ଼ ବୈଠକ ଅନୁଷ୍ଠିତ ହୋଇଥିଲା। ଏହି ବୈଠକରେ ରେଡ୍ଡିକା ସମାଜ ନିଜର ପରୋକ୍ଷରେ ଶକ୍ତି ପ୍ରଦର୍ଶନ କରିଛି। ସେମାନଙ୍କ ଭୋଟ ଅଂଶ ଏକ ବଡ଼ ଭାଗ ହୋଇଥିବାରୁ ତାଙ୍କୁ ଅଣଦେଖା କରି ବିଜେଡି କାହାରିକୁ ପ୍ରାର୍ଥୀ କରି ପାରିବ ନାହିଁ। ଅନୁରୂପ ଭାବେ ଗୋଲା, କାମ୍ପ ଏବଂ କାଚରା ସମାଜ ମଧ୍ୟ ଆଭ୍ୟନ୍ତରୀଣ ଭାବେ ସଙ୍ଗଠିତ ହେବାରେ ଲାଗିଛନ୍ତି। ସାମାଜିକ ସମୀକରଣକୁ ସାଙ୍ଗରେ ନେଇ ବିଜେଡିକୁ ଚାଲିବାକୁ ପଡିବ। ପ୍ରଦୀପ ପାଣିଗ୍ରାହୀ ଗତଥର ମଧ୍ୟ ବଡ଼ ବ୍ୟବଧାନରେ ଜିତି ନ ଥିଲେ। ତାଙ୍କ ବ୍ୟବହାର ନେଇ କର୍ମୀ ମହଲରେ ଅସନ୍ତୋଷ ରହିଆସିଛି। ସମାନ ବର୍ତ୍ତମାନ ବିକ୍ରମ ପଣ୍ଡାଙ୍କ କ୍ଷେତ୍ରରେ ଦେଖାଦେଇଛି। ପ୍ରଦୀପଙ୍କ ପରେ ଗଞ୍ଜାମ ଜିଲ୍ଲାର ମଦିରା ସାମ୍ରାଜ୍ୟ ଶ୍ରୀ ପଣ୍ଡାଙ୍କ ହାତରେ ରହିଛି। ବିକ୍ରମ ପଣ୍ଡା-ସନ୍ତୋଷ ପାତ୍ରଙ୍କ ଯୋଡ଼ି ଆର୍ଥିକ ଭାବେ ପ୍ରଭାବଶାଳୀ। ହେଲେ ରାଜନୈତିକ ଗ୍ରହଣୀୟତା ହେଇପାରୁନି। ଏହି ଆସନଟି ଜିତିବାକୁ ହେଲେ ବିଜେଡିକୁ ଅଧିକ ପରିଶ୍ରମ କରିବାକୁ ପଡିବ ବୋଲି ରାଜ୍ୟ ଗୁଇନ୍ଦା ମତ ରଖିଛି।
ବିକ୍ରମ ପଣ୍ଡା ଗୋପାଳପୁର ବାହାର ଲୋକ। ମୂଳତଃ ସେ ବିଜେଡି ଲୋକ ନୁହଁନ୍ତି। ବ୍ରହ୍ମପୁରରେ ବିଧାୟକ ଭାବେ ପ୍ରଦର୍ଶନ ଏତେ ଭଲ ନୁହଁ। ବାହୁବଳୀ ନେତା ଭାବେ ଖ୍ୟାତି ଏକ ନକରାତ୍ମକ ଛବି ତିଆରି କରିଛି। ସ୍ଥାନୀୟ ଲୋକଙ୍କୁ ଅବହେଳା କରି ବ୍ରହ୍ମପୁର ଲୋକଙ୍କୁ ଗୋପାଳପୁର ଦାୟିତ୍ୱ ବାଣ୍ଟିବା ଅଭିଯୋଗ କରିଛି। ଶ୍ରୀ ପଣ୍ଡାଙ୍କ କିଛି କାର୍ଯ୍ୟ ବିଜେଡି ଏବଂ ରାଜ୍ୟ ସରକାରଙ୍କ ମହିଳା ସଶକ୍ତୀକରଣ ସ୍ଲୋଗାନର ବିରୋଧାଚରଣ କରୁଛି। ବିଭିନ୍ନ ସଂସ୍ଥା ଦ୍ୱାରା ହୋଇଥିବା ସର୍ଭେ ବିକ୍ରମ ପଣ୍ଡା ପ୍ରାର୍ଥୀତ୍ୱଙ୍କୁ ନକରାତ୍ମକ ରିପୋର୍ଟ ଦେଇଛି। ତେଣୁ ବିଜେଡିର ପରବର୍ତ୍ତୀ ପଦକ୍ଷେପ କଣ ରହୁଛି, ତାହା ଉପରେ ସମସ୍ତଙ୍କ ନଜର ରହିବ।
